[COMPLETED]ကျုန်းလိဘုရင်က ဒီနေ့လဲသူ့ဇနီးတွေကိုအလိုလိုက်နေပြန်ပြီ

(၉၃)

U••

[အလှတရားပေါ်ထွက်လာခြင်း]

ဘဏ္ဍာရေးအမတ်အိမ်တော်၊ သမီးတော်ချင်ယွဲ့ယန်၏ဈာပန။

အိမ်တော်တစ်ခုလုံး၏အခြေအနေကမှောင်မှိုင်းလျက်။ ဈာပနသို့လာသူများသည်ပင် အရိပ်အခြည်အကဲခတ်၍ တတ်နိုင်သလောက် အသံမထွက်ပဲနေမိကြလေသည်။ ဝတ်ရုံဖြူဝတ်ဆင်ထားသည့်ဘဏ္ဍာရေးအမတ်ကမူ ပြုံးလဲမပြုံးသလို ထင်ထားသလို ငိုလည်းငိုမနေချေ။ ၎င်းပုံမှန်အတိုင်းပြုမူနေသည်ကပင် မြင်သူလူအပေါင်းကိုဝမ်းနည်းစေ၏။

ချင်ယွဲ့ယန်ကမည်သူနည်း။ ဘဏ္ဍာရေးအမတ်ကြီးအလွန်ချစ်မြတ်နိုး၍တန်ဖိုးထားရပါသော သမီးတော်လေးပင်မဟုတ်ပါလား။ သူမအတွက်ဆိုလျှင် အမတ်ကြီးကကောင်းကင်မှကြယ်များကိုပင်ခူးဆွတ်ပေးနိုင်သည်အထိ သမီးတော်ကိုအလွန်ချစ်မြတ်နိုး၊အလိုလိုက်ထားကြောင်းလူတိုင်းသိကြသည်ပင်။

ထို့အပြင်ယွဲ့ယန်ကလည်း လိမ္မာရေးခြားရှိ၍ ဖခင်စကားကိုနားထောင်သည့် ယဉ်ကျေးသိမ်မွေ့သောမိန်းမပျိုလေးသာဖြစ်၏။ ထိုအရည်အချင်းရှိသော မိန်းမကောင်းလေးက ငယ်ငယ်ရွယ်ရွယ်၌အသက်ဆုံးရှုံးခဲ့ရသည်မို့ ကြားရသူတိုင်းနှမြောတသစုတ်သက်မိကြလေသည်။

နောင်များတွင်တော့ သူမလေး၏ ရေပြာကဲ့သို့တောက်ပသည့်မျက်ဝန်းများကိုမြင်နိုင်တော့မည်မဟုတ်သလို နာမည်ကြီးလှပါသည့် 'အပျော်မယ်၏တမ်းချင်း'ကကွက်ကိုလည်း ထပ်မံတွေ့ရတော့မည်မဟုတ်ချေ။

သမီးဖြစ်သူ၏အရိုးပြာအိုးကို မျက်နှာတစ်ချက်မပျက်ဘဲ စိုက်ကြည့်နေသော ဘဏ္ဍာရေးအမတ်ကိုကြည့်ရင်း ၎င်းဘာမှမဖြစ်သယောင်ဟန်ဆောင်နေသည်အထင်ဖြင့် အတိုင်ပင်ခံအမတ်ကြီးကနှစ်သိမ့်လေသည်။

"သွားတဲ့သူကသွားပြီပဲ။ ခင်ဗျားကိုယ့်ကိုကိုယ်သာဂရုစိုက်ပါတော့။ ခင်ဗျားရဲ့သမီးလေးကလည်း သူ့အဖေကျန်းမာရေးမကောင်းတာကိုမြင်ချင်မှာမဟုတ်ဘူးလေ"

ဝိညာဉ်ပူဇော်သည့်အမွှေးတိုင်ကိုမျက်နှာသေဖြင့်စိုက်ကြည့်နေသည့် ဘဏ္ဍာရေးအမတ်ကြီးက အတိုင်ပင်ခံအမတ်ကြီး၏စကားကြောင့်ခေါင်းသာငြိမ့်ပြသည်။