عدا اسبوع كويس وم حصل شي شمس بقى كويس الحمدلله كنت عاملة ليه عزومة عشاء بينا بس جهزت الاولاد واتجهزت لبست فستان كحلي واسع 3/4 بدون اكمام ماسك عند الخصر وبتربط على الرقبة ومن تحت عند الحواف مكرمش شوية ونازل واسع تاني وكعب بيج غامق ولحن شورت جينز مشرط وتيشيرت كحلي فيه فيونكات بيناتها نقط لونها ابيض وفيه يد كت والتانية نازلة و جزمة من نفس شكل التيشيرت وعملت ليها شعرها كيرلي ولوسين نفس الشي ولحن وجوين شورتات بيج غامق وتيشيرتات روزي مع ابيض بوستهم واتصورنا ونون جاتنا ومعاها فراس قالت
رسلان ح يجي؟
ﻷ
فراس:م تنسي انو ابوهم
انا:م مهم.شمس جاء طالع وماسك لوسين سلم عليهم وناس ماما وخالتو هند جوا سلمت عليهم وقعدنا نتونس وكذا بابا وخالتو هند وعمو فؤاد نادوني معاهم في الهول التاني مشيت قعدت معاهم بابا قال
جودي رسلان وين؟
وانا اعرف كيف ي بابا؟
خالتو:ممكن نقول انو انتي م قلتي ليه انو في بارتي صح؟
انا:بالظبط.هزت راسها عمو فؤاد قال
جودي حبيبتي انا لحد حسي م اتدخلت فيكم لانو انا عارف رسلان غلطان وواثق في قرارتك وتصرفاتك بس بعد كدا صعب شوية اولادكم محتاجنكم مع بعض م كل واحد لوحده انتي ورسلان ليه م تتكلموا وتتفاهموا علشانهم..قاطعته وقلت
معليش ي عمو بس وين كنتوا انتوا لم انا اولادي قبل سنة ابوهم خلاهم فجأة بسبب تافه جدا وكانوا عيانين شهر كامل بسببو وم حاول يسأل ويطمن عليهم لحد م انا طلعت بيهم من البلد وفراس لحقني وشاكله وهو جاء عمل شنو !! ضربني علشان اتفه سبب و لسة هم كانوا عيانين كان وين لم بته لحن بسبب اكتئابها من عدم وجوده سبب ليها مشكلة في الصوت والنطق؟ وتبلد مشاعر انتوا كنتوا وين كلكم؟ ي عمو انت جدهم وابوه وانا م حصل اتكلمت وسألتك تتكلم معاه لانك انت شايف الحصل كله وم سألتو انا اجي اسألك ليه؟ مشيتوا عرستوا ليه وانا م اتكلمت برضو كانوا بجوني لحد بيتي وشغلي وبقللوا احترام لنفسهم انا اتكلمت معاهم فارغ؟ لا ابدا حسب الكانوا بقولوه انا كنت برد وبعدين الكلام ببقى ليهم حار وبقولوا ليه مرتك قليلة ادب؟ ياخ اي قليلة ادب مافي زول عندي ليه حاجة وراجلي زاتو اذا جاء وقف قدامي انا م ح اسكت ليه ي عمو ،، واذا انتوا بعد الفترة دي كلها جايين تتكلموا تبقوا غلطانين العجنة لم تنضج م بتتصلح
بابا:جودي..دموعي نزلت مسحتها بسرعة وقلت
بابا م تسكتني دا الحاصل يعني لا زدت لا نقصت ورسلان الإنتوا شايفنوا م غلطان دا خلوه عندكم وعرسوا ليه تالت ورابع م بهمني كتير وخلوه يجيب ليكم بدل ال4 العنده مية م لي علاقة بيه.خالتو هند ضمتني وقالت
انا مع جودي في كل حرف.اتدخل صوت تيتا كانت بتسمع كلامنا من بعيد لاحظت ليها وم اتكلمت قالت
ح نرفع دعوة حضانة معناها.ابتسمت ووقفت قلت
وارفعي دعوة طلاق برضو لانو م عايزة اسمع صوته المقرف وهو برمي اليمين الاوراق كفاية وياريت الجلستين يكونوا في نفس اليوم علشان م اتعب نفسي معاكم كتير ونخلص بقى ونشوف الح ينجح منو.ابتسمت بسخرية وطلعت
*#Back..*
قلت
تعال اكل حاجة طيب؟.هز راسه نزلت المطبخ وهو وراي قعد في كرسيه وختيت ليه اكل كانت مرت اربعة سنوات على مشكلتي انا ورسلان وبعد اخر نقاش لي مع بابا واهل رسلان اتفاجاءت انو بالجد تيتا رفعت قضية حضانة ضحكت بتذكر بسخرية وقتها ومعاي نون كانت ومشيت اول جلسة وكنت متاكدة انو من جلسة او اتنين ح اطلع انا الكسبانة وفعلا مشيت وبدون م يحكم القاضي رسلان سحب الدعوة ووصى انو م حد يقرب على الاولاد ويتدخل في حياتنا م اشتغلت بالموضوع كتير لانو اساسا هم الغلطانين حتى لو اسبابي كانت غبية بس انا كدا بدعس على قلبي في سبيل كرامتي جوين قال
ماما انا شبعت.هزيت راسي وبوسته الجرس رن كانت نون وفانو بوستهم وجوين جاء جاري لفانو قلت
جوجو اطلع غرفتك والعبوا هناك . هز راسه بإبتسامة وطلعوا نون كانت حامل في 3 شهور قالت
همم عندك جزر صح؟.قعدت اضحك وقلت
من الطماطم بالليمون قلبنا جزر؟
وبالعسل كمان
يلا امشي جيبي براك اعمليه زي م بتحبي😹
ياخ قومي انتي.اتنهدت وقلت
طيب يلا معاي
همم يلا.دخلنا المطبخ شويت الجزر وختيت ليها فيه شوية عسل واديتها ليه قالت
يسلموا ياخ
حسستيني انك م بتاكلي نهائي.ضحكت وقالت
بتي طالعة شرهة
شكلو كدا😹.الجرس رن الشغالة فتحت جات داخلة رال كانت في الهني مون وحامل وم قدرت جات وحسي في السابع صرخت بفرح
رال ي حيوانة مشتاقين ياخ😢.جات ضمتني وقعدت تبكي قالت
كيفكم؟
كويسين الحمدلله.قعدت وسلمت على نون
