- مسحت دمعه نزلت من عيني:- كفاية لحد كده، كفايه دموع، اي هقعد لحد امتي اعيط على حاجه راحت، لازم افوق لنفسي، كفايه وجع وقهر وحزن لحد كده، من الساعة دي مفيش غير الفرح، الفرح وبس.
حسيت بحد بيهز كتفي فَـ بصيت على ايدي اليمين، كانت واحده ست:
- نعم!
- تليفونك يابنتي ليه كتير بيرن وانا بكلمك وانتي مش بتردي عليّ.
- بصيت على الفون، أربعين مكالمة فائته من ياسين.
- رن الفون المكالمة الواحد وأربعين فَـ رديت:- أي وحشتك.
- سدرة ارجعي وبطلي غباء.
- أممم، بصفتي أي؟؟
- حسيته اتوتر:- أختي ووو.. و بنت عمي.
- بتكرهني.
- خبط بإيده على شيء، جايز الترابيزة:- بلاش استفزاز، مابكرهكيش ياغبية، انتي بنت عمي وانا مستحيل اكرهك ولا عايز اخسرك، ارجعي، لأما انا هاجي واجيبك وهزعلك.
- حيلك حيلك ياعمنا، اهدي بس.
- قال بتعب:- مُصره تصعبي الدنيا علينا ليه، ليه مش عايزة تفهمي ولا تقتنعي إني مابكرهكيش ولا عمري كرهتك، أنا بس حبيت اللي اختارها قلبي.
- اتكلمت بطريقته:- ليه مُصر تجرحني، ليه عايزني دايمًا أكون مكسورة، برغم إني بنت عمك، انا كنت معاك فبيت واحد وبناكل من طبق واحد لو فاكر، انا كنت جمبك، بس أنت اللي كنت أناني.
- مش أناني.
- لا أناني.
- قولتلك إني مش أناني، كل الحكاية إني حبيت.
- بقولك اهو إني حابه أكون فمكان مرغوب بوجودي فيه ، كل الحكاية حاسة إني تقيله عليكم، بس ياسيدي.. عايزة أبعد اروح لمكان أرجع فيه سدرة واحده تانيه خالص، أكون حد لطِيف من جوه و من بره، لأني بجد محتاجة اخد ريست من كل حاجه، متخفش انا هرجع، وهرجع اقوي من الأول، بس امتي وفين، ده شيء يعلمة الخالق.
- بلاش تسمعي كلامي، ارجعي عشان عمك طيب.
متتضعفيش، حاولي كمان مَره، انتي قدها، اهدي.
- قوله سدرة هترجع وعن قريب.
قولت آخر كلمة وقفلت فوشه، عملتله بلوك وحذفت رقمه، كان إنجاز عظيم بصراحه، كنت بحس بتعب شديد فقلبي وانا حاطة ايدي على رقمه وهحذفه، لكن دلوقتي أصبح شيء عادي، عملت بلوك وحذفت رقمه، براڤو، أشطر سدرة تستاهل بوسهه.
صفحة وانتهت، نفتح صفحة جديدة، ونبدأ كأننا محصلش حاجه.
نبدأ من جديد، نبدأ على نضافة وبسمه حلوة، والروح اللي اتشوهت هنرجعها لمعدنها وأصلها.
نزلت من القطر وانا مش عارفه وجهتي هتكون فين، بس مكمله فالطريق.
ومن حيث لا أدري تيجي المصايب تدري، خبطت فبنت لها لسان أطول من عمرها.
- مش تحاسبي ياحلوة.
- شاورت عليّ وقالت وهي بتزعق:- مين اللي تحاسب، انا ولا انتي، شكلك عميه.
- سيبت الشنطة على الأرض وحطيت ايدي فوسطي:- لا ياحلوة، فوقي كده واعرفي مقامك، ده انا لسه بقول ياهادي وهبدأ من جديد الاقيكي انتي قدامي.
- عملت ريأكشن بوشها فظيع فظاعة:- نعم نعم نعم ياما.
- زي ماسمعتي ياحلوة.
- ماسمعتش حاجه، سمعني تاني كده قولتي أي.
- اتكلمت بغرور:- مش بعيد كلامي، بقوله مره واحده.
- أممم.
- كله ليكي ياعنيا.
- من أي داهيه محدوفه.
- بصتلها بغل:- من الداهيه اللي جيتي منها.
