فاتن اصلها ما زعلت مع انو طردتها بالبارد و قالت ليها انا مراة زيك مالك خجلانة مني ؟ .........بعد شوية زحل سكتت منها بقت ما بترد على كلامها لحدي ما فاتن زهجت طلعت و لاقت سامي في الغرفة الجنب الباب قالت ليهو ودعناكم الله و انا والله ما عارفة زحل طردتني لي شنو مع انها ما بتجيني انا بجيها و بسال منها ، و انا بس اديتها بعض النصائح ما اكتر عشان تبقى مراة ست بيت نجيضة ،انا اقدم منها و كل القلتو ليها ليه ما بتهتم بي نفسها ليه لا حنة لا دخان ولا لبس حلو ......اسي شوف انا و كشفت ليهو رجليها بي كل جرأة اسي مرتك بتعرف زي دا ؟ ........سامي نططت عيونو و افتكر الموضوع عفوية منها لكن برضو ما قادر يتحمل جرأتها .......سامي بقى يقول ليها معليش زحل شوية عصبية اتحمليها ، امسحيها لي في وشي يا فاتن معليش. .......انا ما زعلانة منها و لا بزعل منها زحل دي زي اختي و انت كمان عزيز علي و انتو الجيران الوحيدين المونسني انا راجلي عندو مراة تانية و انا ظالمني راميني مع ا هلو و هو مع مرتو التانية ........الله يصلح الحال لا حول ولا قوة إلا بالله .......فاتن بقت تبكي و تتنخج علي حالها قالت ليهو تجي زحل تطردني ........تعالي معاي تعالي يا فاتن دقيقة .......
دخلو جوة زحل قالت ليهو دي كانت وين ؟ جيتي .......مالك يا زحل طردتيها .......ما طردتها والله لكن زعلني كلامها بس فسكت خليتها .......حرام عليك دي الجارة الوحيدة المواصلاك اسي في واحدة غيرها بتجيك ؟ و لا تسأل منك ؟ ما تبقي كعبة يا زحل مع الناس .......زحل انقمصت و بقت ساكتة و تعاين لي فاتن ......اساسا ما زعلت منك يا زحل عادي نحن صحبات ........بعدها طلعت فاتن خلتهم .......
شفت يا سامي المراة دي انا والله ما بقدر تاني افتح ليها الباب عديل كدا ما تقول لي .......لالا يا زحل ياخ شكلها مسكينة صاحبيها راجلها عندو مراة تانية و ما مهتم بيها .......اجي دا قالتو ليك انت ؟ راجلها بجيها يوم بعد يوم مقسم وقتو بيناتهم و هي اسي حامل مراة منفسنة انا شميتها .......و بعدين صحي كلامها انتي اسي ما شايفاها ماشاء الله مراة مجيهة و انتي المفروض عروسة اخدي منها النصايح ........انا الحمد لله بي امي لو عايزة اخد نصايح و بعدين هي لحقت رصت ليك الموضوع .......خلاص يا زحل المراة جارة و خلاص ما عايزين مشاكل مع الناس عشان يكرهونا عامليها باحترام و اي واحدة من جاراتك تجيك هنا تعامليها بكل ادب و احترام و بس ........زحل قالت ليهو تمام يا سيدي امرك حاعاملها بكل احترام خلاص اسي بمشي اعتذر منها .......خلاص تمام يكون احسن اساسا انتي ما حصل مشيتي ليها .......
زحل مشت و هي متضايقة بس قالت فعلا كلام سامي صاح ما اخرب وش مع الناس يقولو كعبة .......دقت ليهم الباب ......جا جلال فتح الباب و قال ليها اهلا اتفضلي .......فاتن موجودة ......اي اتفضلي قاعدة .......دخلت سلمت على ام جلال و دخلت لي فاتن قالت ليها كيفك .......فاتن سلمت عليها بي برود اهلا .......فاتن انا اسفة والله ما قصدي انتي فهمتيني غلط و انا فعلا مفروض اتقبل النصيحة .......ما مشكلة يا زولة حصل خير......خلاص طيب انا استأذن لانو سامي منتظرني .......تمام مع السلامة ....
..بعدها بكم يوم فاتن مشت لي زحل عشان تعرف اخبارها دقت الباب مسافة ماف زول فتح .......فهمت انو زحل ما عايزاها رجعت في الشارع لاقت سامي جاي من شغلو......سلمت عليهو بي وش بشوش قالت ليهو شفت زحل ابت تفتح لي الباب ......سامي قعد يضحك قال ليها انتي ما تكوني حساسة ، زحل مافيشة مشت تقعد مع اهلها كم يوم طولت منهم .......زحل اتفتحت اساريرها و فرحت شديد قالت ليهو بالله ؟ من متين مشت .......ياداب مشت امبارح يمكن تجي الاسبوع الجاي .......خلاص طيب تمام شكرا ليك .......العفو علي شنو ياخ .......
فاتن مشت من قدامو و جرت على بيتها جهزت ليها غدا سريع .......جلال جا داخل تعبان من شغلو. .....يا سلام الليلة نشيطة على غير العادة .......هوي دا ما تبعك دا للجيران ......جيران ؟؟؟ .......اي المراة الجاتني يوم داك متذكرها بقت صحبتي شديد ........ايواااا طيب خلي لي .......خليت ليك قوم خت براك انا ماشة .......شالت فاتن العمود حقها و مشت دقت لي سامي الباب .......سامي جا فتح الباب لقاها فاتن اتخلع فيها للحظة بس لما شاف الاكل اتبسط ........جبت ليك الغداء قلت زحل مافي عشان كدا ........تسلمي كتير والله ما كان في داعي للتعب دا ......ولا تعب ولا حاجة دا الواجب نحن جيران .......دخلت فاتن بدون ما يسمح ليها بس كان خاتي في بالو حسن نيتها ......
يتبع......
