{الشهوة المحرمه }
#2#
ليوثي المياحي
حضنت فريال ونمت. ضليت ع هالحال سنه شفت الظيم والمرار ويه حميد نوبات اكول خل انهزم وروح يم مرت ابوي احسن من هل ذل والمرار بس ارجع واكول خل اصبر ،ﻻن مرت ابوية مرة كالتلي ﻻتفكرين ترجعين للبيت ،ترة احودج حودة الجﻻب ، اووووف شلون بيه شاسوي حتى اخلص من كل هل العذاب الله ما ياخذني وارتاح ،وارجع واكول شنو ذنب هاي البنيه المسكينه ، وشلون راح اتعيش ويه هيج ابو ضالم ﻻ يحس بالمسؤؤليه همه يشرب ويتونس وبس ، وحتى كمت اكره شي اسمه الليل ﻻن كل المصايب تجي ويه هل ليل الاكشر، يولي كومي حضري الكعدة احسلج كبل ما يجي ويسوي ليلج عزة ،كمت حضرت الميز والبطاله مالت العرك والكﻻص واني دا حضر هذا اللي يسمونه جاجيك روبة وخيار وملح وثوم حسيت معدتي دا تكلب ورحت ركض للحمام وذبيت من راسي ، وج عزة صفيه هاي انتي بس ﻻ حامل ،يبووو هاي شلون مصيبه ،دك الهورن مال سيارة حميد رحت اركض ع الباب فتحته اله ،واني وجهي صاير كركم اصفر اول مشافني كالي انكسرت ايدج صار ساعه ادك بالباب وين جنتي من عبتلج هل وجه جنه وجه الغراب ، ماحجيت وياه كعد شوية واني رحت ع المطبخ اكمل العشه والمزة ، خل اكله اريد اروح احلل يمكن اني حامل ،عيني حميد باجر اريد اروح للمستشفى ،وجان يزكح بيه وشبيج عرج ما يطكج شنو شبيج ،دوكف يرجال خل افهمك ،كالي احجي شبيج وﻻ ادوخيني ،يمكن اني حامل واريد اروح احلل حتى اتاكد ،كال ها اي اذا هيج ميخالف روحي ،اول مرة اشوفه ميمنعني كالي بس عود جيبي اختج يمج خل اتساعدج ﻻن تعرفين اني بليه الشرب ما اكدر فمنو يكوم يحضرلي الميز ،كتله عيني حميد منا لما بطني تكبر الله كريم هاي عود منو يكول اطلع حامل ،حضرتله العشة والميز ورحت نمت .
الصبح رحت للمستشفى وحللت وطلعت حامل رجعت للبيت واني بين المكيفه وبين الحزنانه وبداخلي جنت اتمنه ولد حتى باجر من يكبر يعيني ﻻن ما اترجه شي من حميد وهوة مدمن ع العرك رجعت للبيت وتانيته يجي حتى اكله ، اجه حميد ودك هورن ورحت اركض فتحت الباب ودخل السيارة كتله الله يساعدك ابو فريال ، رد علي وكالي هلو حضرتي الغدة كتله اي عيني خمس دقايق ويكون حاضر ،كلت هسة يسالني ها شسويتي ما سويتي وﻻ سئل وﻻ كال حضرت الغده وكعدنه اني وياه وفريال نتغدة اخاف اكلة ويروح يكفخني وفريال كاعدة وما اريد اخليهه اتشوف ابوهه يضرب امهه ﻻن جانت متعلقة بيه كلش هواي ، كام يﻻعب فريال ويضحك وياهه كلت اي هاي فرصه خل اكله ،فريال راح يكون عدهه اخت لو اخو ،سكت وباوع عليه وطبك حواجبه كلت الله اليستر صفن شوية وباوع ع فريال وكاللهه بعد شتردين راح تجيج اخت تلعبين وياهه ارتاحيت شفته يضحك الحمد لله كلت ويجوز ولد جان يزكح بيه ويصرخ بوجهي كلت ابنيه يعني بنيه ولزم صينيه الاكل وكلبهه وكام يخيط ويخربط بالحجي فريال طكت من البجي وكام ركب سيارته وطلع ،بالليل اجاني تعبان وكالي ماريد عشه حضريلي الميز واريدج اليوم تركصيلي ،كتله حميد عيني ويني وين الركص اني حامل نسيت شنو كال واذا حامل تركصين يعني تركصين ﻻ اجي اكسر راسج رحت حضرت العرك والمزة وخليتهن عل ميز ورحت كلت ايجوز يشاقه ولو هوة يعرف يشاقه شرب وصار فول صاح عليه صفيه تعاي كلت يالله هذا شلون وياه وك اجاب الركص ع باللك هسة رحت عليه ها حميد كال زين اذا ما يعجبج تركصين جيبيلي اختج تركصلي ،عزه هذا شذكرة باختي من هيج يكول خل اختج تجي اتساعدج كتله ﻻعيني اني اركصلك شديت الوصله وكمت اتمايل يمنه ويسرة وهوة يطك باصابيعه ويدردم هله ...هلهه.كام جرني من ايدي وللغرفه واخذ اللي يريدة ونام .
كضت الثمن تشهر بالضيم والقهر الى ان جا موعد الوﻻدة وجبت بنيه كلت همزين بنيه ﻻن هوة جان يريدهه بنيه ولو اني جنت اريد ولد بس اشيجي من الله نعمه شالهه بيدة ويبوس بيهه كال هاي اسميهه ليلى ع اسم صاحبتي القديمه ،هاي اول مرة اسمع عندة صاحبه اسمهه ليلي ومن كبر لفهه شافت بيه وحبته ،رجعنه للبيت ، ونفس الرنه والطحين الناعم مشت الايام وفديوم كتله ابو فريال خلي انروح لبيت اهلي من زمان ماشايفه ابوية واختي ،صفن شوية وكال ميخالف اليوم انروح نتغدة يمهم ، كعدت سبحت الجهال وبدلتلهم واتحضرنه صارت الساعه بهدعش ودك هورن السيارة اخذت جهالي ولبست العبايه وصعدت بالسيارة مشت السيارة وهوة يدندن وية نفسة وجان مشغل اغنيه مالت هذا المطرب سعدي وصلنه البيت اهلي ونزلنه دكيت الباب طلع ابوية هله بيكم تعالو طبو ركضت ع ايد ابوية وبستهه وﻻ باوع عليه وﻻ ع جهالي وحتى فريال جانت طالعه كلش حلوة ولو مﻻبسهه مو هلكد حلوات بس شاسوي ما عندي غيرهن حتى اني دشداشتي وعبايتي جانت كلش قديمه خوب العبايه صاير لونهه احمر هلكد ما عتتيكه طب حميد وسلم ع ابوية وكعد بالصاله اجتي فضيله ورافعه خشمهه عليه رحت عليهه حتى ابوس ايدهه كالت اوي شني هل ريحه دومج وصخه وجايفه ،استحيت من نفسي ورجعت سعديه من سمعت صوتي جتي تركض هلة صفاوي وحضنتني وتبوس بيه وشبكتني وتبجي كتلهه تعاي للمطبخ انسوي جاي رحنه للمطبخ وحضنتهه وبجينه سوة كتلهه شلونج سعودة كالت يمعودة اتزوجتي وخلصتي فضيله الله ﻻ يهنيهه شمسويه بيه خدامه مخليتني اللهه وفوكاهه كل يوم اتجذب ع ابويه وطلع سوالف جذب وابويه تدرينه ميقصر وياي بالكتل انتي شلونج اني جريت حسرة وتنهيدة زينه ماشيه كلت فوك همهه وضيمهه انوب احملهه ضيمي كلت خل اغير الموظوع كلتلهه ولج سعودة محلوة شطالعه اتخبلين ولو ضعفانه شوية سود وجي عليج ، صاح ابوية وين الجاي ، شالت سعدية الصينيه مالت الجاي وراحت ودتهه للصاله اني غسلت وجهي وطلعت وراهه كعدنه انسولف سعديه اتﻻعب بالجهال وفضيله تتمضحك وية حميد وابوية كاعد يباوع ع التلفزيون حميد اباوع عليه ظل يباوع على اختي ونظراته غريبه وهيه جانت اتباوع وخايفة منه يمكن متحرش بيهه وتستحي اتكلي واني جنت اكللهه تعاي يمي تخاف تكلي ﻻعيني ما اجي ،خفت ع اختي منه وكلت بعد ما اروح لهلي ....وللمأساة بقيه
