I become your flower (one shot collection & Short Stories)(unicode+zawgyi)

Dear... (I)

အနည်းငယ် ဝါ၍ နွမ်းဖတ်နေသော စာအိတ်များသည် ထင်းရှူးသေတ္တာထဲမှာ အစီအရီ။
မေမေ့ဆီမှ အသက်ရှူသံသဲ့သဲ့ကို ကြားရသည်။

ခပ်သော့သော့ လက်ရေးကလေးများသည် မညီမညာ။ သို့သော ယောက်ျားဆန်ပြီး ကြည့်ကောင်းသည်။ ဘယ်လိုပဲဖြစ်ဖြစ် မေမေ့ကို သဝန်တိုမိသည်။ အရှေ့တိုင်းသူ မေမေက ဒီလိုကိစ္စတွေမှာ သားအပေါ် ရဲတင်းနိုင်လဲလို့ နားမလည်။
ဘယ်နှကြိမ်၊ ဘယ်နှခါ ဖွင့်ဖောက်ထားလို့ အနည်းငယ် တွန့်ခေါက် နေသည် မသိရ။

တစ်ခါမှ ဖေဖေ့ကို မချစ်ခဲ့သည့် အမျိုးသမီးကတော့ ကုတင်ထက်မှာ နောက်ဆုံးနေ့ရက်သို့ ရောက်နေပြီ။

လွန်ခဲ့သော နှစ်ပေါင်း (၃၀)က အားမနာတမ်း သည်းဆည်းထားသည့် စာများ။ မေမေက ကတိတစ်ခုကိုသာ နောက်ဆုံးဆန္ဒအဖြစ် တောင်းသည်။ ဖေဖေကလည်း လိုက်လျောချင်မည်ကို သိပါသည်။
နှုတ်ခမ်းကို သူ ကိုက်ထားလိုက်သည်။
မေမေ့ဘဝသက်တမ်း တစ်လျှောက်လုံး သိမ်းဆည်းထားခဲ့ရသူက...။

1990 Nov,

ခိုက်ခိုက်တုန်အေးလွန်းတဲ့ ဆောင်းညများမှာပင် ဘယ်နှစ်ခေါက်မှန်းမသိအောင် ယွန်းဂီ စာကို ဖောက်ဖတ်လိုက်သည်။
လက်ရေးဝိုင်းဝိုင်းကလေးများသည် ညီညာသည်။

ချစ်သောရေ...
ပြောချင်သည့်အကြောင်းအရာများကို စီကာပတ်ကုံး ရေးဖွဲ့ထားတာ ချစ်စရာကောင်းလှသည်။
မိုက်ကယ်(အိမ်ကခွေး) မိန်းမရတာလည်း ပါသည်။
ရပ်ကွက်ထဲမှာ အဒေါ်ကြီးများအကြောင်းပါသည်။
ဂိမ်းဆိုင်မှာ ဂိမ်းရှုံးသွားတာလည်း ပါသည်။
သတိရလို့ ညတိုင်း ငိုမိကြောင်းလည်း ပါသည်။
ရေဒီယိုနားထောင်ရင်း စာလုပ်ဖြစ်ကြောင်း ပါသည်။

အထက်တန်းကျောင်းသားလေး၏ ပါးဖောင်းဖောင်းလေးများကိုသာ သူ မြင်ယောင်နေမိသည်။ မေမေ့ကို အစ်မကြီး တစ်ယောက်လို အားကိုးတဲ့ ကောင်ငယ်ကလေးကို သူ မြင်ယောင်မိသည်။

Lee Moon Se ရဲ့ I don't know yet ကို ဘယ်နှခေါက် နားထောင်နေမှာလဲလို့ သူတွေးမိသေးသည်။

အငိုသန်တတ်ကြောင်း ရောက်လာခဲ့တဲ့စာတွေအရ သိရသည်။

ခပ်ဖြဖြ မီးရောင် ဝါကျင့်ကျင့်အောက်တွင် အနည်းငယ် တွန့်ခေါက်နေသောစာများကို လက်ဖြင့်သူ ပွတ်၍ ညီညာအောင် ဖြန့်နေလိုက်သည်။
စာအိတ်များပေါ်တွင် နံပါတ်စဉ် အစဉ်လိုက် သူတပ်လိုက်သည်။