كان كافيًا أن تجد شخصًا يختارك حين تنطفئ و حين تخطئ ،
وحين يرى النور في غيرك ويختار عتمتك.
بدايه دخولي للاعداديه جانت مرحله هادئه
حاولت اهدء ارجع لارا القديمه كلت لازم احاول ارضي اهلي
يمكن اني الغلط يمكن همه صح
الشي الي يردو سويته رغم سلبياته من البيت للمدرسه و من المدرسه للبيت
شهد كل خميس اشوفها ببيتنا ولو مايخلوني اوصلها حته لباب البيت
ممنوع اوكف بالباب وياها بس هم كلت ميخالف
مادام هالشي يرضيهم
اقوه وكاحه عندي انو اتابع مسلسلات من وراهم
يدخلون ينامون الضهر اني اسد كتابي و اروح للهول اتلفت منا ومنا و افتحه بصوت ناصي جنت اتابع مسلسل فريحه التركي يلهمني هالمسلسل لان عشت تفاصيل هوايه من قصته
التلفزيون جنه حاطي يم شباك جبير بالهول
جنت اسمع موسيقى المسلسل و اصفن اعشق الموسيقى مالته
الموسيقى خطاب روحي
تفهمك تلمس جروحك و تهديها
جنت اضل صافنه عالشباك و اسمع و ابجي ابجي لما ارتاح
بعدين اكوم ارجع الهول مثل ما هو و ارجع لغرفتي
ضليت ع هالحال لنص السنه مدرستي قررو مدرساته يسوولنا
سفره مدرسيه لكورنيش الاعظميه البنات بالصف من سمعو كمزو
صعدو عالرحلات ركص و اغاني اني ضحكت ع ضحكتهم
بس مجنت فرحانه لان اكيد اهلي ميقبلون اروح وياهم
رجعت للبيت ذبيت جنطتي و غيرت هدومي لبست تراك
و رحت نظفت البيت غسلت مواعين مسحت الكاع عطرت البيت اختي جانت نايمه حضرتلها الممه رضعتها حته نعرف نتغده
رجع ابويه ركضت سلمت عليه
-حمدلله عالسلامه بابا
هو يباوع عليه بطرف عينه
- اي هلا ! و عافني و مشه
رحت صبيت الغده و حضرت كلشي عالميز صحت امي جانت نايمه
كعدنا كلت خل افتح مواضيع وياهم
كمت اسولف عن دروسي و صديقاتي وشلون نطلع من الصف ركض دناكل و من يخلص الدوام و المدافع الي يصير بالباب
ابويه ياكل مايباوع عليه يباوع بماعونه وكلي
- تفاهه
سويت نفسي ما سمعت كتلهم
- اجيبلكم الحلويات ؟ لو تشوفون شمحضرتلكم من البارحه بسكوته و جيلي و اذا تحبون اسويلكم كيكه همين اليوم
ابويه : شعجب خاف حاطيه بيهن شي تردين تسممينا
اني : يابه ليش احط شي بي دا احاول اليرضيكم
ابويه : اليرضيني تاكلين وانتي ساكته ماحب احد يحجي واني راجع من الدوام
سكتت من فشلتي بعدين كلت بكلبي عادي حقه راجع تعبان مو شرط متقصد يضوجج
بداخلي ادور الف تفسير حته ابرر تصرفاته اريد تمشي الحياه احاول اجملها باي طريقه
صار الليل كعدو بالمرجوحه بالحديقه هو و امي طلعت من غرفتي
سمعت اختي دتبجي طبيت لغرفتهم داشيلها شلتها حاولت اهديها
افتر بيها بالغرفه و اضحك وياها طب ابويه ع غفله
- شجابج هنا ؟
- يابه ماكو شي اختي سمعتها دتبجي و دخلت ..
بعدني مامكمله كلامي
- وانتي يايوم اهتميتي باختج طول عمرج حايره بلبسج فساتين و تنانير وتفتحين بشعرج ... من انتي جاهله تصرفاتج مال كحاب
- يابه اني بلبيت البس و افتح شعري يايوم طلعت بره سويت هيج
شو امي متخليني اطلع من باب الشارع اذا ماتفحصني من فوك ليجوه
- لا دفتحي شعرج بالشارع اخذي تصرفات البرابيك و سويها
بهالاثناء اختي كامت تبجي وهو بعده يصيح
كمت اهزها بايدي رفعت راسي عليه كتله
- يابه خل نطلع نكمل كلامنا بره والله ساره خطيه كعدت
- اي بعد سكتيني اشتغل عند الخلفوج
مناك جتي امي
- شكو شصاير صوتكم واصل للشارع
- تعالي شوفي بنتج واستهتارها فايتتلي لغرفتي تعلمني شحجي و شسوي
و صايرتلي داده فايته تنوم اختها من شوكت هيه مهتمه بيها بالله
- شصار لكل هذا فاتت ع اختها كافي شبيك
- ماريدها تفوت هنا ماريد افتهمتي لو اضل اعيد هاي اذا مطلعتي انتي وازتها
- اوزها ع شنو بله
- تبوكني .. حته تبوكوني ثنينكم قابل البنيه المن تطلع غير ع امها
YOU ARE READING
حكايتي مع الرجال
Romanceالقصة حقيقيه صارت بين العراق و تركيا ⚠️ مو كل بنيه عدها جرئه تعترف بتجاربها بس اني تجرئت رح اخليها بين ايدكم وانتو حرين تتعاطفون وياها او تاخدون عبر منها 🍃🌼
