..الزين اتخلع قال ليهو بسم الله في شنو يا سالم مالك .......فدوى قلبها بدى يدق شديد و حست الدنيا غريبة و ما فاهمة حاجة ........يا ولدي ما تتكلم هو الطلاق دا ساي كدا بس بدون اسباب .........فدوى نفسها قام و هي بتعاين لي سالم بي غرابة كانها ما بتعرفو و ما قادرة تنطق بي كلمة ..ّّّ..ّ....يا حاج مافي نصيب بينا و زي ما دخلنا بالمعروف نخرج بالمعروف و انا اسبابي خاصة بي انا ما بقدر احكيها لي زول ........فدوى وقعت من طولها و الزين رفعها و حاول يفوقها .......سالم قلبو عليها بس حس انها يمكن بتمثل عشان تستجدي عواطفو و قال ليهم عن اذنكم يا عمي مع السلامة ّّّّّ...........دقيقة بس يا ولدي مرتك نشوف مالها ........ما خلاص بقت ما مرتي .........
سالم طلع و الطريق كلو دموعو يرقرقو و يبلع فيهم عشان ما ينزلو .........فدوى ابوها قدر ما حاول يفوقها ما قدر ........جرى لي فاتن و حليمة و كورك ليهم جو جاريات و رفعو فدوى و بالبصل و الريحة و الموية فاقت و بقت تبكي ........امها بقت ماسكاها و تقول ليها .......سحروكم كر على عين السواد دي حسبي الله ونعم الوكيل بناتي الاتنين اتطلقو و بقت تبكي معاها .......انا عملت ليهو شنو بس والله ما عندنا مشاكل مع بعض والله عايشين سمن على عسل ......يا بتي راجلك دا هو راجل عشان تبكي عليهو اثبت انو فعلا ما راجل الواطي .......امي اسكتي ما تقولي كدا حرام عليك سالم اتعالج بقى كويس ليه بتقولي كدا كلو منك انتي دي . ........امها اتخلعت.......بسم الله الرحمن الرحيم يا بتي مالك ........ايوة يمة انتي نشرتي الخبر دا تلقي كلمتي الحلة كلها ولا يمكن سمعتيهو كلمة كدا ولا كدا .......امها اتخلعت و فاتن تعاين من بعيد و الفرحة ما سايعاها كان ليها مراد تزغرد .........والله يا بتي ما سمعتو كلمة و كلامك القلتيهو لي ما قلتو ولاا لي ابوك ولا حتى لي فاتن .......كلمتيهم والله كلمتي فاتن ........والله يا فدوى ما كلمت زول كيف يعني اقول لي زول سر خطير زي دا و انتي بتي في ام بتخرب بيت بتها .......انتي خربتيهو و فاتن الحاقدة دي امس طاعنتنا بالكلام .......حليمة التفتت علي فاتن ......يابت انتي جبتي الكلام دا من وين .......فاتن اتخلعت .......مالو يعني انا ما اختها برضو ........الكلمك منو قلت ليك .......سمعتكم انتو بتتكلمو .......حسبي الله ونعم الوكيل فيك كيف تخربي بيت اختك بالشكل دا .......انا خربتو ؟ براهو مخروب .......يابت تتطاعني بالكلام عشان يتحسس و يطلقها يا متخلفة.......حليمة وقعت في فاتن ضرب .......انتي حسادتك و حقادتك دي ما بتخليها تصل لي انك تحسدي اختك .......ما زي حسادتك جايباها من وين انا .......امها بقت تكفت فيها كمان بتردي يا عواليق تردي على انا .......
.بعد هداو شوية فدوى قفلت نفسها في غرفتها و بقت ما بتطلع نهائيا ........فاتن شمتانة و مبسوطة للاخر .......اما حليمة بقت تفكر ليه بحصل لي بناتها كدا معقول يكون دا عقاب ........بدات تستغفر و تراجع روحها شمتت في اي مراة اتطلقت ولا عرسو فيها ، و شمتت حسدت حتى اخواتها و فعلا فاتن طالعة ليها بالتفاصيل بس حليمة ما كانت كعبة زي فاتن .......بتحسد بس ما حصل ضرت زول بيدها، ما حصل حاولت تخرب بيت زول بس كانت بتتمني خرابهم ........بدات تبكي براها وجع بناتها و خاصة فدوى الخربت بيتها اختها فاتن ........استغفرت و بقت تقول يارب تغفر لي يارب عاقبني باي شي الا بناتي يارب ما يجي في بناتي استغفر الله العظيم اي شي ان شاء الله يبقى لي بالمرض لكن ما يجي في بناتي ياااارب و الزين كان عرس الليعرس و كان طلق الاطلق .......يااارب .....
..حليمة شالت ليها كباية عصير و مشت لي فدوى في غرفتها .......يمة قومي اشربي العصير ما اكلتي من الصباح ........ما عايزة يا امي خلوني براي .......حتقعدي كدا لي متين .......انا متضايقة مخنوقة خلوني عليكم الله و بدات فدوى تبكي بكا حار ........حليمة برضو بقت تبكي والله انا موجوعة اكتر منك على الحصل دا ........ماف زول موجوع زي انا خلوني عليكم الله ........حليمة مرقت برة قعدت برضو لا اكل لا شراب ما بتقدر تاكل و بتها بالحال دا ........سالم مشى البيت الببنو فيهو سوا هو و فدوى .......قعد في الارض يبكي زي الشافع .....
يتبع....
