ردة فعل

الفصل الاخير

مساء الحب يا عمري انتم

هذا البارت كاتبة منه جزء الصبح
و بالليل من الساعة ال٩ الى الى٣ بنقطاعات بسيطة اشرب ماي او شي بسيط وارجع اكتب  الا نهيته نصفه غير مصحح
٦٠٠٩ كلمة
ردة فعل
من كتابات زهراء العراقية 

______________16______________

‏"ولا زلت رغم أنك خذلتني أفتقدك بجانبي كثيرًا، أرى ملامحك بين الحاضرين وكأنك دعوت الله أن لا تفارقني، ورغم خُذلانك لي لازلتُ أرى الأمل في عيناك، أنت الوداع والحضور، انت الأمل والإنكسار، أردتُ إخراجك من مُخيلتي وكأنك لست إلا فكرة مُؤلمه تُجاهد بالبقاء."

كنت كاعدة لوقت متأخر ما اصحى هيج وقت اني عندي دوام بس انتظر زيد
والقلق يزداد
- وين كنت؟
ليش ما ترد على اتصالاتي

جاوبني زيد
-كنت برة

-وين ؟
انت  شو صاير فلتان شنو ولك الساعة بال١٢ شسوي لهيج وقت

ضيق ملامحه وكالي
- ماما حبابة مو طفل اني

صعد يهرول لغرفته متجاهل قلقي عليه!

"بسيطة يجي الصبح أني الك

،
الصبح
افتريت بالبيت من الخمسة كاعده صليت
و طلعت للحديقة الزراعية
جزيت الثيل و نضفت مخلفات النخلة
طلعت منها عركانه ،دخلت سبحت و بدلت بتنورة طويلة بينصل سودة و جاكيت فستقي تحته فانيلة تركوازية اللون والشال بلونها والكب بلون الجاكيت ، دقيقة اني بتنسيق الألوان الحذا هم ما نسيتها تركوازية
والجنطة سودة ولا يخلو وجهي من المكياج البسيط ،صاير نافرة المكياج الظاهر لجأت للباطن .

طفيت عن الجاي عندي هذي الالة النفطية القديمة اني اصيحة مهدارة غيري ام الفتايل او مكينة  المهم احب اهدر الجاي عليها ويكون يطوف الهيل بيه ،

وطفيت عن قوري البيض السلك ،
وطلعت جبت صمون بسيارتي  عفت المحرك يشتغل ونزلت  ،  شديت علاكته لا ييبس  الصمون و حطيته على طاولة الاكل و طلعت للدوام
تاركه الهم الريوك  جاهز وهمه نيام  واني مكتفية بالحليب الخالي الدسم الي شربته عقب صلاة الفجر..

رحت للدوام الي شمرة عصى عن بيتي مشي عشر دقايق يكلف و بالسيارة يمكن اربع دقايق اني واصلة

دائرة فرعية  صغيرة ، خلصت من وجع الراس شريد اني اكثر لأن الصراحة صايرة تعبانه حيل وافكر اول ما ادخل بالخمسين اقدم على التقاعد
بطل الماي اذا خلص يجدد على مكتبي ويمكن اقل الساعة خلصان بسبب نشفان ريكي ،
خلصت شغلي من ال١١ عادي المدير متساهل يخليني اطلع على راحتي

رحت للسوك  تسوكت للبيت ومريت لفائق اخذت كم حاجية منه و رجعت للبيت لكيت ريحانة منظفة البيت حبيبتي و معزلة كلشي واني معلمة الصغار على ترتيب اسرتهم واذا اكلن شي ينظفن لروحهن .