فاتن اليوم داك كلو تبكي الليل ما نامتو حست انها غلطت في كونها وقعت في حب امجد ، و بقى هو محور حياتها و حتى اهلها علاقتها بيهم باردة جدا ، كان مفروض تخت في راسها ولو واحد في المية انو ممكن يعرس فيها و يجيب فيها مراة زي ما هي في يوم جات في مراة و كمان صحبتها ........بس استجمعت قوتها و حلفت إلا تندمها و تندم امجد على عملتو ........
مشت فاتن لي جارتها و حكت ليها مشكلتها .......كر على يا فاتن ما اظن تكون سمحة زيك .......بري والله شينة شنا تقطع الخميرة ......سبحان الله الرجال جنو بقو بعرسو ما بهمهم الشكل .......اسي انا جاياك توريني الشيخ التشادي القلتي عمل لي جارتنا عمل و راجلها رجعها .......المراة اتخلعت قالت ليها ااااا؟ ......الراجل القلتي جاي من تشاد ولا من وين دا .......لالا نيجيريا ما تشاد نيجيري بس الراجل دا كعب شديد انا ما بنصحك .......بس انتي دليني عليهو و انا بمشي ليهو براي لو انتي خايفة .......مخيييرة انا حذرتك ........وصفت ليها (اشتركت معاها في الجريمة ) و مشت فاتن للراجل مباشرة ........لقت بيتو مبشتن و وسخان شديد و في جلود معلقة و مشرورة .......دخلت و سلمت عليهو لابس وسخان بس شعرو ناعم و منكوش ما مرتب و لابس ليهو جلابية وسخانة رمادية و ضعيييف شديد ........شكلو زاتو يخوف ......قالت ليهو عايزاك تعمل لي عمل ........حق شنو و لي منو و انا تدفعي لي بالدهب ما بقبل قروش ........دهب كيف يعني .......يعني تديني قويشة خاتم سلسل دهب ........ايوااا بس انا ما شايلة معاي اي دهب بس بجيبو ليك ......خلاص كويس......حكت ليهو عن الحصل ليها و راجلها عرس فيها و قالت ليهو.......عايزة ارجعو و يبقى خاتم في اصبعي و لو ظبطت لي الموضوع دا عندي في راسي ناس كتار عايزة اعمل ليهم حاجات يعني حنستفيد من بعض كتير ........الراجل ضحك و عاين ليها من فوق لي تحت ، وفرح جدا و قال ليها خلاص بجهزو ليك بس عايز اطلب منك طلب ........اها شنو ......عشان العمل يمشي تجيبي صقر و جدادة ........الجدادة هينة لكن صقر دا اجيبو من وين ........ما بعرف انتي بس تنفذي عشان موضوعك يظبط .......خلاص كويس بجيبهم ليك .......
طلعت فاتن و هي تتلفت عشان مافي زول يشوفها .......وصلت البيت و بقت تفكر تجيب صقر من وين و تقبضو كيف........مشت كلمت ليها ولد في السوق قالت ليهو دايرة لي صقر .......صقر ؟؟ بس دا ماببعيهو مع الجداد......نحن هنا بس عندنا جداد و بط و وز و هكذا .......بس انا عايزة صقر ضروري القاهو وين .......قلت ليك ما بتلقيهو ......خلاص عندي ليك فكرة انت اقبضو و انا بكرة بجي و بدفع ليك حقو تمن خمسة جدادات........الولد عاين و صنقع و دنقر و قال ليها نشوف خلاص ......
مشت منو و جات اليوم التاني و سالت منو و لقتو فعلا قبض ليها صقر عديل و كبير كمان .......فاتن دي فرحت شديد ادتو القروش و شالت معاهو الجدادة ختتو في شوال خيش لانو خافت منو يجرحها ولا يعمل ليها حاجة مع انو خشمو الولد رابطو و كرعيهو .....و الجدادة في كرتونة ......
فاتن طوالي جرت للراجل لقتو قاعد .......جابت الصقر و الجدادة هديل اها تأني جبت ليك قويشة .......خلاص تمام يلا امشي الحوش البي جاي دا ادفني الصقر و الجدادة ديل .......بسم الله الرحمن الرحيم ادفنهم كيف ........الراجل قعد يصرخ فيها ادفنيهم قلت ليك بتلقي الحفر جاهرة بس انتي ادفنيهم .......فاتن من الخوف بقت ترجف و مشت فعلا الحوش فاضي عامل زي المقابر مدفونات فيهو حاجات ........مشت لقت ليها حفر فاتحة ختتهم في حفرة و هالت عليهم التراب و جات جارية ........خلاص خلاص دفنتهم ....... اداها ظرف صغير ملفوف زي ورقة التسالي فيهو حاجة كدا زي (دقة الدوم) ........اها اعملو في شنو دا .......اولا تكبي فيهو مويتك ..........فاتن بقت مستغربة ؟ مويتي ياتا دي يا شيخ ........ما عرفتيها موية المراة الواحدة دي ........اجي دي اجيبها من وين .......شرح ليها القصة ..........فاتن اتخلعت و ما فهمت ......مويتي ياتا دي ما فهمتك يا شيخ .......انتي مراة هبلة ما بتعرفي الموية دي شنو. دي موية (.......).....
يتبع....
