Maraming bagay ang patungkol sa'yo
Maraming kwentong pinagsaluhan tayo
Pero marami ring mga ala-alang hindi kasama ako
Pero isa sa mga nakasaksi nito
Magsimula tayo sa kasalukuyan hanggang sa mabalikan natin ang nakaraan
Ating sariwain ang mga tinginan na hatid ay tawanan
Mga pasikretong kwentuhan na magdamagan
Ang mga kalokohang sabay nating tinatago sa'yong mga magulang
Simulan natin sa'yong ngiti na nagbibigay kinang
Sa iyong mga matang parang tala sa kalangitan
At kapag ibinuka mo na ang iyong bibig
Mapapakinggan ang tawa na laging nakakahawa
Laging ginagaya dahil dulot nito'y kaunting saya
Ang iyong mga salita dulot ay kaunting ginhawa
Kaunting pagkamangha
Kaunting mahika't pagkatuwa
Kakaiba ka
May mga bagay na ikaw lang ang nakakapag isip
Ikaw lang ang nakakapansin
Kaya bigla mo na lang tatawanan
Totoo, nakakabaliw ka
Ang iyong ngiti, ang iyong tawa
Lahat ng bagay na nagpapaalala sa amin kung sino ka
Lahat ng mga ala-alang kasama ka
Parating nagbibigay saya
Makasaysayan ka
Maaaring hindi para sa iba
Pero sami'y nagmamarka ka
Mahalagang bahagi ka
Sa mga taong sayo'y nagpapahalaga
Sa mga taong piniling manatili kaysa lisanin ka
Mga taong patuloy pinapatatag at binubuo kung sino ka
Ilang pahina na rin ang iyong binuksan
Para sa hinahangad mong kinabukasan
Ilang kwento na rin ang tinapos mo sa tawa
Kahit minsan sa'yo ito'y nakakasakit na
Matatag ka
Hindi man nakikita nila
Pero ang bakas ng mga luha sa'yong mukha
Ang nagsisilbing palatandaan ng iyong pakikipaglaban
Ng iyong pakikidigma sa lahat ng hirap sa buhay
Hindi mo kailangan sumuong sa digmaan
Hindi mo kailangang patunayan ang sarili sa lipunan
Para ipakita na kaya mong lumaban
Hayaan mo rin ang sariling maging mahina
At paminsan-minsa'y lumuha
Hayaan mong sa'yo ay may umalalay
Kami naman ang aagapay
Sa mga pagkakataong gusto mo ng sumuko sa laban ng buhay
Tulong ang aming iyaalay
Sumadal ka samin hangga't gusto mo
Lumuha ka hanggang sa mawala ang sakit na nararamdaman mo
Magmahal ka hanggang sa mapunan lahat ng sakit na dulot nito
At lumaban ka kapag kaya mo na
Hindi man ikaw ang hinahangad ng iba
Pero tandaan mong sa ami'y sapat ka na
Ikaw lang ang hinahangad kaya't hindi ka na papakawalan pa
Hindi na pababayaan pa
Sana ang ngiti iyong mukha ay hindi maging bakas na sa kalauna'y mawawala
Sana'y manatili at patuloy na masaksihan ito
Hindi pa dito nagtatapos ang iyong kwento
Simula pa lang ito ng bagong pahinang bubuksan mo
