ဖဝါးထက်က ပုလဲသွယ်

ဖဝါးထက်က ပုလဲသွယ် (၆၁)

Translation of Pearl In The Palm.

Translator - Jinnie Grace

ဖဝါးထက်က ပုလဲသွယ် (၆၁)

________

တိ‌ရှောင်းက ယဲ့လီကျူးကို အေးစက်စွာကြည့်လိုက်သည်။

ထို့နောက် သူမကို အကြည့်ရပ်ကာ ယဲ့ဖူအန်းနှင့်အတူ တံခါးအပြင်သို့ထွက်သွားလိုက်တော့သည်။

ယဲ့ဖူအန်းက စိတ်ထဲတွင်တော့ တိရှောင်းကို ဆဲနေမိသည်။ အရှက်မရှိတဲ့ကောင်။ သမီးလုပ်သူက သူ့ကို ဦးရီးတော်လို့ ခေါ်နေတာတောင် နွားအိုက မြက်နုကြိုက်နေသေးတယ်။

လှည်းပေါ်ရောက်တော့ ယဲ့လီကျူးက ခေါင်းအုံးကို မှီထားကာ မေးလာသည်။ “အဖေ မင်းသားချင်နဲ့ ဘာတွေပြောလာတာလဲဟင်”

ယဲ့ဖူအန်းက သမီးလုပ်သူကို ရေသောက်စေလိုက်သည်။ “ရုံးတော်က ကိစ္စတွေပါကွယ် ။ မသိချင်ပါနဲ့။ အိမ်မှာပဲ လိမ်လိမ်မာမာနေ”

ယဲ့လီကျူးက မျက်နှာလေးနီနေတာကို ဖုံးကာ ဂရုမစိုက်ဟန်နှင့် မေးလိုက်ပြန်သည်။ “အ‌ဖေ မင်းသားချင်က လက်ထပ်ဖို့ ပြောတယ်ဆို”

ယဲ့ဖူအန်းမျက်နှာ တစ်မျိုးပြောင်းသွားသည်။

“သမီးကိုဘယ်သူပြောတာလဲ”

ဆံပင်တွေနှင့် ကာနေတာမို့ ယဲ့လီကျူး၏မျက်နှာ ရဲနေတာကို ယဲ့ဖူအန်းမမြင်ရပေ။

ယဲ့ဖူအန်းတစ်ယောက် တံခါးစောင့်တွေကို ကန်သာထုတ်ချင်တော့သည်။ သင်းတို့ပြောတာနဲ့ သမီးလေးက ကြားကုန်ပြီ။

သူက ပြန်ဖြေလိုက်၏။ “ပြောပေမဲ့ သမီးဖို့ အဖေငြင်းလိုက်တယ်”

ယဲ့လီကျူးက ဒေါသတကြီး ပြောတော့သည်။ “အဖေက သမီးကိုမမေးဘဲ ဘာလို့ငြင်းလိုက်ရတာလဲ”

ငြင်းပါတယ်ဆို ဘာလို့ငြင်းတာလဲက ရှိသေးလို့လား။

ယဲ့ဖူအန်းတစ်ယောက် သူ့သမီး တိရှောင်းအကြောင်းပြောတာကို မကြိုက်ပေ။ ထို့ကြောင့် သူက ယဲ့လီကျူး ပခုံးလေးကိုပုတ်ကာ “လက်ထပ်တယ်ဆိုတာ မိဘတွေရဲ့ တာဝန်ပါ။ အဖေက သမီးကို ထိခိုက်အောင်လုပ်ပါ့မလား။ ကျူးကျူး အဖေ့စကားကို နားထောင်ပါ။ မင်းသားချင်က ရုပ်ချောပြီး အာဏာရှိတယ်ဆိုပေမဲ့ လက်ထပ်လို့ကောင်းတဲ့သူမဟုတ်ဘူး”