تجمدت ريم وهى ترى ليلى أمامها وظلت تنظر لها فى صمت ثم قالت: جاية ليه؟ عايزة تضربينى قلم تانى وتكملى إهانة..
لأ.. جاية أعتذر لك ياريم..
نظرت ريم بدهشة فأكملت ليلى: أنا مكانش لازم أعمل كده مهما عملتى أو قلتى .. غلطتى فى حقك كبيرة قوى لأنى أهنتك قدام ولادك وأنا عمرى ماهاسامح نفسى أبدا على اللى حصل .. أنا آسفة....حقيقى آسفة ولو تحبى هاجمعهم كلهم تانى وأعتذر لك قدامهم وأبوس راسك كمان.... أرجوك تسامحينى....
ملأت الدموع عيون ريم وارتجف وجهها وابتعدت خطوة للخلف وقالت بصوت مرتعش: إنت.. جاية تعتذرى لى أنا...
أيوه ياريم ده حقك ..
حقى !! إنتى إيه؟؟ إيه؟؟؟ جايبة الهدوء ده منين ؟ وليه بتتصرفى دايما صح ؟؟ حتى لما غلطتى جاية تعتذرى؟؟
لأنى أنا كده... مباحبش أعمل غير الصح.
إبتسمت ريم بسخرية وهى تقول : أنا لو مكانك مكنتش هاعتذر أبدا على فكرة..
إبتسمت ليلى وقالت: الاعتذار مش هايقلل منى أبدا بالعكس هايريحنى ,هايشيل عنى حمل وإحساس بالذنب كبير قوى, أنا مش قادرة أتحمل اللى عملته وخصوصا وولادك موجودين..وإعتذارى دلوقتى مجرد محاولة لأنى أنا أسامح نفسى قبل ماتسامحينى إنت..
قاومت ريم البكاء وحاولت السيطرة على دموعها وقالت: برضه طلعتى أحسن منى.. وإتصرفت بكرم أخلاق .....
أمسكت ليلى يد ريم وقالت: ده مش كرم أخلاق ياريم ده التصرف الصحيح أى حد بيغلط لازم يعتذر...
مهما كان سنه وعمله وشخصيته ...
على كده بقى أنا مديونة بإعتذرات لناس كتير قوى ..
شوفى ياريم أنا مش هاجاملك ولازم أواجهك ويمكن أول مرة نتكلم كده بوضوح ....
إنتبهت ريم لليلى التى أكملت: إنتى غلطتى كتير وعملتى تصرفات كلنا إتضايقنا منها سواء لمحسن او لولادك أو لأولادى اللى إنت مش معترفة بيهم وتصرفاتك هى اللى وصلتك دلوقتى للحالة دى ..إنتى اللى خليتى الناس تبعد عنك ...
أنا!!
أيوه إنتى ... وبدل ماتتراجعى كنتى بتزيدى فى الأخطاء وبتخلى المسافة بينك وبين الناس تكبر اكتر وأكتر...
يعنى أنا اللى الغلطانة دايما فى نظركم .
مش فى نظرنا ؟؟ دى الحقيقة ...خطأ وراء خطأ لما بقى الوضع صعب على أى حد يتحمله علشان كده خرجتى من حياتنا ...
سالت دموع ريم وبدأت تبكى وأكملت ليلى: كلنا بنغلط لأننا بشر بس أهم حاجة إن الإنسان يرجع عن غلطه ويحاول يصلح ......
YOU ARE READING
وتغيرت الأقدار
Non-Fictionكل إنسان يعانى من مشاكل كبيرة فى حياته ويظن بأن هذا هو نصيبه وقدره المكتوب ولكن يأتى الله فجأة بأشياء وأشخاص ليغيرو من هذه الأقدار لتكون أفضل مما حلمنا وتخيلنا,, لذلك لاتتوقف عن الحلم أبدا لأن القدر ربما يتغير لصالحك فى أى لحظة ..
