لقلبك انتمي

البارت الثالث

اليوم الخميس الصبح ساعه 6:12
كعدت رند مفزوعه
رند :استغفرالله ربي يمته اخلص من هالاحلام وكامت للحمام غسلت وجهه وتعوذت من الشيطان ورجعت للغرفه فتحت تلفونها شافت استاذ عبدالله دازلها رساله واتساب بابا رنوده مو تنسين ما تجين اليوم اعتمد عليج
رند بضوجه : والله شغله هاي انوب هسه هي مال حفلات استغفرالله ربي استغفرالله وراحت لغرفة البنات

رند : بنات يلاااا دوااام
امل وهي بعدها متلفلفه باللحاف: فهمنه شبيج
ليلى :كمنه
رند :تمام نازله جوه  بابا بعده مطالع نزلن نتريك وياا مو تتأخرن راح انزل اني

وكامن البنات كالعاده وهنه يتأففن من كعدة
الصبح
نزلت رند ولكت عمها كاعد يسوي الريوك

رند :صباح الخير لاغلى واحلى بابا بالدنيه
محمد :هلا بالغاليه بت الغالي يلا دامج نزلتي لاااازم تتركين وياي شلون بيض وبصل سويت يلوك لحلكج
رند : هههههههه بابي هو اني اصلاً اشتميت الريحه ونزلت دريت بيك بعدك مطالع
محمد :يلا تعاي عاونيني خلي نحظر السفره وهو يسولف وياها
محمد : بابا رنوده كلي عبدالله علمود الحفله هاي شنو انوب حبيبتي احنه شمتفقين؟
رند بخجل ومحتاره شتكله : والله بابا ما ادري شكلك صراحه اني خجلانه منك گُلش هواي بس واللهي مو اني السبب الرئيس مالت الشركه جاي وطالب انو الكل يتواجدون وهي عود تحاول تضيع السالفه متدري باباتي يمكن يرقوني
محمد : تستاهلين باباتي بس راح تروحين ويه عبدالله لان ما أمن عليج بس يمه وبس يخلص توزيع الجوائز اطلعين
رند : اكيد بابا واني لو علي صدكني ما احظر من الاصل بس عبدالله كال انو الرئيس ما يقبل اعذار
محمد وهو يصب الجاي اله والها :أن شاء الله خير بنتي

ودخلن امل وليلى صبحن على ابوهن وكعدن يتريكن
محمد : يلا بابا اني طالع محتاجات شي ؟
رند وامل :تسلم بابا سلامتك
ليلى :بابا مشتهيه كص للعشاء حباب من تجي
محمد :تدلل بنيتي ومو تنسن خابرن على ايلاف هم تجي عالعشاء فد نوب ثواب اسوي لعمج وامجن
البنات : الله يرحمهم
رند : ولا يهمك بابي روح الدوامك واني ارتب الوضع
محمد : يلا وخليتلجن السايق خاف تحتاجن شي ثيمالا  (( ملاحظه رند كله تصيح لعمها بابا لان هذا طلبه ))
البنات بعد ما طلع ابوهن صعدن يبدلن ويحضرن نفسهن لدوام
رند : بنات فدوه اذا رجعتن اكولي البدله مالتي علمود الحفله لان احتمال ما الحك
امل : رنود يعني اليوم ما راح تتعشين ويانه
رند : لا حبي ارجع على وقت بس اسجل حضور واطلع
ليلى : ويخلوج اطلعين ؟؟
رند بعصبيه : بعد عوزهم يسدون علي الباب طبعاً اطلع بس خلي يحضر ابو شويبه وتالي اطفر
ليلى : منو هذا ؟
رند : اكو غيره الرئيس ( ههههههههه ما تدري بي صاك صكوك والله لو يدري بيج 😂)
امل : خرب عقلج رند وانتي شدراج بي جبير يجوز بعده مو جبير
رند : هسه جبير صغير بس خلي يعدي هاليوم على خير يمعوده لو شايفه استاذ عبدالله خابص روحه خبص عبالك رئيس الدوله جاي ذبحني هالاسبوع
ليلى :اني منج اروح وما اطلع الا لمن اخر واحد يطلع اقفل القاعه على ايدي يلا 😂
رند :ههههههه هاي سوالفج مو سوالفي انا يا دوبي ارجع للبيت تعبانه الي خلك حفلات يلا جااو راح اخذ السايق يجيكم الخط موو ؟
امل : اي اي يجي روحي بس يا بدله تردين اكويلج
رند وهي تطلع من البيت :السوده حب باي
امل :هههههههه مو طبيعيه وربي باااااي
دخلت رند للشركه ومتوجهه لمكتبها وكالعاده عيون الكل منتبهه وتسلم عليها حضورها طاغي البنيه كوه هي 😍
دخلت للمكتب وتبعتها مرام
مرام : صباحو انسه رند من وين تحبين نبلش ؟
رند : صباح النور اول شي جيبيلي ملفات الارشيف السنوي خلي ادققهم قبل لا اسلمهن لاستاذ عبدالله خاف يطلع بيهم غلط وثاني شي اكديلي على البوڤي واكدي عليهم يكون الاكل حار مو يوصل بارد مثل ذيج المره وبعدين اروح للقاعه اذا ماكو شي
اكو بعد شي جديد ؟؟
مرام : لا كلشي مخلصين مثل ما طلبتي وكهوتج؟
رند : لا ما اريد حبيبتي شكراً طلعت مرام وكملت الشغل ويه رند وراحت رند للقاعه تجيك على الترتيب والاوضاع ولكت استاذ عبدالله كبالها
عبدالله :هلا بيها مديرتنه شلونج بابا
رند : هلا بيك استاذ عبدالله هاا بشرني عجبك ديكور القاعه الجديد
عبدالله :صراحه كسرتي على هيفاء
رند : ههههههههه لا عاد الا هيفاء فنانه ماشاءالله عليها ما اقبل عليها
واستأذنت منه علمود تروح تتأكد من طاوله الرئيس ابو شويبه على كولتها 😂وتشوف البوڤي وشافت كلشي اوكي وطلعت راحت للبيت علمود تبدل ترتاح شوي وتبدل ملابسها
عبدالله : رند امر عليج الساعه سته ونص اوكي بابا
رند : تمام استاذ تلاكني جاهزه يلا مع السلامه
ورجعت ويه السايق للبيت لكت البنات قبلها بالبيت بس عمها بعده مجاي هو يرجع بالاربعه للبيت
رند  : سلاااام
امل : هلا هااا اصب غده
رند : ههههههههه بسم الله شبيج خلي ادخل اول
امل : ههههههه ولج ميته جوع وهاي ما تقبل اصب تكول الا تجي رند 😒
رند : اي معدله قابل مثلج اهم شي كرشج 😂
امل وهي مبوزه : هسه اروح اصب مو متت جوع
رند : روحي على ما ابدل ملابسي واجي عود ردت اسبح بس كسرتي خاطري
امل : لا دخيلج عوفي النظافه هسه على صفحه بسرعه نزلي وصيحي وياج هاي المخبله
رند :هههههههه صار
صعدت رند بدلت عالسريع وصاحت ليلي وكعدن يتغدن وبالاثناء دخل ابوهن وصبله وكعدو ياكلون سوه وكامت رند شالت السفره وغسلت الاماعين وامل عزلت المطبخ وليلى صبت لابوها جاي صعدت رند تحضر ملابسها شافت امل كاويتلها البدله بس ما عجبها تلبسها فطلعتها ستره سوده كيلوت اسود وطلعت وياها حذاء وجنطه وحجاب ورتبت ملابسها عالجربايه واختارت شتحط ميكاب وعطر ودخلت للحمام اخذت دوش سريع وطلعت حطت ميكاب خفيف وحمره خفيفه لان تعرف اكو هواي زلم وشباب راح يكونون بالحفله وجهزت نفسها ونزلت تتنظر عبدالله

امل : بسم الله الرحمن الرحيم شبيج رايحه فاتحه
ليلى : صدك جذب رند عود صدك تحجين جان لبستي غير لون
رند وهي تباعلهن صفح : هيج احسن كومه زلم حتكون موجوده وهم هي حفله عمل مو عرس
امل : اذا قصدج عدم لفت الانتباه لا ابشرج حتى لو لبستي كونيه القالب غالب
ليلى : اي والله رند جميله ماشاءالله الله ينطينه شوي من جمالج وهي رافعه ايديها تدعي
رند : هههههههه عليجن سوالف ودك تلفونها ردت وكالت هياتني طالعه استاذ
رند : يلا اني طالعه كلي لبابي اذا اجه خلي يتصل بالسبعه ونص على عبدالله حتى يرجعني مو تنسن
امل : ماشي وكامت تسد وراها الباب
ليلى تحاجي امل : قنبله طلعت مو بشرفج
امل : كولي ماشاءالله صلي على محمد لا تحسدين البنيه شبيج
ليلى : ماشاءالله شبيج احسد اختي عاد بس صدك طلعت حلوه
امل :  اي والله الفطيره عود لابسه اسود حتى عود محد ينتبه عليها 😂
وصلت رند واستاذ عبدالله للقاعه ودخلت بمشيتها الي تجبر الواحد يلتفت عليها عبالك عارضه ازياء وبطولها المتناسق ويه جسمها وسلمت عالموظفين
مرام : ماشاءالله عليج استاذه رند صبح او ليل جميله
رند الي خجلت من نضراتهم الها بس ما حبت تبين انها خجلانه وحجت بثقه : حبيبتي مرام الجمال جمال عيونج
مرام : لا احنه نصير على صفحه بحضورج 😂😍
وكلهم عبدالله انو الرئيس اجه وراحوا المدراء  يم الباب وطلب من رند تجي وياه باعتبارها المديره التنفيذيه بالشركه
عبدالله : اشرقت وانورت استاذ امير شرفتنه بحضورك
امير وعيونه على رند الي واكفه وره عبدالله ومنزله عيونها عالارض : هلا بيك استاذ عبدالله تسلملي النور نوركم
رند  بعد ما سمعت صوته جذبها ورفعت راسها بداخلها لااا مستحيل يكون هوه مستحيل
امير بعد ما سلم عالمدراء : استاذ عبدالله شنو موضفينك ما يعجبهم يسلمون علينا 😏
عبدالله الي عرف قصده :حشى منك استاذ امير بس هي خجوله شوي وهو يأشر بيده لرند حتى تسلم علي
رفعت رند راسها والتقت عيونهه  الزجاجيه الساحره بعيونه العسليه الجريئه وهو كصها كص بعيونه من راسها لرجليها
امير :تشرفنا يا......

يتبع .....
فدوه بنات لا تنسون التصويت للقصه حتى تصعد واكدر اكمل البارتات قراءه ممتعه ❤️🌹