بنوته عايزه تلتزم ( الجزء الثاني )

قادر 🔐🔑

#بالله عليكم لتحاولوا تقراؤها هتعجبكم جدا باذن الله 😢😍
أنا أوحش بنت منتقبة بشهادة كل العرسان اللي اتقدموا لي، من زمان أوي وأنا صغيرة بحب النقاب ومهوّسة بيه، أي واحدة منتقبة بحبها جدًا لمجرد انها منتقبة من غير ما اعرف حتى شكلها ولا هي مين!

وأنا في الثانوي طلبت من أهلي اني انتقب رفضوا، ولما دخلت الكلية وكررت طلبي تاني رفضوا نهائي، كنت بدرس هندسة كمبيوتر، حاولت كتير أكون سعيدة بحياتي معرفتش بس كنت بحاول أكون راضية ودعيت ربنا كتير إن سبحانه يرضيني، خلصت كلية واشتغلت في شركة عقارات كبيرة، وبدأ موال الارتباط وقرايبنا كلهم بيسألوا متخطبتيش ليه؟!

أكتر حاجة بتأذي البنت هو كلام التجريح فيها و في سمعتها، والمؤلم أكتر لما الكلام ده يكون من قرايبك، مش ناسية كل كلمة اتقالت عني من ورا ضهري وساعات كمان كانت قدامي بمنتهى البجاحة، وكل نظرة شماتة وضحكة صفرا وكلمة تدبح، مش ناسية كل ده ومش مسامحة وهقتص منهم يوم القيامة..

افتكر مرة خالتو سميحة وهي عندنا بتتكلم مع ماما على خطوبة بنتها راحت قالت لماما : لأ بقى أنتِ لازم تشوفي لك حل في بنتك دي وتدوري وراها وتعرفي هي بترفض العرسان ليه وحاطة مين في دماغها وعايزة تودينا فين؟

وقتها الكلام موجعنيش أكتر من إن ممكن أمي تصدقه وهي أصلًا اللي مربياني!

ومرة تانية عمتو خيرية كانت عندنا وسمعتها صدفة بتقول ل بابا لا ياخويا متنفعش تسكت على بنتك كده أنت لازم تروح بيها لحد يعزّم عليها ويشوف فيها إيه هي لسه صغيرة ولا إيه دي داخلة ع التلاتين واللي في سنها عندهم بدل العيل أربعة!

يعزّم عليا ؟! وتلاتين سنة ؟! أنا اصلا لسه مكملتش ٢٦ سنة ؟! ضحكت من القهرة والجهل، الكلمة الحلوة بتطيب الخاطر وبنفضل فاكرينها وبنبتسم، لكن الكلمة الخبيثة بتفضل معلمة فينا ومش بتروح مهما مر الوقت وكل ما نفتكرها ألمها بيكون زي أول مرة، يومها نمت معيطة ودعيت ربنا ميخليش حد يشمت فيّ، أنا لواحدي، لواحدي يارب..

نفس الملل ونفس رتابة الحياة والسناريو المتعاد مفيش أي جديد في الحياة ! لحد ما بابا قرر اننا نسافر اسكندرية عند عمو عصام، فرحت جدًا اخيرًا هبعد شوية وأغير جو، أخدت اجازة من الشغل، القاهرة بتكون جحيم في الصيف، ونزلنا اسكندرية الجو فرق معايا فعلًا وخصوصًا لما خرجت اتمشى مع مريم بنت عمي واحنا بنعدي الشارع العربية صدمتني مفوقتش غير في المستشفى على صوت الدكتور بيقول لهم هي كويسة الحمدللَّه ومفيش اي اصابات في جسمها هي بس حصلها إغماء من الخضة، مكنتش مصدقة ولا عارفة استوعب أنا كنت متأكدة ان العربية صدمتني جامد، صدقت لما وقفت على رجلي من غير أي وجع..

بعدها بشوية سمعنا صوت دوشة كبيرة في المستشفى وعربية الاسعاف جاية وجايبين شاب عامل حادثة ومتبهدل خالص وحالته وحشة جدًا، بابا بيسأل الممرضة وهي بتفك لي المحلول قالت إنه محتاج نقل دم للشاب في اسرع وقت ومش لاقين فصيلته، ولما سألت الممرضة قالت لي فصيلة دمه.... ، لاقيت نفسي لا اراديًا بقول دي نفس فصيلة دمي، راحت الممرضة قالت لي تعالي اتبرعي له يا بنتي تكسبي فيه ثواب دا حالته وحشة أوي وجاي لواحده، لاقيت بابا بيقول لي ايوه يا حسناء تعالي يا حبيبتي تأخدي أجر عظيم وشكر على النعمة ربنا نجاكِ من الحادثة دي يمكن حصل كل ده عشان تيجي المستشفى وتتبرعي له !