البارت الثالث .
.
✍روز علي .
.
نور . من حجه هيج رفعت راسي وباوعت بعيونه ركزت بيهه . بقينه واحد بعين الثاني شكد تمنيت اشوف نفسي بعيونه بس مشفت شي . وخرت عيني واخذت نفس عميق وخليت الهيتفون بأذني وتجاهلت وجودة صح تصرفي مو صح بس مكدرت لحظتهه اسمع حتى صوته . كان ودي اعيط عليه واصيح واطلع حركه قلبي بي . . اجه ابويه يم السياره وصار يحجي ويا صعدت امي ورجع ابويه صعد وشغل السيارة ورجعنه للبيت كان يوم موجع بالنسبه الي طبيت للغرفه بدون ما احجي شي بدلت ونمت
مرت الايام والشهور ورجعت للروتين اليومي . من البيت للنادي (الجيم) . والعكس . الى ان بيوم كاعده بالصاله . اني وبابا .خابر عمي ابو مصطفى على ابويه .
وكله
ياريتك تحجي ويه مصطفى يريد يفصخ الخطوبه .والله شنو متلبس عبايه . ابويه كله ان شاء الله اخابره واتفاهم ويا ..
من سمعت يريد يفصخ صراحه صارت فرحه بداخلي . الى ان وره اسبوع سمعت مصطفى فصخ الخطوبه . بيومه كأنما عندي عرس . طبيت الغرفتي وركصت وطلعت فرحتي كلهه . .
.
مصطفى .
وره خطوبتي بأسبوع بدت المشاكل بيني وبينهه .كنت احس البنيه اصلا ممقتنعه بيه وع اتفه الاسباب تتعارك . وخلال فتره خطوبتي كل منريد نطلع تطلعلي بالبنطرون ومن اكلهه ع العبايه تزعل وتبطل . ومنطلع الي فهمته منهه هي عمرهه ملبست عبايه وبهيج حالة اني ما اكدر اجبرهه . اني اريدهه من الاول لابسه عبايه حتى مو اني اجبرهه ع شي هي ممقتنعه بي . ولا تريده . كلت احاول اقنعهه الى ان بيوم خابرتني تريد فلوس تروح التركيا ويه اهلهه طبعا اني تخبلت ومنعتهه من منعتهه صارت تتجاوز . بهالحالة اني خيرتهه كتلهه يا اني يا تركيا جاوبتني اختار تركيا . كتلهه خلص يا بنت الناس من هاللحظه اني بطريق وانتي بطريق . وتم الانفصال . اتخبل من هيج بنيه عناديه وعين صلفه . رجعت اعزب مثل قبل وابقه ادور بلكت الكه بنت الحلال الي اريدهه .
.
نور .
اجانه شهر عاشور . فبما انه احنه الوحيدين بالكاظميه . فكل سنه عمامي وعماتي يبقون يمنه . لكن بهذه السنين كلهه بيت عمي ابو مصطفى ميجون . لانه كانو زعلانين فأكيد.هالسنه راح يجون . اول ٤ ايام محد اجه بيوم الخامس كعدت تقريب ساعه ٨. طبيت غسلت ولبست تراك اسود . رفعت شعري بكماشه و نزلت لكيتهم كلهم موجودين وملتمين . وبيتنه صار خبصه ولمه حلوه . بس بيت عمي ابو مصطفى ماكو سلمت وكعدت اسولف ويه ولد عمي الكبير وكلهم متزوجين كاعدين همه ونسوانهم . اشاقه واضحك وياهم . واصغر واحد بيهم مهند تقدملي مرتين . وكل مره اني ارفض لان قلبي ميهوى غير الي يحبه واني مكنت اشوف غيره زوج الي . مرته تعرف هو تقدملي مرتين لذلك كلش تغار مني . بس تحاول تسيطر على نفسهه من تشوفني تحظن وتبوس بمهند عبالهه اني بالي يمه . بقينه نضحك ونسولف وبدو يسألوني ع الجيم والتدريبات .
.
رائد . (ابن عمي الكبير ) . نور دكومي علمينه كم حركه .
.
نور . بربك رائد شنو فايده اعلمك وانت متطبقهن .
.
رائد . لا اطبقهن . .
.
قيصر . (اخو رائد) . وهذا كرشك وين تودي . بابا احنه مال هبيط وثريد مو مال تدريباات .
.
رائد . ولج علمينه ملاكمه .
.
نور . ماشي راح اعلمك اول الحركات .
كمت وكفت صار ضهري بأتجاه مهند وبديت اسوي بالحركات مشفت غير القراصه نجرت من شعري ونزل ع طوله . شعري طويل تقريبا يوصل جوه الورك فمن شافو تخبلو التفت لكيت مصطفى واكف باب الاستقبال ويباوع عليه بخزرة .
