ردة فعل

الفصل الثاني

ردة فعل
الفصل الثاني
من كتابات زهراء العراقية
______________2_______________
المرأة العراقية شامخة كنخيل البصرة و ثابتة كجبال دهوك وطاهرة كقدسية كربلاء و غيورة كشباب ذي قار و معطاء ك كرم ميسان وفاتنة كأثار بابل تجمعت بها مكارم المدن و أمست مظلومة كالعراق!
لزهراء العراقية

ساندة راسي على ايدي و رافعته واني مطروحه اباوع لوجه ريحانة الشاحب و الضعيف بملامحها الناعمة ، عيون عسلية بريئة و خشم صغير وبشرة بيضة ناعمة ورقيقة مايل بياضها للصفرة و شعرها بني خفيف خصلاته ناعمة مثل كلشي بيها بنتي البكر بيها فقر دم غالبا ما يصيبها نحول و دوار بداية كل شهرية
؛جبتها من الادارة للبيت،شربت عصير ونامت دايخة، ما لكيت مسكن للألم بصيدلية البيت، نامت وهي تتوجع

بعد ايام من هاي الحادثةابني متعارك مع ابن الجيران فجأة عرفت ما كايل خانس
الى أن ندك الجرس المغربية، ورجال يحجي ويعاتبني
ابني وكف يذب السبب بابن الجيران و الاب يذب السبب بأبني واني واكفة يم الباب ساكته ما اعرف الحق على منو
بملل و تعب كلت لأبني يدخل
سألت الجار عن حجم الاذى المسببة للولد
وتفاهمت وياه على أنهم اولاد و طبيعي اتصير الشجارات راح وهو غاضب ، دخلت اخذت صحن كليجة و طلعت لبيت الجيران سلمت على امهم و شفت الولد ما بيه شي عركة ولد و والده متدخل بزيادة ،
لكيت نفسي داتحول الى ألة بكلشي بحياتي حتى متعتي وقت الطلعة العائلية او الترفيه اني بيه متاخذه ومتأهبة لكل شي و مسؤولة عن كل شي حتى ترفيه غيري و تعديل مزاجه واقناعه بالمكان و خلق الاجواء الي تريحهم و تلبيه رغباتهم من الابناء الى الاب .

عمر لا أبالي جدا اني الم وراه يعني ابسط شي فارد ايده حيل كريمة و مال لام نفسة ولا افلوسة خلف الله عليه ورطته بقرض عقاري على ضمان وضيفة اخوية و على نفسي واخذته بأسمي وخليته يسوي هذا البيت و الي بأيده دوم للحواليه من اهلة واصدقائة ع بالهم هو بنك مو حي الله ضابط .

كنت اسوق بسرعة حتى اوصل للدوام لأن متأخرة بسبب توصيل البنات
نزلت شبه الراكضة الحك على البصمة قبل لا تنشال بصمت سجلت حضوري و رحت لمكتبي واني أقلب بفايلات المراجعين اجاني احمد الساعي بلغني المدير يريدني
استغربت مو من العادة مع هذا توقعت الكه احد يمة ما توقعت مكتبه فارغ من دخلت

- نعم استاذ

عصبي و انتقد عملي و اتكلم على طلعتي البارحه قبل الدوام بساعة تعجبت شعرفه احنه دوم نتهرب ونطلع السنوان و يتغطى علينا وهو يعرف بس يغض نظر عنا ،اشمعنا اني اليوم المدير رزلني بطريقة عملية

وثاني يوم هم طلبني والعكس كان هادئ ومرضي و نظراته تزعج اي وحده
خفت لا يستمر هيج و أحد يلاحظه و يطلع عليه كلام مثل ست نرجس الي انتقلت عن قريب لغير محافظة كانت حيل مقربة من المدير رغم هي متزوجه لكن الكلام ما يرحم سواء كان صح او لا ،