احبائي اقص لكم احداث واقعة بل مأساة حقيقية غريبه بمعنى الكلمه حدثت في بغداد ،وتحديدا في العام 1999.
الشهوة المحرمه #1
# ليوثي المياحي
على لسان راويتها الست صفيه
جنت مثل اي بنيه من تخطي عمر ال15سنه تكوم تحلم بالشاب اللي راح ياخذهه على الفرس اﻻبيض وينهزم بيهه ويحبهه وتحبه مثل منشوفهه بالافلام والمسلسلات ، بس من نجي للواقع يتبخر كلشي ﻻيضل الفارس وﻻ فرسه اﻻبيض امي ماتت كبل خمس سنين ماتت ولليوم ما اعرف شلون ماتت وما اكدر اسأل ابوية ليش وشلون ﻻن اشبع كتل اذا حجيت فظليت ساكته اختي الزغيرة سعديه كلش حلوة بعد شهرين يصير عمرهه اثنعش سنه عيونهه كبار وسوووود حيل وجهه مدور طالعه ع امي كلش حلوة . ابوية تزوج بعد ما ماتت امي بسنتين ومجان هلكد مهتملنه ﻻ اني وﻻ اختي وحتى ما اخذ رأينه من راح وتزوج فضيله ،
زوجت ابوية فضيله جانت مكروهه ما تلكه فرصه اﻻ وتبهذلنه وتشتم بينه اني جنت استحمل بس اختي سعديه خطيه بعدهه زغيرة ع الشغل ماخﻻهه ابويه تكمل مدرسه جانت بصف الخامس ابتدائي وبطلهه ع انو البنيه لبيتهه ورجلهه ،جنت اترزل يومية ع اي شغله اسويهه اذا زينه او مو زينه، وما فد يوم سمعت حجايه حلوة من فضيله برغم اني اللي اكوم بشغل البيت كلة غسل وطبخ وتنضيف ومﻻبس وكلشي براسي .
ابوية جان ميخلينه نطلع من البيت و المسواك جان لو هوة يجيبه لو زوجته فضيله .
بقيت صابرة ﻻن مابيدي شي اسويه ،صار عمري بالعشرين وكمت احلم يومية بالفارس ابو فرس الابيض اللي راح ياخذني ويخلصني من ظيم ابوية وقهر وعذاب فضيله .
فد يوم العصر كاعدين بالهول دنباوع ع التلفزيون جانت طالعه مسلسله هواي احبهه اندك الباب مالتنه ابوي صاح منو بالباب رد عليه رجال صوته خشن خطار ... خطار .. ابويه صاح صفيه وج كومي رتبي الاستقبال وطفي التلفزيون ﻻ اجي اكسرة على راسج وراس الخلفج، دا اشوف منو اللي بالباب طفيت التلفزون ورحت اركض ارتب بالاستقبال ﻻن اذا بقيت شوية وما كمت راح احصل كتله غسل ولبس مثل ما يكولون. فتح ابوية الباب شاف حجي وياه خمس رياجيل بالباب الحجي كاله السﻻم عليكم ابو صفيه ردلة ابوية وعليكم السﻻم اتفضلو شرايدين ،كاله ياابو صفيه شلون نحجي بالباب واحنه واكفين شنو مضيفون انتو،ردله ابوية ﻻ العفو حجي اتفضلوو ؟طلعت اركض من الاستقبال ولمحت ست زلم واكو واحد بيهم ﻻبس قاط اسود وشعرة خفيف وريحته كلش قوية من طلعت من الاستقبال ظل بس يباوع عليه ،ما ركزت زين بخلقته حسيت وجهه مثل الخيال ،كلت هذا شبي بس يباوع اوي مدري شلونه ،رحت كعدت بالهول ،زوجة ابوية كالتلي وج صفيه امشي اخذي اختج ولغرفتجن ﻻ اطيح حظجن وراحت خلت اذنهه يم باب اﻻستقبال،دا تسمع شدا يحجون ،الحجي كال ابو صفيه احنه سألنه عليكم وعرفنه انو انتو خوش ناس ومدحونه بيكم هواي وناس مستورين واحنه جينه اليوم رايدين نخطب بنتكم صفية اﻻبنه حميد وهوة خوش زلمه شاغول وابو بيت ويقدر العشرة ، ابوية كال كل الهﻻ بيكم وبحميد بس انطونا مجال حتى نفكر ونسأل عليكم وناخذ هماتين رأي البنية تقبل متقبل ،الحجي كال هذا من حقك ابو صفية ،طلع ابوية من الاستقبال كال الزوجته سوونه جاي صاحت عليه وج صفيه يمعزاية كومي سوي جاي ﻻن يمكن ذولة جايين خطابه عليج ، من سمعت كيفت بداخلي معقولة راح يجي اللي يخلصني من هل ظيم والقهر رحت اركض ع المطبخ وخليت القوري ع النار واني ممصدكة شلون اخاف ابوية ميوافق ﻻ..ﻻ..ﻻ.. يوافق اصﻻ هوة ما مهتم بينه واكثر من مرة يكول عساجن بكلعه تكلعجن واخلص منجن ،خل اودي الجاي ﻻ انوب احصلي حجاية كدامهم ، اخذت فضيله صينية الجاي ودكت باب الاستقبال وانطتهه اﻻبوية ،
ابوية من دخل بصينية الجاي كام ذاك ابو القاط وكله جيب عمي اني اشيلهه وانته ارتاح ،
ابويه كاللهم ميصير خاطركم اله طيب انطونه عطوة جم يوم ونردلكم خبر ،طلعو الزلم من البيت وابوية ما جابلنه اي طاري ع السالف واحنه مابينه نساله شنو الموظوع اني كمت اتكرظم اريد بس اعرف شسوة وكل ما اريد احجي اخاف .
فد يوم كلت خل اسأله حتى لو يحجي علي واحنه كاعدين بالهول كتله بابه شعدهم هذولة الزلم جوي كبل كم يوم راسا كالي وسم شكو شبيج اكوم اكسرة الراسج تكسر ادبسس اني سكتت وما حجيت
فضيله كالت شبيك عيني ابو صفيه اول مرة احس زوجه ابوي فضيله بصوتهه حنيه شكو بيهه ﻻزم تعرف صفيه بالموظوع عيني صفيه اسمعي ذولة جايين خطابة عليج رايدينج اﻻبنهم حميد وابوج راح وسال عنه كالولة خوش رجال وعندة بيت وسيارة كوستر يشتغل بيهه وابوج وافق عليه فحضري نفسج ، بيني وبين نفسي ما راضيه ﻻن شفته ذاك ابو القاط اﻻسود احسه ما ادري شلونه ما دخل كلبي كلت هاي هيه هوة هذا قسمتي اذا قبلت اوﻻ هو اني اكدر اكول ﻻ غير راسي يتكسر ،المهم كامو يحضرون للعرس كملنه كلشي من غراض ومستلزمات للعرس ولو كلهن جانن بسيطات واني مجان يصير اعترض عليهن اذا عجبني اوﻻ وحتى حميد ما شفته ﻻن ابويه مايقبل ، يكول من تتزوجه راح تشبع منه
تمت الخطوبة وازوجت بدون ما اطلع وياه او اشوفه او احجي وياه المهم زوجي طلع اسمه عبد الحميد ويدلعوه يكولولهه حميد (يمه حميد يمه) تم الزواج مثل اي زواج تقليدي صحيح جنت ﻻبسه بدله بيضه بس وﻻ حسيت اني عروسه ﻻن زوجي ما اعرفه وﻻ شايفته وﻻ اعرف اطباعه شيحب شيكره حتى اكدر اسايره واعيش وياه بس بكلبي كلت مهما يكون احسن من العيشه اللي عايشتهه بيت ابوية وزوجته،
اجه حميد وهوسه وراه وكلهه تصيح شايف خير ومستاهلهه وحميد طفي الكلوب خدهه يشع وية الروب وجبنالك برنو .....الخ كعد حميد بصفي وريحته كلش قوية شكته الخشمي عبالك يريد يغطي بيهه ع ريحه ثانيه باوعت ع اختي سعديه خطية عيونهه مغوركة بالدموع شلون راح اتدبرهه وية فضيله وخطية هيه كلش ترفه وما تستحمل اهانه ورزايل وشغل اويلي عليج سعودة شراح يصير بيج ،كام حميد ولزم ايدي وظغط عليهه قوي وكومني من الكرسي وشبك ايدي وية ايدة ومشاني اخذني من بيتنه وجان جايب سيارة هاي اللي يسمونهه اولدز موبيل ما ادري من وين طالبهه صعدني وياه ليورة بالسيارة ومشت السيارة و طبعا سيارته الكوستر ماليهه نسوان وجهال ومخلي ابن اخوه يسوق بيهه لما وصلنه البيت اللي راح يكون بيتي وكفت السيارة بالباب ونزل ونزلني وياه اشو حسيت حميد مدري شبيه من يمشي يتمايل وكل ساع يريد يوكع واجلب بيه
دخلنه للبييت كالي روحي للغرفة
اروح للحمام واجي رحت للغرفة دخلت وكعدت ع السرير اتاني يجي ﻻن جنت كلش مستحيه وخايفة واتاني بيه ربع ساعه ياله اجه خفت منه ﻻن حسيته مثل الوحش دفر الباب ودخل جان سكران وبلا ما يحجي وياي نزع البركع مالتي ونام فوكاي جانت ريحه العرك تفوح منه وبرغم ما جان مخلي ريحه قوية كلش هاي اللي يسمونهه كرزة حتى ما نزع البدله مالتي كمل شغلته ونام وعافني بداخلي كلت اخاف بس بالبداية ﻻن فرحان ومزوج خل اصبر عليه شويه واشوف واعرف طبايعه
بقينه شهر عرسان هوة زين وياي بس ما احس يحبني ﻻن قبل شغلته تلكاه كلش زين بس من تخلص الشغله ينكلب غير شي واكو شغلة مو حلوة بيه جان يسكر يومية ويريد مني اني احضرله المزة وفوكاهه كام كل ليله يجيب اصحابه يمنه بالبيت واني احضرلهم الكعدة من مزة وشرب ،
صار تلث تشهر على زواجنه وكرهت العيشة وياه بس شاسوي كلت اصبر بلكي يتغير فد يوم كالي لج صفيه كومي سويلي كعدة كتله عيني حميد احس نفسي تعبانه اليوم ومابيه حيل اليوم ﻻ تشرب كام وركع راسي بالحايط واغمة عليه اجاني يركض وج صفيه شبيج بس راد يكعدني ماكدر راح يركض عبيت جيرانه وبسيارتهم المارسدس شالوني او ودوني للمستشفى وسوولي تحاليل وكعدت وردتلي واعيتي جان راسي مخيط ولافيه بشاش
اجه الدكتور وجان حميد واكف يم راسي كال الدكتور لحميد شنو اللي صار كال حميد دكتور نزلت من الدرج واغمه عليهه ولطخ راسهه بالحايط ،الدكتور كاله دير بالك عليهه ﻻن مرتك حامل ،ضل صافن حميد باوعت عليه ردت اشوفه مكيف ﻻ بس ما بين عليه عقد حاجبه وكله دكتور اكدر اطلعهه هسه الدكتور كاله اي بس خل اكتبلك ادوية اخذهه الهه من الصيدليه طلعنه رحنه للبيت ومشت الايام مصبرة نفسي يومية احضر الميز لحميد وربعه .
اجه موعد الوﻻدة وجبت ابنيه وجان واكف فوك راسي شال البنيه ويحظن بيهه ويبوسهه كلت يا الله مبين مكيف بيهه بلكي هل بنيه اتغير احواله ويصير عنده مسؤؤليه ويترك سوالفهه المكسرة،
صار عمر البنيه سنه جان ابوهه يﻻعبهه وكان يتلمس بصدرهه وبجسمهه واحسه يتلذذ بيه جنت اكول يمكن حنان الابوة ،يبوو يصفيه شلون يخطر ابالج هيج شغﻻت ﻻ . ﻻ. ﻻ مستحيل مهما كان حميد مو خوش ادمي بس يبقى ابوهه....وللمأساة بقيه
لمشاهدة الرواية على اليوتيوب بالصوت والصورة : ارجو دعمكم لايك واشتراك بالقناة
اخوكم ليوثي المياحي
