Bi De • Pan Yu Xin De Rui la ||Myanmar Translation||

13

[Unicode]

'ငါကဂေးဆိုပြီး အတင်းပြောနေတယ်'

ပိတ်ရက်တိုလေး နှစ်ရက် ကုန်ဆုံးသွားပြီးနောက် သူတို့ခြောက်ယောက်လုံး ကုမ္ပဏီကို သတင်းပို့ဖို့ ပြန်ရောက်လာကြသည်။

ခဏလေးအတွင်းမှာပဲ ဝမ်ချောင်နှင့်ရှဲ့ကျူရှင်း ရန်ဖြစ်ထားမှန်း လူတိုင်း သတိထားမိသွားသည်။

ပုံမှန်ဆို ဝမ်ချောင်က ရှဲ့ကျူရှင်းအနား အမြဲကပ်နေတတ်ပြီး ဘယ်နေရာကိုသွားသွား နှစ်ယောက်က မခွဲမခွါနှင့် ထိုင်လျှင်တောင်မှ ပခုံးချင်းကပ်နေတတ်ကြသည်။

ဒီနေ့လည်း ဝမ်ချောင်က အရင်လို ရောက်လာတာ နောက်ကျဆဲဖြစ်ကာ ရှဲ့ကျူရှင်းကလည်း အရင်လို ထောင့်စွန်းခုံတွင် ထိုင်လျက်ရှိနေသည်။ သူ့ဘေးရှိထိုင်ခုံကတော့ ထိုင်မည့်သူလစ်လပ်နေပြီး ကျန်တဲ့အဖွဲ့သားတိုင်းက ထိုထိုင်ခုံကို ဝမ်ချောင်အတွက် မသိမသာ ဖယ်ချန်ထားပေးခြင်းလည်းဖြစ်သည်။ ရလဒ်အနေနှင့်ကတော့ ဝမ်ချောင် ရောက်လာချိန် ထိုနေရာတွင် မထိုင်ဘဲ ဆန့်ကျင်ဘက်ထောင့်စွန်းခုံကို လျှောက်သွားကာ ထိုင်နေသည့် ချန်းယောင့်ကို မောင်းထုတ်၍ ထိုင်ချလိုက်ပြီး သူ့မျက်နှာအမူအရာကလည်း 'ဘယ်သူမှ စကားလာမပြောနဲ့' ဟူသည့် စာတန်း ရေးထိုးထားသလိုဖြစ်နေ၏။

အဖွဲ့သားများကလည်း အလယ်တွင် ညှပ်မိနေလျက် ညာဘက်ရှိ ဝမ်ချောင်ကို ကြည့်လိုက်၊ ဘယ်ဘက်ရှိ ရှဲ့ကျူရှင်းကို ကြည့်လိုက်နှင့် ဘယ်သူမှ မေးခွန်း မထုတ်ရဲဖြစ်နေကြသည်။

ရှဲ့ကျူရှင်းလည်း သူတို့အကြည့်များကို မခံစားမိသလို ဟန်ဆောင်ထားလိုက်သည်။

ထိုနေ့ နေ့လည်ခင်းက ဝမ်ချောင်ရဲ့အတူနေဖို့ ကမ်းလှမ်းချက်ကို သူ ငြင်းပယ်လိုက်ချိန် ဝမ်ချောင် သူ့မာနကို ပစ်ချပြီး ကလေးတစ်ယောက်လို ပြန်သွားခဲ့သည်။ ရှဲ့ကျူရှင်း ထိုအကြောင်းကို ညနေရောက်တဲ့အထိ တွေးကြည့်ပြီးမှ ဝမ်ချောင် စိတ်ခုသွားအောင် မလုပ်ချင်တာမို့ စိတ်ဆုံးဖြတ်ကာ ဖုန်းခေါ်၍ရှင်းပြဖို့ လုပ်လိုက်သည်။ ပထမတစ်ခေါက်တွင် ဘယ်သူမှ ပြန်မဖြေ။ ဒုတိယတစ်ခေါက်တွင် ဖုန်းဖြေဆိုလာသူက ကောင်မလေးတစ်ယောက်ဖြစ်နေသည်။