لقلبك انتمي

البارت الثاني

رند اخذتهم وتوجهت للقاعه واول ما دخلت تجمعوا عليها الموظفين وسلموا عليها
رند : شوفو صراحه القاعه يرادلها تغيير جذري راح نغير ورق الجدران والمسرح هم الطبلات راح نغير الاغطيه الي عليهم والكراسي هم وهاي النشرات الي داير مداير القاعه تنشال وخلوها تكون الاضاءه مرتبه مو هيج عبالك ديسكو ماشي ؟
الموظف : تمام استاذه بس منو راح يختار الموديلات انسه هيفاء ماخذه اجازه
رند : مو مشكله اني اختار بس حضرولي الكتالوكات
الموظف : تمام استاذه
وكملت شغلها واختارت الموديلات الي عجبتها
الموظفين بردود متفاوته: ماشاءالله عليج استاذه ذوقج خيال اكيد راح تصير القاعه فد شي خرافي
رند بخجل مبطن بالثقه : تسلمون واكيد ما يكمل شي بدون جهودكم وياي يلا بلشو شغل كون منا ليوم الاربعاء كلشي نكمل علمود يوم الخميس الصبح بس نجيك عالبوڤي والموسيقى تماام
الموظفين : تمام استاذه
رند : اي احد عنده استفسار بخصوص الشغل ؟
الموظف : استاذه وطاوله الرئيس
رند داخلها الله ياخذه من مدير : مثل ما اتفقنه تكون قريبه عالمسرح وترتيبها مثل باقي الطاولات بس لون الاغطيه خليها تكون ذهبي والي نبه علي استاذ عبدالله بخصوص انو لازم ثلج ويه المي انتبهو على هالتفاصيل ما نريد استاذ عبدالله ينحط بموقف صعب بسببنه احمد انتبهو جداً على التفاصيل واني اجي الصبح الخميس اجيك كلشي
احمد: تأمرين استاذه بس ممكن سؤال ⁉️
رند : تفضل
احمد بعدم تصديق: صدك راح تحضرين الحفل

والموظفين كلها متعجبه لانها ولا مره مسويتها من توظفت لحد اليوم

رند وهي تتأفف : اي لان هذا طلب الرئيس للشركات
الموظفه : ما تدرين استاذه يمكن يردون يكرموج ويعلون مكانج

رند بداخلها معقوله : ما اعرف هسه عوفوكم من هالحجي وبلشو شغل اني راح اروح خلص دوامي ودعتهم وطلعت تنتظر السايق حتى ترجع للبيت

وبمكاان ثاني مطار بغداد الدولي نزلت طيارته الخاصه ونزل من درج الطياره بشخصيته الواثقه وبطوله الهيبه وهو ينزل ويسلم على مدير اعماله
: اشتاقيتلك يا غالي وهو يسلم علي
سامي : الحمدلله على سلامتك استاذ كلشي مرتب مثل ما طلبت تحب تروح لفلة الوالده لو نروح للشركه ؟
امير : لا خلينا نروح نسلم على امي مشتاقلها
سامي : مثل ما تحب جنابك
وتوجهوا للفله الي اقل ما يقال عنها قصر دخلت السياره من البوابه الرئيسيه والحرس المنتشرين بالفله بشكل يخليك تحس داخل الخضراء مو بيت 😂
امير وهو ينزل من السياره : سامي الوالده هم تعرف بخصوص سفرتي الاخيره ؟
سامي : لا استاذ اطمن هم عبالها رايح متزوج متعه
امير : الله يطيح حظكم على هالسمعه الي ورطتوني بيها
سامي بضحكه مكتومه : جنابك شعلي هي هم عدها مصادرها الخاصه
امير : دامشي امشي كال مصادرها كال 😒
دخل امير للبيت واستقبلته بنت اخته ليان

ليان وهي تركض علي : اموووري اشتاقيتلك يروحي
امير وهو يحضنها : هلا بروح وقلب اموري شلونج ولج ام لسان
ليان : حبيبي انته خالي الغالي شجبتلي وياك من المانيا ؟
امير : اي هنا الحجي كولي هيج من الاول وهو يسوي نفسه زعلان
ليان : لالالالالا والله مو هيج بس ادري بيك ما تنساني وهي تغمزله 😉
امير : هههههههههه وين اكدر على لسانج اني امي وين وزهراء شو ماكو احد ما يدرون بيه جاي شنو ؟
وعلى حجايته نزلت امه من الدرج ويه اخته ( طبعاً خلي احجيلكم شوي عالفله اول ما تدخل بوابه جبيره وداير مدايرها حديقه واسعه وخضار وطاوله طعام وكعده خارجيه كلش حلوه ومن داخل البيت ثمن غرف نوم اربعه منهم سويت كامل ومطبخين وديوان جبير مخصصه امير من يجي ضيوف معزول عن البيت وديوان ثاني بداخل الفله مخصص لامه واستقبالتها وعزايمها السويتات واحد لامير وثاني لامه و واحد لاخته زهراء والرابع لاخو الي عايش بهولندا مهند بعدين نتعرف علي واول ما تدخل الفله صاله جبيره مفتوحه على كل البيت ودرج بالنص فراري من الجهتين مفتوح عالطابق الثاني للبيت ))
ام امير بكل حب وشوق: هلا بريحة هلي هلا بالغالي توه نور العراق كليبي
امير وهو يكوم يبوس راسها : هلا بالغاليه ريحة الجنه مشتاقلج يا كل الدنيه
ام امير تضرب جتفه : عيار يمه من عيارتك علساس كلش صدكتك
امير : ههههههههه والله من قلبي احجي يا غاليه ويدور على زهراء ويسلم عليها ويبوسها من راسها
ام امير : اييي كلي بله شلونها سفرتك العمليه جداً جداً وهي مركزه عالكلمه
امير وهو يعرف قصد امه : الحمدلله كلشي تمام والامور ماشيه عالضبط وصاح علي سامي يجيب الهدايا
سامي : تفضل جنابك اوامر ثانيه ؟
امير : مشكور حبيبي بس جهزلي السياره حتى نروح
ام امير : وين رايح ابني توك اجيت
امير :والله يوم عندي هواي شغل تدرين صارلي شهر ما موجود لازم اجيك كلشي بنفسي
ام امير :محد كلك روح سخت بالمانيا ويه زينه مدري سهر مدري سحر
امير :هههههههههه يمه الله يخليج شمعرفج بيهن عجيبه انتي
زهراء بجديه :خويه ما ناقصك شي انته بس أشر واحنه نخطبلك احلى واحسن وحده بالعراق شلك بهالدرب وانته مركزك ومستواك امي قصدها تخاف عليك من بنات الحرام
امير : افاااا عليج زهوره وتعتقدين اني توفتني هيج سوالف لا تخافين علي بعدين ما اريد اتورط بالزواج هيج مرتاح
ام امير : اوف منك اوف ظل هيج ظل واشلع قلبي ولك يمه فرفح قلبي اريد اشوف ابنك مو كافي اخوك متزوجلي هالهولنديه الله ياخذها وشالع قلبي وانته مخلصها علي من وحده لوحده
امير وهو يروح ويبوس راسها : ههههههه يمه مهند مفتك من هالشيف العدنه قابل مثلي تردين تورطيني بيهن عوفي مرتاح الولد وعايش حياته
ام امير بحزن : اوف منكم اوف
امير بحزن : الله كريم يوم يلا من رخصتكم
طلع من البوابه واستقبله سامي
سامي :جنابك نروح للشركه لو تحب تروح مكان ثاني
امير :سامي اول شي نروح للشركه وتالي نروح لسحر
سامي :استاذ اليوم سحر يم اهلها
امير :لعد نروح للشركه سويت الي كتلك علي ؟
سامي :اكيد جنابك ونبهت عليهم حتى الكل يحظر
امير :سامي ما اريد اي غلطه هاليوم صارلي انتظره اربع سنوات اريد كلشي مثل ما اريد فااااهم
سامي :أطمن جنابك
وتوجهو للشركه وكعد امير يجيك عالشغل ويشوف الامور شلون ماشيه ويعدل عالاخطاء وبعد شغل دام خمس ساعات رفع راسه من عالاوراق الي كدامه
امير :سامي نبهت عالدكتور ما يحجي لامي شي بخصوصي
سامي : لا تخاف جنابك نبهته وهو هم يكلك لازم بعد اسبوع تمر علي حتى يجيك حالتك
امير بحزن : يعني شراح يتغير متكلي
سامي : عمرك طويل يا رب لازم تخلي عندك امل افااا استاذ امير هو اني منين استمد قوتي غير منك
امير : حتى مهند ما اريده يعرف بشي وخصوصي الي صار بالمانيا
سامي : سرك ابير استاذ لا تشيل هم وارتاح
امير : كفو منك
سامي : استاذ لازم ترتاح صارلك هواي تشتغل والدكتور كلك لا تجهد نفسك
امير : اي والله بلش راسي يأذيني خليني اروح ارتاح للبيت مدام خلصنه صدك حضرتلي الخطاب مال يوم الحفل
سامي : كلشي مخلصين باقي بس الكلمه الي تلقيها والجوائز
امير : تمام يلا خلينا نرجع للبيت