PSYCHO FRIEND (Season-2)

Part 10

🐺Unicode🐍

မြို့လယ်ခေါင်အတွင်း ရှုပ်ယှတ်ခတ်နေတဲ့လမ်းမတွေပေါ် ကူးလူးသွားလာနေကြတဲ့ ယာဉ်ပေါင်းများစွာ။ အထပ်မြင့် တိုက်အသီးသီးက ပြသလျက်ရှိတဲ့ LED Board က ကြော်ငြာအမျိုးမျိုး။ ပြသသမျှ ကြော်ငြာအများစုမှာ နေရာယူထားတာက ယခုလက်ရှိ တရုတ်ပြည်ရဲ့ ရေပန်းစား နာမည်ကျော်ကြားနေတဲ့ ဝမ်ရိပေါ်။ ရိပေါ်ကတော့ ထိုမြင်ကွင်းအားလုံးကို အထပ်မြင့်တိုက်တစ်လုံးရဲ့ မှန်တွေသာကာရံထားတဲ့ နံရံတစ်ဖက်ကနေ လက်ထဲကဝိုင်ခွက်ကို အသာလှည့်ရင်း ငေးမောကြည့်နေတော့တယ်။

လက်ထဲကဝိုင်ကို အာစွတ်ရုံ တစ်ငုံမျှသောက်ပြီးတဲ့နောက် သက်ပြင်းအသာချမိပြီး သိပ်မကြာခင်မှာပဲ တံခါးခေါက်သံနဲ့အတူ အသံပြုလာတဲ့ ရိပေါ်ရဲ့ မန်နေဂျာ။

"မင်းသား။ ကျွန်တော်ဝင်ခဲ့လို့ရမလား။"

"ဝင်ခဲ့ပါ။"

မန်နေဂျာ ဝင်လာတာနဲ့ ရိပေါ်လည်း ခုံတန်းရှည်ရဲ့ထိပ်မှာအသာဝင်ထိုင်ရင်း လက်ထဲကဝိုင်ခွက်ကို စားပွဲပေါ် တင်လိုက်တယ်။ မန်နေဂျာဖြစ်သူကလည်း ဘေးခုံမှာဝင်ထိုင်ရင်း ရိပေါ်ထံ ဖိုင်တစ်ခုကမ်းပေးလာလေတယ်။

"မင်းသားနဲ့ စာချုပ်ချုပ်ထားတဲ့ ကုမ္ပဏီက မင်းသားကို ဒီဇာတ်ကားလေးရိုက်ကူးဖို့ရာအတွက် ကမ်းလှမ်းလာတယ်။ မင်းသားအနေနဲ့ ဘယ်လိုသဘောရပါသလဲတဲ့။"

မန်နေဂျာစကားအဆုံး ဖိုင်ကို ဖွင့်ဖောက်ကြည့်မိတော့ သူရိုက်ရမယ့်ဇာတ်လမ်းက အခြားမဟုတ်။ တစ်ချိန်တစ်ခါက စီနီယာလီယွမ်ဖြစ်သူနဲ့ ရိုက်ခဲ့ရတဲ့ ဇာတ်ကား။ ရိပေါ်လည်း သက်ပြင်းအသာချရင်း ဖိုင်ကိုသာ စားပွဲပေါ် တင်လိုက်တယ်။ မန်နေဂျာကတော့ သူ့တာဝန်အတိုင်း ပြောစရာရှိတာ ဆက်ပြောလာတယ်။

"မင်းသားနဲ့အတူတွဲရိုက်မယ့် လီယွမ်ဆိုတာကလည်း သရုပ်ဆောင်ဘက်မှာ နာမည်တစ်ခုရထားသူပါ။ မင်းသားနဲ့တွဲရိုက်မယ့် မင်းသမီးကလည်း နာမည်ပျက်လုံးဝမရှိတဲ့အပြင် ဇာတ်လမ်းရဲ့ မူရင်းဝတ္ထုကလည်း ပရိတ်သတ်တွေကြား ရေပန်းစားပြီးသားဇာတ်လမ်းဖြစ်လို့ မင်းသားအနေနဲ့ ရိုက်ကူးဖို့ရာ အဆင်ပြေမယ့် ဇာတ်လမ်းကောင်းတစ်ပုဒ်ပါပဲ။"