تحركت ريم فى الصالة أمام والديها وهى ترتجف من الغضب وقالت بثورة: أنا .. أنا تضربنى بالقلم على وشى .. أنا أتعرض للإهانة دى منها؟؟ طيب أنا هاوريها...
نظر لها والدها وقال: وليه عملت كده؟ أكيد حصل حاجة..ليلى بنت متربية ولايمكن تعمل حاجة زى دى من غير سبب.
إنت بتدافع عنها يابابا؟؟؟ ضربت بنتك بالقلم وبتدافع عنها..
أنا مش بأدافع لكن بالتأكيد فيه حاجة حصلت وصلتها لكده,
تدخلت امها وقالت: إحنا عارفين ليلى كويس وليلى محترمة ومتطلعش منها العيبة أبدا..
زمجرت ريم بغضب وأكملت أمها: إنت رحتى لهم ليه؟؟
إرتبكت ريم وقالت: رحت علشان .. علشان أتكلم معاها
رن جرس الباب ونهضت والدتها تفتح ودخل شريف مع مازن وإلتفتت إليه ريم وقالت: عاجبك اللى عمتك عملته ده؟ تهين أمك وإنت وقفت ولاقلت كلمة واحدة لا إنت ولا أخوك... دى آخرة تربيتى ليكم ياشريف.. بدل ماكنت ترد على الأهانة وقفتو ساكتين وكمان سبتو أبوكم يطردنى قدامكم؟؟
كنت منتظرة إيه بعد اللى عملتيه ياماما؟
نظر جده وسأل: وهى عملت إيه؟؟؟
نظرت ريم لمازن بسرعة وضاقت عيناها: الواد ده إيه اللى جايبه هنا؟؟؟ ياللا إرجع على الشارع اللى جيت منه...
شريف: كفاية بقى؟ كفاية ياماما.... كفاية...أنا مش عارف أقول لك إيه؟ بجد مش لاقى كلام أقوله ولسانى عاجز لأنك امى ... كفاية. كفاااااية
كان صوت شريف عالى جدا ووجه ملئ بالغضب وصمت الجميع وتعجب جده ماذا جعل هذا الشاب الهادئ يخرج عن شعوره ويثور بهذه الطريقة ونظر لإبنته بعتاب, كان يعرفها جيدا ويعرف أفعالها وضعت ريم يديها على خصرها وقالت: كفاية إيه؟ جاى محموق على أنا ؟؟ هى لحقت تعبى دماغك ضدى .. مانا عارفاها.
مين اللى يعبى دماغى وليه؟ إنت مش فى حسابات حد أصلا ,لابيسألو عليكى ولابيفكرو فيكى وكانو مرتاحين لما سافرتى ... إنت فاكرة إن عمتى ليلى أو عمتى نادية وإلا جدو وتيتا شاغلين بالهم بيكى؟؟ إنتى بس اللى حياتك بتدور حواليهم علشان كده بأقولك كفاية ... كفاية ياماما سيبى الناس فى حالها
كفاية أحرجتينا وقللتى من قيمتنا وقللتى من نفسك.. خليتى عمتى تخرج عن شعورها ولأول مرة تعمل تصرف زى ده .. كفاية أرجوكى كفاية...
إنت بتقول لى أنا الكلام ده !!.. كنت قوله لعمتك اللى رفعت إيدها على و..
قاطعها والدها وقال: إسكتى ياريم..
يابابا...
بأقولك أسكتى إنتى ... إحكى لى إيه اللى حصل ياشريف؟؟
YOU ARE READING
وتغيرت الأقدار
Non-Fictionكل إنسان يعانى من مشاكل كبيرة فى حياته ويظن بأن هذا هو نصيبه وقدره المكتوب ولكن يأتى الله فجأة بأشياء وأشخاص ليغيرو من هذه الأقدار لتكون أفضل مما حلمنا وتخيلنا,, لذلك لاتتوقف عن الحلم أبدا لأن القدر ربما يتغير لصالحك فى أى لحظة ..
