اسكريبتات سليم ومسك

اسكربت ١٣

_ دخلي البنوته اللى برا  يا علا
_حاضر يادكتورة

عدا ١٠ دقايق والباب خبط ودخلت علا والبنوتة ومعاها واحد حاجه كده طول بعرض بغمازات في حياتي مشفتش غمازات كده ولا وقاحه كده  ربنا يلمني بقى

_ أذيك يا كتكوته أسمك أيه؟
_ أسمي فريدة ياطنط
_ واو أسمك حلو أوي ممكن تروحي مع طنط علا وتلعبي معاها وتسيبنيا شوية

مشيت البنت وفضلت أنا والمكتب والاستاذ أبو طويلة

_ ممكن أعرف من حضرتك البنت مالها
بصلي وكشر وعلى صوته عليا
_ نعم ياختي؟ أنا جاي هنا ودافع فلوس عشان تسأليني البت مالها مش دي شغلتك؟! اتصرفي
طبعا من قواعد الطب النفسي أني امتص غضب اللى قدامي وده اللى انا عملته بالظبط احم على قد ماعرفت يعني
_دافع فلوس؟! أنت بتزعقلي ياجدع أنت ؟! لتكون الدنيا خدتك وفهمتك أني عشان شكلي مؤدب  هخاف من تجعيرك ده دانا من  الجيزة 
بصيت في عينه جواها كلام كتير ومشاعر أكتر ،قسوة وخوف وقلق ووجع والاسوء مشاعر لوم ، سابني ولبس نضارته وقام وفتح الباب ومشي

_ أنا هاخد بنتي وهمشي مش هسيبها مع واحده شرشوحه زيك

انا شرشوحه ؟!، طب والله لوريره الشرشحه اللى على اصولها ف داخيه سمعه العيادة انا اصلا نفسي افتح مشروع كتاكيت

_ بقى انا شرشوحه يا..
_ طنط هو حضرتك عندك عرايس ديزني جوا؟

هديت ونزلت لمستواها ولعبت في شعرها  وقولتلها
_يالا ياقمر ندخل جوا نجيبهم ، بس قوليلي مين ده
_ دا بابي ياطنط

مشيت واتعمدت ابصله وانا واخده البنت جوا وعلى وشي اكتر ابتسامه سمجه هتشوفها في حياتك
وقولت بصوت وصل ليه
_ أنا هعلمك أزاي تتفي على بابي ياروحي
وقفلت الباب ورايا

من كلامي مع البنت فهمت أنها في حالة صدمة من وفاة والدتها وأنها مش متقبله فكرة عدم وجود مامتها في حياتها  فضلت قاعدة معايا ولعبت وانا طبعا مش قصدي اتاخر جوا دي مش اخلاق دكاترة طبعا، طلبت من علا تدخله

_ أحم بعيدا عن التاتش البايخ اللى حصل بس اللى فهمته  من فريدة انها في حاله صدمه من وفاة والدتها وانها مش متقبلها احم ممكن اعرف من حضرتك كام معلومه

_ انجزي
_ اللهم طولك ياروح ، مرات سيدتك اللى ربنا انعم عليها وماتت وارتاحت منك ، ماتت ازاي
بصلي بخوف ولا كانه عامل مصيبة وخايف يتقفش وقال
_ ميخصكيش وانا غلطان اني جيت لواحده مبتعرفش تشوف شغلها  زيك  ولسانها طويل

سابني وخد فريدة ومشي طبعا لو حد كان حلفلي على المصحف ان دماغي هتفضل تاكلني لمدة اسبوعين بسببه مكنتش هصدق هموت واعرف ماتت ازاي ، الفضول  حقيقي حقير ، ومع ذلك مشفتش فريدة من ساعتها ولا حتى بيرد عليا لما اكلمه على الرقم اللى سابه