#العنودية_والنقيب_الشرس
#جزء_الرابع_والاخيرررر
#بقلمي_سارة_المجيد
مساء الخير حبايب ❤
شاهين ...اتعصبت من روحي جثييير فرت وانفجرت بغضبي طبيت كسرت الماعين والغراض ماخليت شي صاحي بالبيت حسيت نفسي فقدت
صعد ضغطي دخت وكعت كوه سندت نفسي رحت اخذت حباية الضغط وكعدت ع القنفه وحطيت راسي بين ايدي وكمت الوم بروحي شسويت يربي شسوووويت
شهلاء ...طلعت من البيت وحسيت خلايا جسمي كلها ادمرت بيتي الي رتبتو ع ايدي ركن ركن ومكان مكان بكل حب وحنان تركتو ورايه
وتركت حب عمري وحياتي بسبب حثالة حشاكم انسانة دخلت حياتي قبل وهسه رجعت من جديد هل مخلوقة اتسببت بدمار حياتي
لان ظهرت بحياتي من جديد والمصيبة طلعت عايشة باربيل يعني راح ابقى بهاي النار الى ان اموت
وراح يبقى كابوسها ملاحقني بكل مكان باربيل ويمكن حتى اخاف اطلع بمكان لاشوفها جدامي
طبعا اني هاي المخلوقة الوحيدة الي سببتلي قلق نفسي لان شاهين جان قبل عندو جثيير علاقات ولاهتميتلهن لان مجرد نزوات يومين ويعوفهن بس سما لان جيرانهم جانت وبقت علاقتهم سنة يعني اكثر وحدة بقى وياها
ولان هم جانت تحبو بصدق يمكن بكد ماحبو اني وهل شي بحد ذاتو يخوف ومرعب
لان الوحدة من عدنه اذا حبت بصدق مايمنعها تسوي اي شي لخاطر الي تحبو
مشينه طريق وصلنه لتكريت ودخلنه لمنطقة بيت ستار وشيماء وصلنه لبيتهم نزلنه واني كوه امشي منا مريضه ومنا جرح براسي مشايله الخيط منو ومنا حالتي النفسية الزفت ماعاد ادحج جدامي
فتح الباب ستار ودخلنه شيماء اخذت الغراض ودخلتهن جوه وكلتلي نامي انتي والجهال بغرفة جهالها وجهالها تفرشلهم بالهول ...خطية هجولتهم يربي شكد عيب
المهم اخذت جهالي للحمام سبحتهم وبدلتلهم وغسلت بس جسمي لان راسي ممنوع اغسلو الجرح بعدو جديد وتوضيت وطلعت وطبيت للغرفة
نصبت سجادتي وصليت الظهر ونمت بالسجود بقيت اناشغ وابجي ع حظي
دعيت ربي يحلي هل مشكلة ويبرد نار كلبي لان طاقتي نفذت بعد ماعندي طاقة للتحمل
كملت الصلاة لميت السجادة وحطيتها ع الكرسي وطلعت الملابس وصفطتهن بالكنتور
بهل لحظة سمعت تلفوني يرن طلعتو من الجنطة شفت شاهين يتصل سديتو وشمرت التلفون
كعدت ع الجرباية وحضنت نموري وكمت ابجي الولد يفتهم لزم وجهي وكام يمسح دموعي ويكول ماما ليش تبتين (يعني ليش تبجين) كتلو حبيبي مريضه راسي يوجعني
