#قدر_مراهقة2
#ميرال_مجد
#بقلم_فريال
الجزء 82
سكت شوي وعاودت قولتلو عادي عادي يقدر باباك يجيب من مرا خلاف اصلا راهو وحدو في الغربة يكون دبر وحدة وراهو يخدم على ولادو وذوك يجيبلي سلف جديد واخ ليك يكون مطبز ومدحدح _ طيري من قدامي انت هبلتي وانا نتبع فيك _ انا رايحة نطير وعندك تجيني فليل ولا دور بيا نجيفك _ لا فليل نحتاجك _تحتاجني لصوالحك والله ماتشوفها ليلة انا عيت كل يوم عڨابي فشلتني واصلا مدام غوج قربت تجي دارتلي روطار بيومين ونعرفها كي دير روطار تجي سمانتين _ تسمى مافيهاش نبقى شايح _ هيه تستاهل والله نخليك شايح شهر _ متقدريش _ نقدر علاش لا انت الي متصبرش _ انا نقدر نصبر نفكرك 6 شهر بلا بيك وكنت صابر ومزال نقدر نصبر كثر شوفي لروحك اذا قادرة تصبري _ عادي عادي نقفل جدها ونتهناو كامل _ والله ماكي صحيحة انت بلاصتك في سبيطار لمهابل لوكان غير تبلعي شوي فمك علينا وتريحينا من تمهبيلك قلقتيني _ ها متخافش تعيا وتشتاق كلمة مني ومتلقاهاش وليام بيناتنا (وصح جا وقت وين رجعت منهدرش خلاص وهي يحلل فيا باش نقولو يالوكان كلمة وانا زي العڨون قدامو). فاتو 4ايام ملي بدا الحجر الصحي انا عاجبني لحال مجد نهار كامل مقابلني نهبل فيه ونتمسخر كي نكمل شغلي نلهالو هو ولجين نلعبو مع بعض نعوضو الي فات. ليلة سهرت انا وياه ومن تعب هذاك رقدت عيت نتحرك اصلا ليامات هذو نرقد مانفيق بوالو زي لميت وين مانلقى بلاصة نحط راسي انا والطبوزة تاعي نرقدو كل وقت حتى سمنا من لماكلة ورقاد بزاف ومجد يظل يضحك ويقولنا البطة وبنتها، فقت على مجد ينوض فيا بلعقل كي مبغيتش نوض رش عليا شوي ما تخطفت ونضت مرعوبة نعيط عليه شبيك هبلت انت مريض في راسك حتى تلوح عليا لما ناس راقدين هكا يفيقوهم عيب عليك والله ماننساهالك ونضت نبكي غاضتني عمري بزاف كلش كلش ورقادي نقتل على جالو، تولهت لبنتي بين يديه رافدها وحاطلها منشفة مبلولة على راسها نضت من سرير وقدمت لعندها نمس فيها لقيتها تغلي وحمارت بزاف قولتلو شبيها _ طلعتلها سخانة _ ياك قبيل برك كانت لباس ياربي فاتت ساعة ملي رقدت _ ايه انا تاني حرت شبيها وشربتلها دواها ومكان والو مبغاتش تهبطلها سخانة _ هيا ندوها لسبيطار ازرب البس قشك _ والحجر نسيتيه _ مايهمني والو انا ندي بنتي وخلي تتخلط وش راح يديرولنا بروصي برك ساهل _ ايه هيا البسي ندوها بالخف يداوها خير من دار مافيها والو.لبسنا قشنا وديناها طول طريق وهي ساكتة وتشوف فينا ومرة على مرة تبوسني انا ومجد كي لحقنا لنص طريق حبسونا ليجوندارم وبداو بنديب تاعهم وين رايحين والحجر ولمرض والقانون عيا مجد يفهم فيهم بلي بنتو مريضة وفي حالة وهوما يقولولو القانون ولوكان عيطتو للحماية المدنية ترفدها خير وكورونا دور ومهيش عفسة ديروها.
#فريال
![](https://img.wattpad.com/cover/361647013-288-k543583.jpg)
YOU ARE READING
قدر مراهقة 2
General Fictionقصة حقيقية من الغرب الجزائري مراهقة غير مبالية للحياة تدمرت حياتها بسباب لسانها الطويل. عمرها 17سنة بين ليلة ونهار لقات روحها متزوجة بالانسان الي تكرهو ومتحملوش.ومع لوقت تبدلت نظرتها للحياة ورجعت انسانة واعية ومتفهمة وناضجة بعد مادات بزاف ضربات خلا...