البارت الخامس .
.
✍ روز علي .
.
صرت احس الكل .تعرف انه اني احبه وهو متجاهلني هذا الشعور بتواجدهم يقتلني لذلك صرت اتجنب كعداتهم . لكن كلماته بقت مثل الغصه داخل روحي . يمكن صح هو ميعرف اني احبه . بس كان ع الاقل ميكلي اريدهه مثلج وتشبهج . رجعت من النادي ساعه ٨ . طبيت للبيت سبحت ونزلت اسوي اكل واساعد امي شويه .
.
هلو ماما .
.
ام نور . هلو حبيبتي تعاي كعدي اريد احجي وياج شويه .
.
نور . اي ماما
.
ام نور . شبيج ليش هيج ضايجه طول الوقت وتعبانه ومالج مزاج .
.
نور . ماكو شي ماما .
.
ام نور . حبيبتي اني اعرف شنو المضوجج مصطفى مو .
.
نور . محجيت شي بس من كالت اسمه دموعي غرغرت بعيوني . واختنكت .
.
ام نور . شوفي حبيبتي . الي ميريدج ربح لا تشتري خسارة . وانتي مو ناقصج شي جمال وحلا واخلاق وشهاده وماشاء الله كامله اخذي الي يريدج ويبيع الدنيا لعيونج دائما المثل يكول اخذ الي يحبك ولا تاخذ الي تحبه . لان الي يحبج راح يهتم بيج ويخاف عليج وراح يخليج تحبي .. بينما اذا اخذتي شخص انتي تحبي وهو لا باله يم غير شخص راح يتعبج ويذلج ولو شنو تسويله مراح يحبج لان هو يحب شخص ثاني تركي مصطفى والتفتي النفسج .عمرج هسه ٢٥ سنه كافي انتظار . متعبتي ييمه تره هو لو يريد جان من زمان كلج ليش لان هو مو اعمى بس ميريد . صدكيني ميريد . فكري عدل . وفكري بشهادتج . لا تبقين هيج هاملتهه قدمي ع وضيفه ع شغله احسن متبقين ياكال الجيم يا كال النادي .
.
نور . يمه تعرفين كلش زين اني اعشق النادي فلاتناقشيني بي .
.
كملت العشا اني وماما كعدنه نتعشا ويه بابا . دك موبايل بابا .
.
ابو نور . باباتي جيبيلي موبايلي وشوفيلي منو يدك لان ملابس نظارة .
.
نور . صار بابا .
بابا هذا عمو لؤي يتصل .
.
ابو نور . ها جيبي .
الو هلو ابو مصطفى .
.
لؤي . ابو نور شلونك .
.
ابو نور . الحمد لله بخير انتو شلونكم .
.
لؤي . ع الله . يابه باجر معزومين مسوي ثواب الابويه وامي . جيب ام نور ونور وتعالو وهم الكل راح يجون . لمه .
.
ابو نور . ها ان شاء الله واصل . نجيكم ان شاء الله .
.
لؤي . ياله مع السلامه وسلمنه .
.
ابو نور . الله يسلمك . االله وياك .
.
ام نور . ها خير شصاير .
.
ابو نور . مسوي ثواب الابويه وامي وعازمنه احنه واخوتي وخواتي باجر ع الغدا .
.
ام نور . ها خير ان شاء الله .
.
نور .
من سمعت هيج كمت من السفره وشلت ماعوني وكتلهم . اذا تريدون . روحو انتو
اني ما اروح ولا اوصل .
.
ابو نور . ليش يابه متروحين شنو تبقين وحدج .
.
ام نور . لا تروح هي هيج تتحجج .
.
نور .
طبيت للمطبخ لحكتني امي .
.
ام نور . هسه شحجيت وياج . لا شو تكشخين وتروحين تسولفين وتضحكين وتتونسين والي معاجبه يطخ راسه بالحايط . شبيج انتي خل عقل براسج .
.
ام نور . اوووف اوك ماشي .
.
بوستني امي وكفت غسلت المواعين وهي سوت جاي كملتهن وصعدت . نمت لان متعوده انام من وكت . .
كعدت ثاني يوم بال٧ نزلت سويت عصير برتقال شربته وصعدت الغرفة الرياضه اخذت ساعه جري . نص ساعه بايسكل نص ساعه تمارين . نزلت تريكت وصعدت غسلت وبدلت لبست تنورة طويله مخصرة لون اسود وقميص بنفسجي غامق وشال بيج ولبست الحذا والجنطه لون بيج . خليت شويه مكياج ورشيت عطري لبست اكسسوار اخذت فوني ونزلت لكيت امي وابويه جاهزين . طلعنه وصلنه البيت عمي تقريب ساعه ١٠ جانو الكل ملتمين . طبينه سلمنه عليهم وكعدنه . صاحتلي سارة كمت من يمهم ورحت عليهه .
.
سارة . تعاي دنروح ويه احمد اخويه البيت جدو .نجيب جداري الدولمه البارحه بالليل لفيناهن هناك وبيبيتي كالت اني اطبخهن الكم الصبح وتعالو اخذوهن .
