كرونيك:🔥🔫عقدة _رجل🔫🔥

🔥103🔥

الحلقة 103:
هبطنا انا و ايمن#Manel .. من جيهة مطمنة من ميساج امير معلاباليش علاه و من جيهة خايفة على البنات .. كل ما نقرب كل ما يزيد قلبي يتزير
انا: ايمن خف شوية
ايمن: مناار الفرانات
انا: وشبييهم
ايمن: ماهومش يمشو
انا: هداااك لي خص يا ربييي
ايمن: انا راح نقص سرعتي و نتي تنڨزي
انا: و نتا تبقاا هنا
ايمن: لازم نتحكم فيها باش تقدري تهبطي نتي
انا: لالا نهبطو كيف كيف
ايمن: منار روحي ختك تستنا فيك انا نسلك روحي .. اهبطي
خزرت فيه و تنهدت .. كون جاو ضروف وحدوخرة مستحيل ننزل بلا بيه .. حكملي يدي .. رفدت راسي .. نشوف معاه
ايمن: مهما صرا كوني متأكدة بلي نحبك ..
جبدت يدي... منو .. و دورت وجهي
ايمن: هيا .. اهبطي
فتحت الباب .. و نڨزت .. مانضريتش خاطرش سرعة الطوموبيل كانت قليلة .. نشوف فيه زاد ف الفيتاس و بعد .. نزلوا دموعي .. علاه حياتنا هكا .. نخرجو من حفرة نطيحو في وحدوخرة .. دعيت ربي يحميه .. و وقفت .. نحوس على المستودع لي قالي عليه امير .. نجري و نعيط .. جريت حتى عييت .. حبست نرد النفس .. و نشوف منا و منا .. كاش ما نلقاه .. مكاش .. زدت دخلت ف الغابة... نشوف في بناية قديمة مقابلتني بصح برا كاين رجاال مسلحين .. يعني هدا كلوا فخ يا امير .. تحطت يد على كتفي .. درت مخلوعة لقيتو شمسو ..
انا: خلعتني
شمسو: كاين بزاف رجال برا
انا: جبت دعم ؟!
شمسو: وي
انا: التها بيهم و انا ندخل
شمسو: و ايمن وين راه
انا: معلاباليش قطعو الفرانات تاع الطوموبيل انا نزلت و هو بقا
ربت على كتفي ..
شمسو: ندخل معاك
انا: التها ب هادو تعيش خليني انا ندخل
شمسو: افف اوك استناي هنا .. نفرغو الدخلة جوزي
انا: لالا نجي معاكم
شمسو: امشي
جاب الجماعة لي معاه .. و راح .. غير شافونا .. بداو يطلقوا ف الرصاص .. تخبيت مور شجرة .. و جبدت سلاحي .. محبيتش نفرغو قبل ما ندخل .. طليت لقيت الباب فارغة
شمسو: منار روحي .. و انا راح نحميلك ضهرك ..
انا: اوك ..
تنفست و خرجت .. لحقت ل الباب .. فتحتها .. اول واحد قابلني .. هو امير .. ميت .. مشنوق .. عينيا تحلوا .. حسيت بضربة في ضهري .. طحت ف الارض .. و عينيا ما تنحاوش منو .. فقت على الضربة الزاوجة .. رفدت روحي بسيف .. و ضربتو ما بين عينيه .. طاح قدامي .. قربت من امير .. مركزة معاه .. لدرجة ماشفتش الناس لي كانو فما ..
حطيت يدي على رجلوا .. سمعت تصفيق .. شفت موراه .. لقيتها مرا .. مضخمة من حوايجها تبان من الطبقة الراقية .. قاعدة فوق بيرو صغير ..
انا: شكون نتي
****: H
قالتها و ضحت ضحكة استفزتني .. رفدت سلاحي في وجها .. زادت ف الضحك ..
انا: منى و فردوس وين راهم
دارتلي بيدها جيهة الحيط و مزالت تضحك .. نشوف فيهم مربوطين .. و عينيهم مغمضين .. حتى من فوامهم مغلوقين..
انا: قولو يفتحهم
****: ماشي نتي لي تأمري هنا
انا: قولوو يفتحهم ولا نفرغ هدا في راسك
****: هههههه كبرتي
انا: ما تنفخيليش راسي ب حكاياتك ..
دورت السلاح ل الراجل لي كان معاها .. ضربتو في رجلوا ..
انا: افتحهم
بقا واقف كي الحيط كلمة ما قالهاش
انا: رانيييي نهدر
****: بلعي فمك اليوم و هنا انا الوحيدة لي نهدر ..
انا: شكون نتي
****: انا لي موتك يكون على يدي .. خاطرش بسبتك خسرت شخص عزيز عليا .. بسبتك خسرت صفقة فيها الملاير
انا: و امير علاه
****: اممم غاضك .. علاه .. علاه .. علاه .. خاطرش واحد خاين .. قتلوا جيبلي البنات .. داهم خباهم .. معلابالوش بلي نجبدو من السما و لا من الارض .. ايه قبل ما ننسا .. خلالك ورقة ف بيتو .. ااه ف القجر الثالث .. ادا مغلطتش بصح ما يهموكش هاد المعلومات .. خاطرش ماراحش تبقاي حية باش تقرايها ههههههه
انا: وحدة مريضة و مهبولة .. افتحي البنات ما عنديش وقت نضيعو معاك ..
****: اوك نفتحوهم مكاش بروبلام ..
دارت اشارة ب راسها ل هداك الراجل .. فتح فردوس قبل .. و راح يفتح منى .. وقفت فردوس تبكي ..
فوفة: مناار .. منار خرجينا منا
انا: اهدي فوفة .. ادي منى و اخرجو منا
****: ب الساهل هي
خزرت فيها باش تبلع .. فتح عينين منى .. حكتهم .. و خزرت فيا ..
منى: مناار
انا: منى اخرجو ..
رفدت يدها جيهة المرا ..
منى: مناار .. ماما
انا: وشنو
منى: ماما
مفهمتهاش وش كانت تلمح ..  ناضت تعيط
منى: مااااااماااا هادي ماما
خزرت ف المرا .. مبردة دمها .. و قاعدة تخزر فينا .. رحت عند منى وقفتها ..
انا: منى شكون هاديك
منى: ماما ..
انا: نتي مرت حميد
****: ب شحمها و لحمها .. بنتي منى علاه البكا .. حتى انا توحشتك .. دوك نتهناو من هاد اللسقة و نديك معايا
منى: ما نحبش نجي وحدة مسخة كذااابة .. كامل كذابين ..
انا: منى اهدي .. فردوس اديها و اخرجو منا ..
قبل ما نكمل هدرتي .. نشوف ف الباب تحل .. دخلوا ربع رجال .. الواحد فيهم يجيب ربعة مني .. غلقو الباب #Manel