မူပိုင် [အတွဲ နှစ်]

အပိုင်း နှစ်

မူပိုင် အပိုင်းနှစ်။     ။

အခန်းတံခါးလက်ကိုင်အား ဆုပ်ကိုင်လာသည့် လက်တစ်စုံမှာ အနည်းငယ် တုန်ရီလျက်ရှိ၏။ ကျွီခနဲမြည်သံနှင့်အတူ ပွင့်ဟသွားသော ကျွန်းတံခါးချပ် အနောက်၌ ဆွေးမြေ့မြေ့ အတိတ်တို့က ဆီးကြိုလို့နေလေသည်။

ပိတောက်ပန်းရနံ့တွေ ၊ ရယ်သံလွင်လွင်လေးတွေ ၊ ခြေသံ မတိုးမကျယ်တွေ အစရှိသဖြင့် အမှတ်တမဲ့ အရာတွေဟာ အမှတ်တရအဖြစ် လောင်ကျွမ်းကုန်၏။

သယ်ဆောင်လာသော အဝတ်အိတ်များအား နံရံနားသို့ ကပ်ထားလိုက်ပြီး အခန်းအတွင်းသို့ ဝေ့ဝဲကြည့်ဖြစ်သည်။ အချို့သော အသုံးအဆောင် ပစ္စည်းများမှာ ပြန်သုံးဖို့ရန် မသင့်တော်တော့ပေ။ ကြည့်မှန်အဝိုင်းသည်လည်း နှစ်ပေါင်းများစွာ ပစ်ထားခဲ့ခြင်းကြောင့် ညစ်ထေးလို့နေ၏။

" ခင်ဗျားက ကျုပ်မျက်လုံးထဲ အလှဆုံးဖြစ်ခဲ့တာ "

ဒေါ်ဒေါ် အလှပြင်နေတိုင်း ထိုင်ငေးခဲ့ရသူက ကျုပ်ပဲမို့ ညစ်ထေးထေး မှန်အဝိုင်းလေးကို ကြည့်ရင်း မျက်ရည်ဝဲမိ၏။ လွမ်းသည့်စိတ်ဟာ တကယ့်ကို အူလှိုက်သည်းလှိုက်။

အသုံးအဆောင် ပစ္စည်းများကို လှည့်ပတ်ကြည့်ပြီးနောက် ခြေလှမ်းတစ်စုံသည် ပိတ်အဖြူဖြင့် ဖုံးအုပ်ထားသော ပန်းချီကားချပ်ရှေ့၌ အဆုံးသတ်၏။ ပြတင်းပေါက်မှ တိုးဝင်နေသော လေတဖြူးဖြူးကြောင့် ပိတ်အဖြူစလေးမှာ တလွင့်လွင့်။

" ချစ်တယ် " ဆိုတာ ထာဝရအတွက် မဟုတ်ဘူးလို့ ပြောလာခဲ့ရင် ကျုပ်မျက်ရည်တွေနဲ့ သက်သေပြပါ့မယ် ဒေါ်ဒေါ်။ အချစ်အတွက် သေရဲတဲ့လူတွေထက် ကျုပ်က ပိုပါတယ်၊ ဘာလို့ဆို ကျုပ်က အချစ်အတွက် ပြန်လည်မွေးဖွားလာတာ။

ခပ်ကြမ်းကြမ်း လှပ်တင်လိုက်ခြင်းကြောင့် ပိတ်အဖြူစလေးသည် လေထဲ၌ စက္ကန့်ပိုင်းမျှ ဝေ့ဝဲပြီးမှသာ ကြမ်းခင်းပေါ်သို့ သက်ဆင်းသွားလေ၏။

" ကျုပ်တို့ ပြန်ဆုံကြမယ် မဟုတ်လား ဒေါ်ဒေါ် "

ဒေါ်ဒေါ့်နံဘေးမှာရှိနိုင်ဖို့ ဘယ်အရပ်ဒေသဆီ ကျုပ်လှမ်းခဲ့ရမလဲ။ ဒေါ်ဒေါ့်မျက်ဝန်းလေးတွေကို နောက်တစ်ကြိမ် ထပ်ပြီးငေးကြည့်နိုင်ဖို့ အချိန်ဘယ်လောက်စောင့်ရမလဲ။ ကျုပ်က အရူးအမူး ချစ်တာမို့၊ ဒီထပ်ပိုပြီး မဝေးချင်တော့တာမို့ ဘယ်ဘုရားဆီ ဆုတောင်းရမလဲ ဒေါ်ဒေါ်။