لأننا غاليات 💎

بعد 20 سنة قررت ألبس الحجاب

بعد 20 سنة قررت ألبس #الحجاب ... بالبداية ما كنت ملتزمة في ، يعني قدام ولاد خالاتي وولاد عماتي والقرايب ما البسه ، غير هيك كنت لما اطلع بالحارة ما البسه،
بس كانت خطوة جريئة بحياتي ، بيوم من الأيام وانا رايحة عالشغل ،
صار معي حادث، يومها شفت الموت بعيوني ،
الحمد لله نجيت من الحادث ،
بس طول ما انا بالمستشفى وانا اسمع صوت بداني
" قال تعالى: (وَأَنْذِرْهُمْ يَوْمَ الْحَسْرَةِ إِذْ قُضِيَ الْأَمْرُ وَهُمْ فِي غَفْلَةٍ وَهُمْ لَا يُؤْمِنُونَ) " ...
اطلع حوالي ما في حدا سامع شي غيري ... اجت امي يومها ، حكتلها يما جيبلي لبس شرعي معك، امي كانت لسا مو محجبة ،فاستغربت من تحولاتي السريعة ، جابتلي ولبستهم وطلعت فيهم ، يا الله شو حسيت براحة ، بس الي صار معي بعدين ، انا كل صاحباتي كانوا من الطبقة الهاي كلاس، الي بحبو الفياعة واللبس والشعر وهالقصص،
وكانت اعز صديقة لالي اسمها تالا، كانت متل اختي وأعز ، نطلع كل الطلعات سوا ، دائما يا هي عندي يا انا عندها ، وكنا انا وياها صحبة مع شباب كتير اصدقاء يعني ، المهم اول ما تحجبت بلشت تبعد عني شوي شوي، اتصل عليها تحكيلي مش فاضية ، الاقيها طلعت مع بنات تانين ، البنات الي كاتنت هي نفسها ما بطيقهم ، بعد ما عملت حادث ، توقعت اول وحدة تزورني ، بس للاسف ما زارتني ، زارتني يومها " هدى " ،
هدى كانت صاحبتي من بعيد ، وصراحة انا كنت ارتحلها كتير ، بنت هادية وراكزة وملتزمة بس مو متشددة ، جابتلي شوكلاتة ودبدوب كبير، وقعدت ترفع بمعنوياتي ، وتحكيلي بجنن اللبس الشرعي عليكي ، من يومها هدى صارت صاحبتي القريبة ، يا الله شو شغلات تغيرت بحياتي، قديش ناس منافقين ومظاهر كانوا فيها وراحوا ، قديش صرت احس كل ما ادعي ربي يخترلي الأفضل والأحسن يبعدوا ناس عني ، واتقرب منه اكثر...
بيوم من الأيام التقيت مع صاحباتي القديمات بالصدفة بالشارع ، انا كنت زعلانة من تالا بس الباقيين ومو هامميني كتير ، رحت اسلم عليهم ، عملوا حالهم مش شايفيني، وسمعتهم بحكو عني معقدة .... ضحكت وكملت طريقي لحالي ....
بس كان في الي صديقة مو محجبة لسا ... بس ولله بتحبني وبنحترم بعض انا وياها هي الوحيدة الي مع هدى ضلو جنبي وطلعوا حقيقين ... صديقتي هاي كانوا اخلاقها بجننوا
بعد فترة بلش يضعف ايماني شوي شوي، واشتاق للبس والطلعات وحياتي زمان ، صحيح انا ملتزمة حاليا ، بس هالشي ما بيعني اني ما بحب الحياة ،
انا بحب الحياة ، بس ما بعصي ربنا لحتى أعيشها ، كنت أبكي بالليل كتير ، يا لله ليش الكل بعد عني ، يا الله لا تختبرني بالناس الي كنت احبهم ، يا الله اعطييني القوة لاستمر ،
حتى ابوي بفترة من الفترات حكالي انتي فاضحتينا بلبسك ... ما ابوي زلمة راقي واله مكانته بالمجتمع ، وكان رافض فكرة اللبس الشرعي تماما ، حتى امي وصاحباتها الكول مش عاجبهن الوضع ... مع هيك كانت هدى تضل تساعدني لأستمر ....
بيوم من الأيام ... بوصلني اتصال .... الو ... مين !
كانت تالا عم تبكي ... حكتلها شو في ...
قالتلي : انا غلطت غلطة كبيرة ... متذكرة صاحبك !
قلتلها مين ...
قالتلي : صاحبك سامر ...
اه ماله ...
بعد ما تحجبتي ولبستي شرعي وبعدتي عنه ... انا صرت اتقرب وهوي يتقرب مني ... امبارح اكتشفت انه ضحك علي ! ونا خسرت كل شي ..
يومها ما عرفت شو احكي ... مش من حقي اشمت ... ولا من حقي ازعل ... هي جرحتني وزعلتني بس عرفت حكمة ربنا بالشي لي صار معي ... وحكيت الحمد لله انه ربنا بعدني عن هالجو .. كان انا اليوم منهارة عالاخر ....
روحت يومها عالبيت وحكيت لابوي القصة ... حكتله شايف كيف الحجاب الي منعتني منه والصلاة واللبس الشرعي انقذوني من هالشغلة ... ابوي يومها حضني ودمع ... احلى شي صار انه صحيت على صوت أبوي بحكي الله اكبر وبصلي الفجر ... يا شو حلو الشعور من انا وصغيرة ما عمري شفته هيك ... عيطت وعيطت .. وفرحت
كثير بنات ملتزمات ، بس كمان بحبو الحياة، مش يعني اذا هي ملتزمة يعني معقدة ، ولايعني انها ما بتحب تفرح وتنبسط وتلعب ، بس هي اختارت الطريق الأقرب لقلبها .. ومو يعني كل البنات الي مو ملتزمات مو مناح ، وانهم مش مأدبين لا دائما في ناس مناح بكل مكان ... بس في ناس غارقين بالمظاهر والمعاصي وبس ...
والله يهدينا جميعا
#بعض اجزاء #القصة_واقعية
#هديل_قاسم