خلف اسوار العشق انتِ مملكتي

البارت الخامس والسبعون

الكاتبة : عليا الناصر

البارت : 75

رقية : جتي تركض على هدية خية شجرالچ هدية .. هدية يولي شو حاچيني وضربتها على خدها ومن ما ردت عليها لأن فقدت الوعي دحگت على ريحان اللي چانت بعدها واگفة فوگ بنهاية الدرج وهزتلها راسها ما راضيه على اللي صار بيناتهن هي وهدية

ريحان : نزلت عالسريع وجتي يمهن وگفت رقية والله العظيم أني ما دفعتها ووگعتها هي اللي عثرت ووگعت

حجية لطيفة : يولات شجرالچن چنت أصلي ما أعرفوا شلون كملتها لصلاتي عالسريع من سمعتوا صياحچن ما تگللي شبيچن ياه صخام بوجه العدو هاي شبيها ليش خربت

رقية : وگعت من الدرج عمة وفقدت وعيها وما جاي تصحى

حجية لطيفة : يولي لا يروحوا يصير شي باللي ببطنها خميها زين

رقية : عمة جاي والله ما أدري اذا صار بي شي لنها جاي تنزف يولي هدية هدية شو فتحي عيونچ هدية وضربتها على خدودها حيل

هدية : فتحت عيونها على كيفها ودحگت بوجههن ومن شافت ريحان حچت بصوت ناصي كله منچ إنتِ اللي هيچي ثويتي بيه اذا ثار ثي لبنتي لو بيه خطيتنه برگبتچ

حجية لطيفة : يولي ريحان شسويتلها لهالمصگوعة

ريحان : والله بيبي وداعتچ ما سويتلها شي وما عليه بيها

هدية : چذابة هي اللي دفعتني من فوگ الدرج ووگعتني ورقية ثاهده هي هدت عليه عاركتني ودفعتني

حجية لطيفة : رقية هالحچي هذا صدگ

رقية : عمة هي ريحان صح هدت عليها ب..

هدية : قاطعتها گامت تصيح الحگولي راح أموت اويلي يابا راح أموت وينچ يوم تعالي ثوفي بنتچ  ثلون موتنها آآخخخخ

حجية لطيفة : يولات لا تظلن صافنات وشوفن بكر وينو وصيحنه خلي يلحگ عليها ياخذها للمستشفى لنها صدگ راح تموت ما تشوفنها شلون خذاها النزف رقية يمة وعود روحي إنتِ وياها  لا تعوفينها

رقية : صار عمة وأخذت موبايلها چان عالميز محطوط شالته بسرعة ودگت على بكر خوية بكر وينك تعال بسرعة مرتك وگعت وخذاها النزف وسدته هسة جاي خلي أروح أجيب عباتي وعباتها لما يجي بكر

ريحان : رقية والله العظيم أني ما دفعتها وگعتها

رقية : خية مو وكت هالحچي هذا هسة خلنة ناخذها للمستشفى ونتطمنوا على صحتها وصحت اللي ببطنها وعود بعدين نحچي وراحت جابت عباتها وعباه لهديه

بكر : جي يركض شكو شصاير شلون وگعت هاي الثوله

هدية : أشرت على ريحان وتبچي وتصيح كله منها هي اللي وگعتني تريد تموتني أني وبتك

ريحان : بكر والله تكذب عليك مالي علاقة صح تعاركنا أني وياها بس هي اللي عثرت ووگعت من فوگ الدرج