الحلقة 62 :
نضت صباح على الخبيط #Manel.. وقفت فتحت الباب ..
شدتني ماما من كتافي ..
ماما: وش كاين .. وشبيك .. علاه حالتك هكا و شوفي الساعة شحال راهي ..
جزتها بلا ما نجاوب .. و هبطت ل الدوش ل التحتا .. غسلت حالتي ..و لفيت يدي ب بونداج .. لميت شعري طوماطيشة .. و خرجت .. ل دار ايمن .. دقدقت و دخلت .. لحقت ل الفوقا .. مخلاتنيش الفرملية ندخل ..
انا: بعدي نهدر معاه .. زوج كلمات و نروح .
ف: هو قال ما يحبش يشوفك خليه يرتاح .. و ديجا طبيبتو راهي عندو ..
انا: قتلك نهدر معاه زوج كلمات و نخرج .. بعدي من وجهي متخلينيش نكلب ..
ما ستنيتهاش تجاوب .. بعدتها و دخلت .. لقيتو .. واقف برجل وحدة .. و من جيهة لخرى شاداتو وحدة .. ماركزتش معاها .. قد ما فرحت كي عاود وقف على رجليه ..
انا: ايمن وقفت..
ترميت عليه عنقتو .. قريب طاح كون ماشدش روحو .. بعدت شوية عليه .. بستو من خدو .. و عاودت عنقتو .. ما بعدنيش ..
ايمن: سمر تقدري تخلينا وحدنا
سمر: اوك
قعدت واقفة قدامو .. امبعد شفتو حاب يقعد و ما قدرش برجل وحدة..
قربت منو شديتو .. باش نعاونو يقعد .. جبد يدو ب الزور .. حتى وجعني ..وقعد بسيف ..
انا: ايمن
ايمن: ما تهدريش خليني انا نهدر
انا: اوك
ايمن: منار انا و نتي طريقنا مغلوقة
بقيت نخزر فيه ملقيتش وش نجاوبو اصلا ..
ايمن: انا ماراحش نقدر نكمل معاك .. و لا مع اي وحدة غيرك .. نحبك صح .. ما نقدرش ننكر هاد الشي بصح حتى الحب ما عندو ما يدير.. نشا الله تتفهمي .. و نتمنالك واحد خير مني .. و ديري في بالك كي تسحقيني راح نكون معاك دايمن .. اي حاجة نقدرلها (و خزر ل رجليه .. تبسم ) نديرها ..
انا: علاه #Manel
ايمن: ما نحبش نتناقشو و لا نكثرو الهدرة .. كل واحد يحترم قرار لوخر
انا:و نتا سمعتني .. احترمت قراري باش تهدر هاكا .. ديسيدي وحدك نتا ..
ايمن: منار
انا: ماشي نتا لي بديت العلاقة .. بديناها حنا الزوج .. و ماشي نتا لي تنهيها كيما تحب ..
ايمن: منار ما نحبش نكثر هدرة ف هاد الموضوع
انا: هادا راك تشوف فيه ..
رفدت يدي نوريلوا ف الخاتم ..
انا: هادا جامي نحيه من يدي كيما وعدتك .. و ماراحش نحيه ماشي من حقك تبعد بلا حتى سبة واضحة .. مستحيل نبعد عليك .. حتى نتا قلتها .. دوكا قتلي نحبك .. علاه تحب تفرقنا و تحرقلي قلبي ..
ايمن: سمررر
دخلت الطبيبة و لا هادي سمر لي ديجا ولا يعرف اسمها
ايمن: ني عيان حاب نريح .. ما تخلي حتى واحد يدخل عندي ..
انا: اوك ني رايحة .. تهلا في روحك .. و خمم مليح ف هدرتك ..
خرجت نغلي .. هبل في مخو هادا الضربة جاتو في راسو ماشي في رجلوا اكيد ..
رحت ل الخدمة ديراكت .. نفرغ زعافي فيها .. لي يجي قدامي نبخصو .. كي العادة مكان حتى جديد ف الخدمة .. جيت خارجة .. قبل ما نرفد روحي .. صونا الفيكس .. رفدت..
انا: الوا ..
غسان: منار .. طاحت باطيمة ف حي ***
انا: و انا خدمتي ماصون غسان
غسان: و الله التحقيقات ماشي من مسؤوليتي
انا: اوك ني جاية ..
خرجت نجري .. نحب نتهنا و نروح نريح كرهت كلش ..
لحقت وين كانو الجماعة.. لقيتهم محوطين المنطقة .. جبدت البادج تاعي .. وريتهولوا .. و دخلت ..
انا: وش كاين
غسان: وش راكي تشوفي
انا: كاين موتى
غسان: زوج
انا: هدا ماكان
غسان: مكاش جرحى .. و مزال ما صابوش زوج ذراري
انا: المطلوب مني دوكا نعرف علاه طاحت ..
غسان: بالطبيعة
انا: اوكي .. جيبلي عينة من المادة لي مخدوم بيها .. و حطها ف البيرو .. نا ني رايحة دوكا .. و هما يكملوا خدمتهم . و كي نسحقك في حاجة نقولك ..
رفدت روحي و خرجت .. نمشي .. و معلاباليش وين راني رايحة حتى طوموبيلتي ما رفدتهاش .. طاح الليل و انا مازلت نمشي .. دموعي نشفو .. حاسة روحي مخنوقة .. تهديت .. كي شفت حالتو هكاك .. و زاد عليا ب هدرتو .. ل هاد الدرجة .. رخيسة عندو و يرميني على طول يدو في اول فرصة .. #Manel
YOU ARE READING
كرونيك:🔥🔫عقدة _رجل🔫🔥
Mystery / Thrillerهااااي أنا جيت 😍😍😍 و جتلمكم كرونيك أقل ما يقال عنها هايلة 🔥🔥 منقولة للكاتبة : منال😍😍 بعنوان : عقدة رجل🔥 نلقا تفاعل نهبطها 😍 #منقولة اذا احب الله عبدا ابتلاه" ربي دائما يحطلنا في حياتنا عقبات .. باش يمتحنا .. و يشوفنا اذا نصبرو .. بصح الانسا...
