تحزمت بحزام راشي

الجزء 60

جلست تتنشف شعرها طالقة رجليها وهو واقف تيلبس عليه ..

صفاء: رجليا تيضروني..

طاهر: (شاف فيها) هاداك غير تنقاز ديال لبارح..

صفاء: (بدلع)  مكرهتش شي مساج والله..

طاهر: (لبس ساعته) تاا رجع ..

جمعت شعرها وناضت تتقاد ليه الكول ديال القاميجة وبدات تغطي ليه واحد الطبعة كانت باينة شوية..

صفاء: متعطلش كنقنط ..

طاهر: (حرك ليها راسه بايجاب) واخاا  الالة ..خاصك شي حاجة ؟

صفاء: (علات حاجبها)  اه خاصك تشري ليا خاااطري وراحتييي ..

طاهر: (حك في دقنه)  شنو ناقصك ؟

صفاء :(بنفخة) كلشيي  وزايدني نت (بضيم) راك عارفني الى مشيت تا حقدت خلات عليكم كاملين !

طاهر: (باسها باش تسكت معندو خاطر) الله يهديك..

هز سوارتو وخرح داز من حدا الكوزينة بانت ليه فوزية مطيبة الغذا ومسالية .. دخل عندها  شافت فيه ورجعت حنات مكملة شغالها وتاهي حاس بها ماشي تا لتما..

طاهر: فوزية خاصك شي حاجة ؟

فوزية: (ببرود) والو !

طاهر: (بحيرة) واش عندك شي حاجة معجبتنيش ؟

فوزية: (حطت لي في يدها وشافت عنده ) فاش ضريتك حتى تمشي لمرتك .. وتعاود ليها سرار لي بيناتنا.   وتجي تعايرني بيهم !

طاهر: (تنهد) مااݣلت لييها والو افوزية .. لمهم ماتديش  عليهااا .. والى لقيتي كيفاش عطيها تيسااع انا مقادش على صداع ..(بغى بمشي ويرجع) هي مرتي ونتي الامانة ديال سماعين حتى وحدة مابرانية !

فوزية: (تبسمت) الله يرحم ليك الوالدين ..

دخلات داكساع لقاتو واقف معاها..عقدت حجبانها وقلبها تشد الموت عندها هي تشوفوهم واقفين بجوج شاركين الكلام ! طاهر دار خارج شاف لعندها وكمل طريق وفوزية رجعت لشغالها  وهي قربت عندها وقفت عليها تتكلم بالهداوة..

صفاء: كاينين جوج سيناريوهات غاتخرجي بيهم من هاد الدار !

فوزية ضيقت عينيها فيها تتسناها شنو تقول..

صفاء: اللول تهزيي براهشك وتجمعي ديك شوية ديال الكرامة لي بقات ليك وتخرجي براسك مرفوع ! (تبسمت ببرود) والثانيي تخرجي بشي فضييحة وراسك في الارض  يجريو عليك ويتبراو منك .. ونتي ختاري ..

كملات كلامها وخرجت بهدوء خلات فوزية تتشوف  عاين باين تتهدد فيها وعارفاها دير ما كثر ولات تتوقع منها اي حاجة....

كانت في المحل تتشغل راسها مع الكليان  وتحاول تتناسى .. سيمانة دالعيد المحل متيحواش.. جلست تترتاح عيات .. حطت يدها على خدها تتفكر فيه .. مؤخرا ولات تتحسو تيتهرب ، وبحال اللي تبدل ، قالت يمكن ندم  فاش تواجه مع واليديه .. يمكن فيقوه وردو ليه العقل !  حتى ولا تيشوف زواجه معاها غلطة كان غايرتاكبها !  كاع الافكار طاحو في  بالها .. حتى مرضت وتازمت نفسيا..