قدر مراهقة 2

الجزء 14

#قدر_مراهقة2
#ميرال_مجد
#بقلم_فريال
الجزء 14
ناض ليها وائل قالها كي تحاماو بناتك في ميرال ماقولتي والو سكتي وذوك كي ردت حقها ولقات الي يدافع عليها نضتي تندبي اتفرجي واسكتي خليهم يترباو تريكة لقحاب جايين لنص دارنا وحابين يضربو ختي وبغيتينا نسكتو مليحة هذي في عشنا وراهو ينهش فينا الي قال دمي همي والله ماغلط _ صحيت ياوليد خويا درت عليا كيما ختك بصح وش يخرج من تربية سلمى المعوجة غير هكا لاتربية لااخلاق ماتحتارمو لاصغير لاكبير، نطقت انا وقولتلها تاع وجهك تربية ماما حنا على الاقل منتلاحوش على رجال متزوجين شفنا تربيتك كيفاه دايرة نص لافامي علبالهم تربية بناتك شحال شابة لدرجة طوموبيل ترفد وطوموبيل تحط يدخلولك من ليل لليل وانت ساكتة وعاجبك الحال وعاسة غير ولاد ناس هذا الي قال الجمل يضحك على حدبة خوه ونسا بلي عندو حدبة هكاك انت تضحكي على تربية ماما الي جابت نسا ورجالة وراهم رافعينلها راسها ونسيتي تربيتك جبتي بنات كل وحدة تقول لختها اقعدي هنا انا هي الباطرونة تلعب ب5رجال في نفس لوقت ولا هوما الي يلعبو بيها مفهمتش. مع جيت نكمل سكتتني ماما قالتلي بلعي فمك مناقصنيش مشاكل _ بصح ماما هي الي بدات وخالتي كانت حاضرة علبالها شكون بدا يتبلى _ هي تبلاتك وانت نضتي تشعلي وحدك كنتي قادرة تسكتي وتروحي لشومبرتك _ منسكتش اذا انت تسكتي انا منقدرش وخصوصا بعد واش قالت عليك منسمحلهاش والي يزيد يوصلم بكلمة تاكلو بسنيا نمرمدو _ اذا عينك ديري المشاكل مديريهمش في داري قودي لدارك وديري رايك مش انا الي طول عمري ماعايبت حتى انسان تجي انت في نهار تفزدي كلش _ معليش صحيتي هذي هي رجعتي تحاوزي بنتك على جال لكلاب _ميرررااال بلعي وقودي لشومبرتك وجهك منيش حابة نشوفو ودارت لعمتي قالتلها اسمحيلها امسحيها فيا طفلة مزالت صغيرة متعرفش وبناتك عاندوها وتخلطت قالها بابا مكلاه تطلبي سماح لاني كنت حاضر وشفت كلش هوما الي بداو ولازم يطلبو سماح اما بنتي مادارت والو من غير انها دافعت على حقها وحقك _ منحتاج حتى واحد يدافع عليا كل واحد يلهى بدارو وبروحو. انا مبكيتش كي ضربوني لبنات وسبوني بصح كي ماما قالتلي هكاك دموعي رجعو شلال محبوش يحبسو حاوزتني قدام الكلبات وخلاتهم يستشفاو فيا بصح منيش ميرال اذا قعدتلك في دارك بخري بيها وهاي ليك، روحت لشومبرتي لبست حجابي وزدت هزيت ساكي لحت فيه دراهم ولبست بشماق وخرجت بلا مايشوفوني نخليلهم دار يشطحو فيها (كنا في صيف 7نهار)، خرجت من ثم وانا مش عارفة وين نروح بصح مدام عندي دراهم خلي نروح ندور ونحوس ونخليهم يحوسو عليا حتى يكرهو وميلقاونيش.
#فريال