تحزمت بحزام راشي

الجزء 52

صدماتها بهداك الكلام بقات غير تترمش ..! خلات لسانها مشلول و وذنيها ما متيقينش اش سمعو .. وانيسة تتاسف وتعتاذر وتشد فيدها  مقربة عندها ندمت الللي خلات الغضب يسيطر عليها وهي ماشي في صالحها تشري صداع مع احلام حاليا ! خافت تمشي تحط كلشي لعبد الغني...

احلام: (بهدوء) صافي انيسة بلا متبقاي تصرفي هكا .. عادي ماطرا والو..

انيسة: (بلعت ريقها) متديش على كلامي ، عبد الغني كون مكنتيش عندو عزيزة ميجيبكش وسط عائلتو..

احلام: (تبسمت) تانا كون معرفتش قيمتي عندو منجييش لهناا آ انيسة ! انا جيت على وديت ليليا رغابتني..

انيسة: (طبطبت على كتفها) صافي نساي احبيبة عفاك ..  و موضوع صابر نهضروو فيه من بعد ماشي وقتو دبا.. وخا ؟

هزت ليها براسها..   وفدوك الاثناء خرجووو لاطارت ديال عيد ميلاد ..كلشي بدا يغني ليها ويصفق وليليا وسطهم فرحانة ..قطعو الحلوة وبداو يرقصوو دراري صغار وياكلو فرحانيين ..بداو ياخدو في الصور تجمعوو مع ليليا من غير احلام اللي بقات بعيدة كانت صورة جامعة غير العائلة..تلفت ليها عبد الغني ومشا عندها شدها من يدها..

عبد الغني: مالك واقفة هنا اجي تصوري..

مخلاهاش فين تجاوبوو جرها وقفها حداه وخداو واحد الصورة جماعية بعدها تفرقو مكملين الحلفة  بنشاط واجواء زوينة..

كانو راكبين مرجعها للدار..قالبة وجهها لزاج ساكتة وتفكيرها مع كلام انيسة .. وهو مرة مرة يشوف عندها حتى ركن طموبيل وشاف لعندها باهتمام..

عبد الغني: دبا مالك قابلة علينا وجهك ؟

احلام: (شافت عنده وقالت ببرود) عادي شنو بغيتني ندير ؟

عبد الغني: (تنهد) ماشي هاكا مولفة تكوني..

احلام: الساعة الله ..

عبد الغني: (لاح يده على الكوسان مضيق فيها عينيه) ولات تجيك ثقيلة تكوني معايا في بلاصة وحدة...

احلام: (تنهدت) انا مكنتش باغية نجيي .. غير  مابغيتش نردها في وجه ليليا ..

عبد الغني: علاش ؟

احلام: الجواب عندك ..

عبد الغني :(حك في شعره بحيرة ) شوفي انا

احلام :(قاطعاتو) انا مفهمتش انا وياك شنو كنديرو ؟ ياك سالينا العلاقة علاش مزال كانتلاقاو  علاش مزال تتعيط ليا ؟ (بسخرية) زعما اصدقاء باش نكونوو صريحين مع بعضياتنا ومنزوقوووش فالكلاام لا نت كتشوفني صديقة لا انا كنشوفك صديق ..

عبد الغني: (تبسم وقرب بوجه لعندها بنظرة ساحرة) فهادي متافق معاك..

احلام: اوا الحمد لله اذا غاتكون فاهم بلي منقدروش نكونو انا وياك فبلاصة وحدة وبوحدنا !!