كرونيك:🔥🔫عقدة _رجل🔫🔥

🔥68🔥

الحلقة 68:
منى: شمسو راه يستنا فينا ف الريسطو .. #Manel
انا: اوك وين باسكو ني حابة ناكل شاورما
منى: في الريسطو تاعك ما تخافيش
انا: اووه حالة ..
دارت خزرت فيا .. امبعد خزرت ف الطريق
منى: منار راك متأكدة راكي مليحة ماكلاه تمثلي عليا
انا: ما ننكرش و ما نقولش بلي ما توجعش توجع و بزااف .. قلبي يحرق .. بصح مانيش راح ندفن روحي علاجالو .. هو لي حب .. هو يتحمل انا نكمل نعيش حياتي كيشغول ماكاش و علابالي راح نقدر ..
منى: ان شا الله بصح علاه استقلتي ..
انا: امبعد نفهمك هيا خفي روحك جعت ..
سكتت و كملت ركزت مع الطريق .. لحقنا نزلت انا قبلها .. دخلنا نضحكو .. شافني شمسو .. دارلنا باي باي .. رحنا عندو .. قعدنا سلم عليا ..
شمسو: لاباس منار
انا: الحمد الله .. سوال عليك شمسو ..
شمسو: منار خرجتي هكا من الدار
انا: لالا بدلت ف الدخلة تاع الريسطو
شمسو: منار ايمن وصاني عليك
خبطت الطابلة بيدي .. سكت و بقا يخزر فيا ..قربت منو... نهدر
انا: سي ايمن تاعك هو راح وحدو ماشي انا قتلوا روح .. و مدام خرج من حياتي ب ارادتو .. معندوش كلمة عليا ما يربطنا حتى شي هو في طريق و انا في طريق و اسمو قدامي متزيدوش تجبدوه مفهوم ..
شمسو: اوك خلينا من هاد السوجي .. نهدرو ف واش ستحقيتك
انا: وي
شمسو: وينتا نديرو خطبتنا
انا: راح تخطبني انا مثلا لاه جايبني هنا و تحكيلي .. هاهي خطيبتك اتفاهمو و قولولنا
شمسو: انا قلت نهدر معاك
انا: لالا حاجة تخصكم اتفاهمو ..
شمسو: مالا نقدر نديها و نروح
انا: تربح خلوني ناكل
شمسو: ييي وشبيك عدائية ڨاع هكا
انا: نتا قلقتني ادي مرتك و رنك خليني ناكل و نهدي اعصابي
شمسو: اوك اوك بلعقل
راحو هما و انا طحت على سندويش ااشاوارما تقول هربت من الحبس .. .. بقيت قاعدة فما .. ناكل و معلابالي ب حتى واحد .. حتى سمعت طفلة مورايا تهدر
*****: وي كيما راني نقولك الوشم يوجع يقتل كي دارهولي قريب مت من الوجعة .. لحمي بقا لاهب سمانة كاملة .. درتلوا ڨاع البومادات تاع ربي .. و هكاك بقات الحمورية و كيما راحت ل حد الان مازلت نمسها توجع ..#Manel
درت ليها .. و طبطبتلها على ضهرها
انا: وشمتي ..
****: وي عندي سمانتين
انا: يوجع ..
*****: ماشي يوجع يقتل ..
انا: اممم وين وشمتي نتيا ..
مدتلي لادراس .. كتبتها .. و رفدت روحي و خرجت.. حكمت طاكسي .. و عطيتو لادراس خزر فيا شغل ما عجبوش الحال بصح سكت..
لحقنا ل البلاصة خلصتو .. و نزلت .. نشوف في براكة صغيرة قدامي .. بابا قصير .. نطابس باش ندخل .. طبعتو شوية و دخلت .. الدنيا ظلمة .. قابلتني مرا عند الباب .. خشينة .. موشمة كامل .. و نصها ڨاع مناڨش .. خزرت فيا من الفوق ل التحت ..
مرا: وش تسحقي
انا: نوشم
مرا: نتي
انا: اممم
مرا: اوك ارواحي منا ..
دخلتني لبيت صغيرة .. و قعدتني فوق كرسي .. جبدت كرسي وحدخر .. و قابلتني ..
مرا: وش تحبي نوشملك
انا: وشنو هو اصعب خط ممكن توشميه
مرا: الكوفي
انا: اوك نحب اسم ايمن ب الكوفي
مرا: مشيكتش تقدري تتحملي الوجعة ممكن تبقا كتر من شهر
انا: نتحمل ..
مرا : دبري راسك وين ؟!
انا: هنا ..
رفدت يدي وريتلها مابين كتفي .. و رقبتي .. يعتي في اسفل الرقبة ..
مرا: راح تتوجعي كتر فما ننصحك بدلي ع الاقل بلاصة
انا: لالا ..
تكسلت و سڨمت روحي .. مدتلي مخدة في يدي .. شفت معاها مستغربة ..
مرا: كان وجعتك عضيها باش ما تعيطيش ..
انا: اوك .. حكمتها تحت دقنونتي .. و تكسلت على كرشي .. اول ما حطت الابرة على رقبتي .. لسعتني .. انا: اههه
مرا: مزال ما مسيتكش اصلا ..
سكت .. و هي كملت دخلتها تثقب باش يخرجلي الدم .. تكتب بيه .. قلبي خرج .. و جسمي رعش .. وجيعة كبيرة عليا بزاااف .. ما تحملتهاش ماجيت نلحق المخدة ل فمي .. خرجو صيحاتي .. و دموعي نزلوا معاهم .. عينيا تضبو من الدموع لي يجريو كي الواد .. يديا و رجليا نملوا .. نحس في جسمي تهد .. و رقبتي تسيل بالدم.. وجيعة يدي المكسرة ولات ب الدوبل قتلتني .. حسيت روحي تكسرت من كل بلاصة .. شوية وقت و ما زدت حسيت على والوا .. حليت عينيا .. على المرا ترش فيا بالما ..
مرا: نضتي
انا: اههه رقبتي
مرا: حذرتك .. و نتي راسك خشين
انا: مانيش قادرة نرفد راسي
مرا: ايه من رقبتك و الوشم .. بسيف باش كملتهولك .. راح تبقا توجع فيك .. و اشري مرهم ل الالتهابات ديريه باش تروحلك الحمورية .. و يبان مليح ..
رفدت صبعتيا .. جوزتهم على رقبتي .. وجعتني بزاااف تحرق .. جامي في حياتي راح نقدر ننساها .. على هادا وشمت اسمو .. باش كل ما نتفكر الوشم نتفكر الوجيعة لي تسببلي بيها .. حتى اسمو و وجعني .. وجيعة قلبي كبيرة .. و انا وشمتو ..باش نبقا متفكرة بلي هو وجعني .. و كان نهار توحشتو .. نشوف الوشم و نتفكر بلي عن قصد و لا بلا قصد .. جرحني و وجعني في قلبي اكثر من جسمي .. رفدت روحي نترنح .. اول حاجة درتها رحت ل الكلينيك .. دخلت ما صبتش سلمى تما تهنيت .. ماكنتش حابة نهدر حابة نبكي برك من الوجيعة لي نحس بيها .. دخلت عند الطبيبة هبلتها باش نحاتلي البلاتخ .. بصح خلاتلي البونداج برك .. قدرت نزغدها شوية ع الاقل تهنين من البلاتر لي نورمالمو يبقا سمانة كاملة.. جزت على الفارماسي ديت شحال من بوماد ينحي الالتهاب و الحروق .. وليت ل الدار .. ما هدرت مع حتى واحد .. بدلت حوايجي لبست بيجامة .. و قعدت فوق الفراش .. جبدت كراس .. نخربش .. اكثر حاجة نديرها كي نكون مغمومة هي نكتب خواطري .. نكتب و دموعي ينزلوا من الوجعة لي نحس فيها .. بصح وجيعة قلبي اكبر #Manel