[COMPLETED]ကျုန်းလိဘုရင်က ဒီနေ့လဲသူ့ဇနီးတွေကိုအလိုလိုက်နေပြန်ပြီ

(၁၃၀) - ဇာတ်သိမ်းပိုင်း

U••

[ကျွန်ုပ်တို့၏ဧကရာဇ်အရှင်]

ကျုန်းလိသက်တမ်း ၈၃ နှစ်၊ တတိယမင်းဆက်၏တစ်ဆယ့်တစ်နှစ်မြောက် ကျုန်းလိ-ရှယ်ဟန့်စစ်ပွဲ၌ ကြီးမားသောတိုက်ဆိုင်မှုတစ်ခုဖြစ်ပေါ်လာခဲ့သည်။

၎င်းမှာစစ်ပွဲကာလ၌ပင် ရှယ်ဟန့်ဘုရင်သည် ရွှေနန်းတော်အတွင်းသေဆုံးနေခဲ့ပြီးဖြစ်ကာ အလောင်းကိုရှာတွေ့ချိန်၌တိုင်းပြည်တစ်ခုလုံးပွက်လောရိုက်သွားခဲ့ရလေ၏။ ထို့နည်းတူ တစ်ဖက်မှကျုန်းလိဘုရင်သည်လည်း ကိုယ်တော်တိုင်စစ်ချီတက်လေရာ ခံတပ်အတွင်းသစ္စာဖောက်သူလျိုများ၏ပုန်ကန်မှုကြောင့် ကံတော်ကုန်လေသည်ဟူသော သတင်းစကားများထွက်လာခဲ့တော့သည်။

နှစ်ဖက်တိုင်းပြည်မှလူအပေါင်းမှာ အံ့သြထိတ်လန့်ရချေပြီ။ လျစ်လျူရှုတတ်သောရှယ်ဟန့်ဘုရင်အတွက်မူ မထူးခြားသော်လည်း တစ်ဖက်မှကျုန်းလိအတွက်မူ သူတို့၏ဘုရင်မင်းမြတ်သည်သာအချက်အချာဖြစ်၏။ ၎င်းမှာတိုင်းပြည်၏ဖခင်ဖြစ်ကာ လူများစွာ၏ဘဝကိုကောင်းမွန်လာစေခဲ့သော ခေါင်းဆောင်ကောင်းတစ်ယောက်ပင်ဖြစ်လေသည်။

ဘုရင်ပိုင်လီထျန်းနန်းတက်ချိန်မှစ၍ တော်ဝင်နန်းတော်နှင့်ပြည်သူသည်တစ်သားတည်းဖြစ်လာခဲ့ကာ လူအားလုံးသည်ပိုင်လီထျန်းအားလေးစားချစ်ခင်ခဲ့ကြ၏။ ယခုတွင်မူအနှီပုဂ္ဂိုလ်မှာမရှိတော့ဟုဆိုလာလေရာ အဘယ်မှာလက်ခံနိုင်ပါမည်နည်း။

လူအပေါင်းသည် ဘုရင်မင်းမြတ်မရှိသောအနာဂါတ်ကို ကြောက်ရွံ့ထိတ်လန့်မိနေကြကာ တစ်ဖက်မှသစ္စာဖောက်များကိုလည်း ပြစ်တင်မုန်းတီးမိကြလေ၏။ သူတို့သည်အလွန်အကူအညီမဲ့ကာကြောက်ရွံ့လျက် ၎င်းမှာသတင်းမှားသာဖြစ်ကြောင်း၊ သူတို့၏ဘုရင်မင်းမြတ်ကထွက်ပေါ်လာ၍ဖြေရှင်းမည်ကိုမျှော်လင့်မိကြသည်။

သို့သော်လည်းထိုဖြစ်ရပ်မျိုးမှာရှိမလာခဲ့ချေ။ ရှေ့တန်းမှအခြေအနေသည်အလွန်ငြိမ်သက်နေခဲ့ပြီး ကောလဟာလများကိုရှင်းထုတ်ဖို့ဘယ်သူကမှမကြိုးစားကြချေ။ တစ်ချိန်တည်း၌ ရှယ်ဟန့်ပြည်တွင်မူ ရှယ်ဟန့်ဘုရင်၏ဈာပနကိုပင်လုပ်ဆောင်နေကြပြီဖြစ်သည်။