دوزو النهار في الحلوة مجمعين بزوج بيهم .. و خيرة لحظت تعامل مينة معاها كانت نهار كلو شارية راحتها و ترضي عليها حيت عاوناتها حسستاها بحال اللي معرفت شنو دارت معاها .. وحتى خيرة كانت مدوزة معاها النهار منسية همها اللي ما باغياش تفكر فيه ، من جهة كان خصامهم .. و من جهة هو اللي مدور وجهو عليها بسهولة... حتى اتصال ما خسرو عليها طول النهار....
جالسين تيستفو الحلوة في سطولة .. العشية و الهوا بارد داخل .. حتى تدقات عليهم الباب ، ناضت خيرة تفتح كانت هبة و لبنى جابو ليها ياقوت .. سلمات عليهم وخدات من عندهم ياقوت تتبوس فيها موحشاها .. دخلو للدار سلمو البنات على مينة وجلسوو..
هبة: (جلسات كانت لابسة سروال دجين مزير و تيشورت قصير..) الله يعطيكم الصحة الحلوة زوييينة..
مينة: الله يعطيك الصحة ابنييتي .. كيف دايرة ماماك .. مالها ما جاتش معاكم...
هبة: سلمات عليكم بزاف هي و صفاء...
مينة: سلم عليهم الخييير و الرباااح... (شافت في لبنى اللي غير ساكتة) كيف دايرة آ لبنى
لبنى: (تبسمت) الحمد لله بخييير...
خيرة: (شادة عندها الياقوت تضحك معاها) متوحشتينيش الخانزة؟؟
مينة: وهانتي الياقوت غبرتي علينا نهااار بقات بلاصتك توحشناااهاا....
هبة: قبيلة كالسة تهضر وتجبد فسمياتكم هههه
مينة: الله يحفظها وينجيها ياربي ..
خيرة: امييين..
جلسو مجمعين وهبة تطلق ليها اللسان كثر ما مطلوق خاص غير اللي يجبدها .. كتشد الهضرة مع بنادم ما تطلقهاش .. حطات ليهم خيرى الحلوة مع اتاي يدوقو منها وهوما كيتعاودو....
تفتح الباب ودخل ادريس جلس على عكس سفيان اللي طلع يدوش... سلم عليهم إدريس غير وصل عند هبة مداتلو يدها و حرك صبعو السبابة وسط راحة يدها ، حتى خطفاتها منو جامعاها تتبلع في ريقها... وهو حنا راسو متبسم وجلس حابس ضحكتو...
هبة غير تدور في عينيها . بزوج جالسين على الجمر! كل واحد مقنت في جهة غير كيدورو في عينيهم كيتبادلو النظرات من تحت لتحت..!
هز حلوة داقها كيتبنن...
ادريس: شفتو راه مكاين ما حسن من الحلوة لي كادير مييي بنّتها بوحدها خلينا من زواق ديال دابا...
مينة: لا لا مك شرفات و تلفات بيها .. خيرة لي دارتها الله يعطيهااا الصحة..
وهوما تيهضرو دخل سفيان شاف في الجميع بإبتسامة خفيفة .. سلم على الكل بما فيهم خيرة اللي تعاملت ببرود مداتلو يدها بالصواب و جلس جنبها متنهد... و خذا منها ياقوت متبسم تيسلم عليها...
سفيان: (تيبرك على خدودها بلطف) كون يحسابلي ليا جيتي كون جيت بكرري ..
ادريس: (تياكل ويهضر) الله يعطيك الصحة اخيرة..
YOU ARE READING
تحزمت بحزام راشي
Short Storyتحزّمت بحزام راشي؛ قصة باينة من عنوانها ، عامرة حزامات راشية و بعيدة كل البعد على المثالية و الزواق و الحياة الفانيدية ! قراءة ممتعة..
