ردة فعل
من كتابات زهراء العراقية
النص بلا تعديل
____________14__________
عاتبني ابعتابك خل ترد روحي
اوهسني . . ابدلالك . . ياشتل شمام
حتى ازهك . . وشوفك وينها اجروحي
بيه اشبع غرورك . .
يا أعز جتال
يتمايل غنج لو بيه . . ثكل نوحي
تعاتبني اعله حالك . .
صار بيك الصار
جاشدل اجروحك هاي وشتوحي
-لعريان السيد خلف
فركت ادية متشتته الفكر ، مستعجلة اريد اعرف سبب الزيارة ، بينما والدي بدأ يمهد الكلام لعمر اني انطيته نظرة كان منتبه لوالدي ، ناعم صاير من ضعفان واحسه بارز طولة ، واضحة الخطوط يم اعيونه بارزة عمرة الأربعيني، و شعرة تارك بيه الشيب يختلط مع الاسود صاير أكثر ألق من ما يصبغ بهذا العمر مع الشيب اكثر لائق ،
تذكرت قبل اشهر من اجه هايج عليه
والابتسامة زارتني غصبا عني ،وتحولت لضحكة صامتة من تذكرت كلمته
تخونيني !كلمة مو بمحلها ما كان يفكر اكيد من كالها ، اه منك يا عمر من تعصب اجيب منا تحط اهنا ما تعرف شتكول ، اخونه ابو شوارب على اساس اني على ذمته ، هو وابنه هاجو عليه بذيج الايام قبل اشهر ؛ ذاك ذليته ذلة زيد افندي ، ظليت كل ما يسوي شي اكله روح لمرت ابوك مو تريد تعوفني وهو يضحك منا من بزع واعترف وحلف هو يهددني حتى بس ما ازوج وانوب مثل ابوه يكلي
تتزوجين على ابويه!
ما اريد ابوية ما يهمني شو يزوج عادي
بس انت لا لأن احبج حيل!
من شبه اباه بعد ،الغيور ، ما يدري هو اخواته كل حياتي مستحيل بهذا عمري
ادخل شخص على حياتي لا جسديا ولا فكريا اتقبل أحد بعد ،
شلت اعيوني عنه من شفته هو هم باوع الي وكان على وجهه التوتر
اتضح الي كلام والدي وتمهيدة ، و ختمها بالخلاصة
- ابو زيد يريد يرجعج على عصمته
و اني جبته واجيت اهنا كدامج هو و يحجي
اتفضل ابو زيد شنو الي عندك احجيه كدام ام اطفالك
- هاي عمي كال الج بعد سبب جيتي اليوم
اني لهسة شاريج يا بت الحلال
سألت بحيرة
- طلقتها ؟!
وتريد ترجعني؟
بعده ما جاوب اني هم سألت
-طلقتها مشاكل بينكم لو لأجل ترجع لعائلتك
كنت مشتته وما اعرف شرد عليه اذا طلقها لأجل يرجعهم لأولاده كان شي صعب
اكول لا
والروح تميل و العقل هم مال ، بس شي ينغزني من فكرة ارجع اله بعد ما خان العشرة
اووف ليش هاي الاهتزازات بداخلي بعد الفراق الطويل صارت مكنت هيج
انتبهت لسكوته طول
شفته يباوعلي بنظرات حزينة
والدي الي كال
- ما طلق هو
أنت تقرأ
ردة فعل
ChickLitتجاوزتك ببرود كما يتجاوز الجندي جثث زملائه في الحرب، لزهراء العراقية مكتملة
