ဖဝါးထက်က ပုလဲသွယ်

ဖဝါးထက်က ပုလဲသွယ် (၄၂)

Translation of Pearl In The Palm.

ဖဝါးထက်က ပုလဲသွယ် (၄၂)

Translator - Jinnie Grace

_______

ယဲ့လီကျူးက ကျန်းရန်ယိကို ရှာကာ ကျောင်းယန်နန်းဆောင်သို့ အတူတူသွားချင်သည်။

ယဲ့ဖူအန်းက ပြောလိုက်၏။ “ကျူးကျူး အဖေသွားတော့မယ်။ နန်းတော်ထဲမှာ ဂရုစိုက်နော်”

ယဲ့လီကျူးကခေါင်းညိတ်ပြလိုက်သည်။

ကျန်းရန်ယိကို ရှာတွေ့တော့ နှစ်ဦးသား ကျောင်းယန်နန်းဆောင်သို့ သွားကြသည်။ သူမတို့ ရောက်ကြောင်းကို သတင်းပို့ပြီး အထဲသို့ ဝင်ကြ၏။

မိဖုရားခေါင်ကြီးက ထွက်မလာသေးသလို မိဖုရားတွေ၊ ကိုယ်လုပ်တော်တွေလည်း မရောက်ကြသေးပေ။ ရှိနေကြသည်က အဆင့်နိမ့်မိဖုရားတွေ၊ သခင်မတွေလောက်သာ ရှိသေးသည်။

ယဲ့လီကျူးနှင့် ကျန်းရန်ယိ ရောက်ရောက်ခြင်းမှာပင် သွမ့်မြို့စားကတော်က သူမနားသို့ ခေါ်၏။

သူမတို့နှစ်ဦးလည်း သွားထိုင်လိုက်ကြသည်။

မြို့စားက‌တော်က ကျန်းရန်ယိကို ဖမ်းထားသည်။

ကျန်းရန်ယိကလည်း ယဲ့လီကျူးလိုပင် ဗြောင်အင်္ကျီကိုသာ ဝတ်ဆင်ထားကာ သူမတို့က အရမ်းကြီး ကြွားဝါထားခြင်းမျိုး မရှိပေ။ နှစ်ဦးသားက ရှားပါးရတနာတွေနှင့်ပြုလုပ်ထားသည့် ရွှေဆွဲသီးလေးတွေကိုတော့ ဝတ်ဆင်ထားကြသည်။ ရွှေက အရောင်ဝင်းတောက်ကာ တန်ဖိုးကြီးမှန်းသိသာသည်။ ကျန်းရန်ယိကလည်း အစိမ်းရောင်လက်ကောက်လေးကိုပါ ဝတ်ဆင်ထားသေးသည်။ ကြည့်လိုက်တာနှင့် အတော်လေးကိုလှကာ ငွေစထောင်ပေါင်းများစွာ တန်မည့်ပုံပင်။

ကျန်ရန်ယိက အလိုလိုက်ခံထားရသူမှန်း သွမ့်မြို့စားကတော် အတပ်သိသည်။ သူမကိုသာ ထျန်မိသားစုထဲ ဝင်ခွင့်ပေးလိုက်ပါက ခန်းဝင်ပစ္စည်းတွေ ယူလာမှာ မနည်းမနောပင်။

ထျန်ချောင်းနှင့် ဝူရင်းက အတော်လေး ရင်းနှီးကြသည်။ ဝူရင်းကို ယဲ့အိမ်တော်က ကန်ထုတ်လိုက်သည်မို့ ထျန်ချောင်းက ယဲ့လီကျူးကို မကြည်ပေ။ ထျန်မိသားစုနှင့် လက်ထပ်မည့် ကျန်းရန်ယိကိုတော့ အတော် မျက်နှာသာပေးသည်။ သူမအမေက ပြောထားသည်လေ။ ကျန်းမိသားစုက ချမ်းသာသည်မို့ အိမ်တော်ကို ကျန်းရန်ယိရောက်လာလျှင် ပစ္စည်းတွေ အများကြီး ပါလာမည်တဲ့။ ထျန်ချောင်းသာ ကျန်းရန်ယိနှင့် တည့်ပါက ပစ္စည်းတွေကိုမျှဝေသုံးနိုင်မည်တဲ့။