حكايتي مع الرجال

الجزء 3 ( علاقتي ب ابو الخط )

‏لا يبوح الورد بإحتياجه للماء
          إما أن يُسقى أو يموت بهدوء ..

رجعت للبيت دخلت لكيت امي دتتعارك ويه ابويه

- انت متحس بلي احنه بي مكافي دمرتني تريد تدمر جهالي

- خره بيج و بجهالج واني شنو هذا الموجود

- انت مو ابوهم كفيل بيهم وبيه

- لا مو كفيل كلمن يتحمل مسؤوليته منا وجاي و كلمتي تنسمع

سكتو من سمعو صوت وراهم اندارو لكوني واكفه يم الباب لازمه جنطتي بايديناتي الاثنين واباوع عليهم

امي كلتلي: جيتي امي

اشرتلها براسي و بابتسامه خفيفه عفتهم و طبيت لغرفتي

شمرت روحي عالفراش اباوع عالسكف و اسمعهم بره رجعو يكملون العركه

يا الله شكد صعبه يكون بيتك مكان جحيمك كل صديقاتي هسه رجعو لبيوتهم يتغدون ويضحكون ويه اهلهم واني هذا حالي

واني دا افكر منا و منا اجه ع بالي ( علي ) و نضراته الي بيومها

كلت بكلبي معقول حيصير شي بعدين رجعت كلت لالا ممعقوله اذا باوعلج مرتين ضروري نعجب بيج كافي غباء

كمت طبيت غسلت و طلعت نمت

خابرتني صديقتي الي ويايه بالخط شهد خابرت ع تلفون امي وامي جتني كعدتني كلتلي كومي شهد عالخط رديت عليها واني بعدني امدده

- الو شهوده

- لج لارا شتاقيت

- المن

- الج ولج

- ههههه شكد عياره توني جنت وياج بالدوام

- هم شتاقيت شعليج حتدخلين بمشاعري همين

- لا عيني ما ادخل بكيفج

- و تره ناس ثانيه هم اشتاقتلج

- منو

- ماكلج

- شهد راسي يوجعني فضيها

- علي

فتحت عيني : يا علي ؟؟

- علي دونجوان المدرسه

كمت على حيلي بقوه : منو كلج شلون عرفتي

- اليوم من رجعنا لبيوتنا من نزلت صاحني يم الشباك مالته و سئلني عليج و اخويه من فوك شافني دا احاجي عباله ديتحارش بيه خره بيج و بي

- لج بس فهميني بالاول ليش سال عليه شكالج بالضبط

- كلي تعرفيها ل لارا شنو فلمها بيا صف مرتبطه لو لا

اني صفنت ضجت شنو من اول يوم نعجب بيه قابل

جان تكلي شهد : شبيج صفنتي