Debt and Pleasure [Completed]

Chapter XXIX

FRANZESS

MABILIS ko lamang narating ang bahay at agad hinanap ng mga mata ko si Red kahit pa alam ko naman na wala siya rito dahil hindi ko nakita ang sasakyan niya sa garahe.

"Nana?" paghahanap ko kay Nana Mela at narinig kong sumagot siya mula sa itaas ng bahay kaya't agad akong umakyat.

Nadatnan ko siyang dinidiligan ang mga halaman sa may veranda. "Bakit, anak? Nakabalik na pala kayo? Nasaan ang asawa mo? Kumusta ang enrolment mo—"

"Nana, pasensya na po sa kabastusan ko, pero umuwi na po ba rito si Red?" tanong ko kay Nana at nangunot ang kilay nito sa akin.

"Hindi ba't kayo ang magkasama? Hindi ko naman narinig na dumating ang sasakyan mula kaninang umalis kayo. Nag-away ba kayo?" tanong nito at hindi ko alam ang dapat kong isagot kay Nana. Hindi ko naman puwedeng sabihin sa kaniya ang nangyari dahil problema namin iyong mag-asawa.

"Nagtampo lang po siya, Nana. Sige po, hahanapin ko na muna po siya," paalam ko rito at bakas ang pag-aalala sa mukha na tumango siya sa akin.

Namanaog ako at sinubukan ko siyang kontakin sa telepono ngunit nakapatay na iyon. Kanina pa man din na nasa taxi ako ay hindi ko na siya makontak.

Ang totoo niyan, hindi ko kahit na kailan gustong galitin o pagselosin si Red. Kahit pa nakikita ko kung gaano ako kahalaga sa kaniya sa mga reaksyon niya tuwing magseselos siya, ayaw kong magkaroon ng lamat ang pagsasama namin dahil lang sa selos-selos na iyan—lalo pa ngayon, na hindi na kami katulad ng dati.

Sinubukan kong tawagan si Alas dahil baka sa isa sa kanila nagpunta si Red. Wala na kasi akong ibang maisip na maaari niyang puntahan.

"Oh napatawag ka, Mrs. Allen?" tanong nito mula sa kabilang linya at hindi ko na alam ano bang dapat kong sabihin sa kaniya dahil sigurado na mang-aasar ito kapag nalaman niya ang kuwento.

"Alas, kasama mo ba si Red?" nangingiming tanong ko at tawa na malakas ang sinagot nito sa akin sa kabilang linya.

"Nagmaasim na naman ba ang tropa ko at lumaklak ng ampalaya? Maganda na naman yata ang nabiling bitter medicine ni gago. Alam ko style niyan, hindi ka lalayasan niyan kung hindi nagselos 'yan!" anito at muling nagtatawa sa kabilang linya.

Napanguso na lang ako saka ko pinatay ang tawag. Sunod na nahagip ng mata ko ay ang contact number ni Casspian. Wala akong ibang choice kung hindi tawagan siya. Isa pa, sila talaga ni Red ang malapit sa isa't isa kumpara sa iba pang miyembro.

"Franz? Is it really you?" aniya sa kabilang linya at nagdalawang-isip pa ako kung sasagot ba ako o hindi.

"C–Casspian, kasama mo ba si Red ngayon?" utal na tanong ko rito.

"I'm not with him. Nasaan ka ba? Bakit mo siya hinahanap?"

"Sige pala. Salamat—"

"No, don't hang up. Nasaan ka? Pupuntahan kita. Let's look for him together. Kabisado ko ang mga priavte bar na madalas niyang puntahan," anito at napabuntonghininga na lang ako.

Wala na akong karapatan na mag-inarte dahil baka hindi ko mahanap ang asawa ko kung pananaigin ko pa ang iniisip ko.

"N–nasa bahay ni Red. Aabangan na lang kita gate," sagot ko at pinatay ko na ang tawag.

Mabilis akong tumungo sa gate namin at hinintay si Casspian. Wala pa man din mga kalahating oras ay narito na siya. Ilang araw ko siyang hindi nakita at bahagya na ring tumubo ang bigote at balbas niya.

"Get in," utos niya sa akin at agad naman akong sumunod.

Pagpasok ko ng sasakyan ay nakita kong nakapambahay lang siyang damit at naka-havaianas lang na slippers. Mukhang nagmadali lang talaga siyang makarating agad dito.