...فدوى اتصدمت و بقت تعاين ليها ........بسم الله دا كلام شنو ؟ قصدك شنو يا فاتن .......قصدي انتي فاهماهو كويس سالم ما بجيب اطفال ........منو القال ليك الكلام دا ........انتي موش كلمتي امي ......فدوى اتصدمت كيف امها تطلع اسرارها و بقى وشها متجهم و ما طايقة تقعد في البيت ........يا زولة انا اختك مالك اتضايقتي اني عرفت و عايزة مصلحتك و الله سالم دا ولا بنفعك ولا حاجة الاطفال اهم شئ ........ما ليك بي دخل انا مبسوطة مع راجلي حتى لو ما جبنا اطفال و بعدين سالم حاليا بقى كويس و اتعالج الحمدلله ........ها الغبية دي على منو الكلام دا والله دا لو كان انتي السبب كان عرس فيك طوالي ولا بنتظر ولا ثانية عايزة تصبري عليهو لي شنو و لي متين انتي عندك وقت محدد و بتقطعي ........فاتن قلت ليك ما عندك بي دخل خليني في حالي و ما تدخلي في موضوع زي دا و انا ادري بالموضوع دا ........انتي اختي و انا عايزة مصلحتك فاخير ليك تطلقي من اسي قبل فوات الاوان .......فدوى قامت من قدامها و دخلت جوة و بقت مبوزة بس و ما عايزة تتكلم مع اي زول حتى الونسة مع امها خلتها و شايفة امها دي قدر السمسمة عشان افشت سرها ........
.فدوى الصباح نادت سالم قالت ليهو ارح نرجع البيت ........ليه مستعجلة ما كنتي شابكاني مشتاقة لي امي و اهلي و قلتي إلا تقعدي معاهم كم يوم ........سالم انا زهجانة حاسة نفسي والله و بعدين عايزة ارجع لي شغلي ........شغلك دا انا مديرك فيهو يعني ما تشيلي همو .......برضو عايزين ننجز البيت سريع .......يا ستي خلاص لملمي الحاجات و بكرة من الصباح نمشي .......فدوى قالت ليهو اليوم ما ممكن ....... للدرجة دي مستعجلة ؟ .......خلاص خليها بكرة ما مشكلة ........مشت فدوى و بدات فعلا تلملم حاجاتها و بقت حاسة البيت ضيق و ما طايقاهو .......
.فاتن حاولت باي طريقة تلقى فرصة في سالم و بقت بس مراقباهو .........بس سالم بالمساء كدا جا للزير عايز يشرب موية و سامعة ابوها بي غادي معاهو ضيوف بتونس و اتلفتت لقت امها و فدوى بعملو في العشاء ......جرت عليهو سريع عملت كانها عايزة كمان تشرب موية .........كيفك يا سالم أن شاء الله مبسوط.......و الله الحمدلله في نعمة ........ربنا يديمها .......اللهم امين ......عايزة اتكلم معاك في موضوع .........اتفضلي ........و الله فدوى اختي بتحب الاطفال شديد اسي ما شايفها بتتعامل مع ولدي دا كيف زي ولدها وواحد .......اي صاح كلامك والله فدوى حنونة و دا الجزبني ليها .........قصدي ليك يعني نفسها هي كمان تجيب اطفال بس قالت انو عندك (.....) .......سالم قرب يغمى عليهو من الصدمة .........فانا شايفة انكم مفروض يعني تحلو المشكلة دي بي اسرع وقت و صراحة حسيت فدوى متضايقة لانها جات شكت لينا .......سالم دا تاني ولا كلمة ما قالها لانو حس الدنيا مدورة بيهو و رجلينو ما ثابتات في الارض و مستغرب جدا من موقف فاتن و كمان بكل جرأة تقول ليهو الكلام دا .........والله يا سالم انت زي اخوي و فدوى كمان اختي اسي لو كان فدوى الفيها المشكلة كان حتعرس عليها في لحظتها ......سالم اساسا بقى ما سامع ولا شايف حاجة بس واقف زي الخشبة .......
..فاتن مشت من قدامو قالت شنو ما معروف بس هو مشى بي غادي ........ما قدر يدخل يتونس مع الناس ولا قادر يفكر راسو شطب كلو كلو ........بقى زعلان و مغبون شديد قرب يبكي من الضيق و بقى يقول يعني فدوى بتعيرني بي مرضي ........و كمان كلمت اهلها ......كنت فاكرها شريكة بالجد و سند للحياة الكلها شقا .......اليوم داك سالم عشي ما اتعشي و الليل كلو ما نام .......الصباح بدري فدوى لمت حاجاتها كلها و بقت تسرح في شعرها و تلبس بعد شوية ابوها ناداها قال ليها سالم دا قال ليك تعالي ........قالت ليهو دقائق يا ابوي قربت اخلص بلبس انا .......فاتن تعاين ليها ساي و تشرب في الشاي ........ابوها قال ليها يابت انا بنادي فيك من متين الزول دا منتظرك برة ّ........فدوى يا ابوي عارفة دقيقة البس بس ........لفحت توبها سريع ومرقت شنطتها برة و قالت لي ابوها طيب خليهو يجي يشيل الشنطة .......مشت لي سالم معاها ابوها ........ابوها قال ليهو دي فدوى مالك عايزني مع فدوى في شنو .......قبل على فدوى قال ليها يا فدوى انتي طالق
يتبع....
