" فرطِ الحب "
الفصل الثامن:
أغلق أحمد محل الملابس الخاص به ما أن حَلّ الليل رغم ذلك الشعور الذي يدفعه للبقاء حتى الصباح هربًا من الافكار التي تهاجم وحدته في المنزل، دلف إلى سيارته وتنفس الصعداء حين رن الهاتف ولمَح اسم شقيقته ليجيبها سريعًا:
- لُبنى عامله ايه يا حبيبتي مش بتردوا عليا ليه قلقتوني؟
- إحنا الحمدلله يا احمد متقلقش بس مكنتش عارفه ارد عليك، أبوك منزلش من البيت من امبارح.
أغمض احمد جفونه يحاول ابتلاع غصه تتملكه فسأل في تعجب:
- هو منعكم تكلموني تاني ليه، مش أنا خطبت وهتجوز زي ما هو عايز؟
ارتبكت شقيقته ذات السابعة عشر عام ولكنها اجابته بصدق:
- انا سمعته بيقول لأمي انه مش مصدقك عشان مرضتش تجبها البلد لما قالك.
- يا سلام وابوكي عايزني اجيب واحده مش مراتي معايا البلد عادي كده،
دي مجرد خطيبتي هجيبها معايا ازاي ولا ابوكي ممشي الأصول على مزاجه!
ارتبكت لُبنى وهي تعض على أظافرها بتوتر وردت بلا حيلة:
- مش عارفه والله يا احمد، إنت بتزعقلي انا ليه؟
تنفس احمد من انفه يحاول تمالك مشاعره قبل أن يسأل في تهكم:
- معقول خالتي مكلمتكوش وقالتلكم إني حضرت الفرح مع ريم خطيبتي؟
- قالت طبعا بس إنت عارف دماغ ابوك مش بيصدق حاجة.
ردت شقيقته في نبرة ساخرة فضغط احمد على أسفل رقبته وللحظة شعر بالاختناق وبرغبة كبيره في البكاء، لكنه تحامل على ذاته وسأل في شوق:
- طيب اديني أمك اسمع صوتها.
وصله الصمت قبل أن تهمس لُبنى في خجل وحسرة:
- ماما ...اصل... أصل ... ماما نايمه.
لم يَفت عليه الاهتزاز في صوتها فسأل في قلق:
- فيه ايه بالظبط يا لُبنى، هي امي جرالها حاجة، انطقي ومتكذبيش عليا.
عضت داخل فمها في حرج قبل ان تخبره بصدق:
- اطمن مفيش حاجة ماما بألف خير، بس ابوك حالف عليها يمين طلاق لو كلمتك في التليفون.
انحسرت أنفاسه داخل صدره وكأن والده يجذب بقايا أدميته، فساد الصمت حتى اتاه صوت والدته المنادي بتحذير:
- بت يا لُبنى ابوكي طالع تاني، اياكي تمسكي التلفون قدامه عدي يومنا على خير.
هربت دمعه حارة على وجنته ما إن اتاه صوت والدته الخائف، فأغلق الهاتف سريعًا ومسحها في عنف وغضب مخنوق، ضغط على عينيه بكفيه يرفض الضعف فقد أظهر ما يكفي منه طوال حياته، حتى أصبح كالمجند الذي تربى على الضعف والمهانة بحجة تقويته ليكون أقوى الرجال.
أنت تقرأ
فرطِ الحب
Romanceرواية رومانسي اجتماعي...مكتملة... مركز أول ...في الروايات الرومانسية والعاطفية .... أنتِ شعلة شوق تؤجج الحنين بين ثنايا قلبي .... بل جنون مثير يضرم النيران بين أضلعي... ولكن نظرة وقحة من عيناكِ ... تنتشلني من أحلامي وتتركني خال الوفاض وهائم بين...
