مرت اخوي لهجة عراقية

الفصل الاول

الرجاء الشديد التصويت للقصة واتمنى تعجبكم هاي القصة الخفيفة واكدر ارسم ضحكة على الوجوه الراقية

#مرت_اخوي

كتابة رؤى صباح مهدي

باللهجة العراقية

1-

اني حمزة ابن ماجدة يعني هذا لقبي هيج يصيحولي الجيران صديقات امي من يجيبون طاريي خل اضرب الكم مثل. مرة رحت وديت حلاوة للجيران امي تحب من تسوي حلاوة تسوي جدر ابو العزايم وتملي المواعين حلاوة وتعال يا حمزة ودي لبيت ام جعفوري وودي لبيت ام قدرية. المهم مرة وديت حلاوة لبيت الجيران فبنت الجيران ما قبلت تفتحلي الباب الة كتلهة الاسم الحركي مالتي "لج افتحي اني ابن ماجدة".

على كل حال هذا مو الموضوع اللي احب اسولفة الكم. اريد اسولفلكم همي وغمي. والمصيبة اللي اني جبتها على راسي. "الهام" بنت جيرانة اللي عمري ما حبيتها وجنت دائما اكول يارب تتزوج بباريس بس حتى اخلص منها لان من جان عمري 5 سنين ولحد هسة كلما تشوفني تجرر بخدودي وتنفش بشعري وهسة هي عمرها 25 واني 18 والعوبة بعدها كلما تشوفني تسوي هيج.

طبعا كلكم هسة متشوقين تعرفون مصيبتي ادري بيكم تموتون على المصايب تريدون موضوع وتسولفون بي. مصيبتي هي ان هاي الهام العوبة راح تصير مرت اخوي. عافت باريس وعلى حظي المصخم لفت يمي بالطابق الفوك. يعني لو هي حظهة صكط لو اني.

خلوني اسولفلكم شلون صارت القسمة. اخوي طارق طبعا اخوي الوحيد وحبيبي وشيال همي والضلع الماينشلع الظاهر جان مدكن على الهام العوبة من لمن جانت باول متوسط. شغل حبيات حسب ما هو سولفلي فد مرة من مرات الاعتراف اللي اتندم عليها ورة ساعة وكلي اذا احد عرف بيهن ادفنك. شفتوا العوبة شسوت بالضلع صار الدفان.

المهم حسب اعترافاتة الخطيرة بلحظة الضعف اللي حجيت الكم بيها اخوي المراهق جان يكعد بباب الحوش ومن بعيد جان ينيشن بالليزر على شباك غرفة الهام العوبة وهي جانت حسب ما اني استنتجت بايعة ثكل مو طبيعي وتتعزز علي الى ان خبلتة وظل يفكر بيها الى ان خلصت دراسة وظلت عطالة بطالة تنتظر التعيين.

اني هسة شنو دوري بالموضوع. اني جنت كتكوت صغيروني بذاك الوقت وجانت امي تروح تسيير عصريات على بيت ام الهام تشوف الحجية ام فهد بيبية الهام ام امها وتشوف ام الهام ست ابتهاج. فاخوية الله يغفرلة جان يحط رسائلة الغرامية بجيب البنطرون الوراني مالتي واول منطب للبيت وبعدنة بالطرمة تجي الهام تركض علية وتبوسني وتشيلني وياعيني شكد حليان ويا كلبي شكد كبران وهي بالحقيقة تاخذ الرسالة من جيب بنطروني من غير ما ينتبه عليها احد. طبعا هذا الحجي من صار عمري 6 سنوات اتذكر تصرفاتها وياية. بعدين من كبرت اكثر امي بطلت تاخذني وياهة فانقطعت وسيلة الاتصال بيناتهم. وانقطعت وياهة النساتل والجبس اللي جان اخوية ينطينياهم كلما اروح لهناك وبالذات من كشفت شغلة الرسايل كمت اخوفة بيهن حتى يشتريلي ازبري ومرات استخدمهن ورقة ضغط علي من نتعارك على فد شي. حتى امي بوقتها تعجبت شكد اخوي صاير حباب وياية وهي متدري هو لو بيدة ينطيني جلاق يوديني للحلاق يزيني صفر ويصبغ صلعيتي حمرة ويخليني كدام ثور هايج ويفوخ كلبة بية.

بس بعدين تغيرت الاوضاع وصرت اني واخوي مقربين واصدقاء كتلكم صرنة الضلع وكلة طلعاتنة سوة ونكعد بباب الحوش سوة نصجم بالبنات بالحَلة من يطلعون من المدارس فد حلو الى ان قرر اخوي ان يتوب الى الله ويعاقب نفسة ويتزوج.

راح لامي وكللهة بصوت خجول ابد ميلوكله وهو مدنج بالكاع من الحياء "يمة اريد اتزوج" . طبعا اني جنت اباوع عليهم من باب المطبخ خشمي مركز وية جدر البامية واذاني مركزة وية اخوي العاطفي وميت ضحك علي. طبعا امي بوقتها ما صدقت سمعت ابنها الجبير كال اريد اتزوج ركعت هلهولة هزت بيهة حيطان البيت. وحضنتة لاخوي وهي تبجي بعدين عافت جدر البامية اللي جانت حايرة بي وشلهت ردنهة وشمرت الجفجير بالمغسلة وجرت اخوي اللي جان بعدة مدنك من المستحى وكعدتة بالهول وسدت الباب عليهم. اني ما دوخت نفسي اسمع شديكولون لان اكيد امي هسة دتعددلة بنات واكيد العوبة راح تكون وحدة منهن. رحت للمطبخ وصبيت من جدر البامية وثردت وحطيت قطعة لحم ام اللية واني دا انتظر اسمع اسم البنية اللي جنت بعدني ما اعرف هي نفسها الهام العوبة. اني مجنت متوقع بذاك الوقت ان اخوي بعده يحب الهام بنت الجيران وخصوصا بعد ان ماخلة بنية بالحي تعتب علي من التصجيم وماخلة انثى بين عمر ال15 الى عمر ال30 ما تحارش بيها وصجمهة وطلع يريد يتزوج الهام. حظي مو كتلكم!!

امي ما ناقشت قرارة لان تعرف الهام من لمن جانت صغيرة حسب ما كالت عنها "حبابة ومؤدبة ومتعرف دروب" . ههههههههههههههاي خطية امي قهرتني عبالها كل الناس مثلها. شحال وبنطروناتي كلها تشهد رسائل الغرام اللي كلها اكيد اغلاط املائية اللي جانت توصلها من ابنج روميو .

البيت كلة جان سعيد واني جنت متخبل. معقولة اخوية راح يتزوج العوبة . حاولت اغير عقلية اخوية بس جان فد مرة قافل عليها ام السحورة. تخيلوا يكولي "ولك حموزي هاي اللي خلصت دفتر ابو 30 اكتب بيهة شعر وسويت مجلدات رسائل اتغزل بيها وجنت اكعد بالليل لا شتا ولا صيف اضويلهة بالليزر الاحمر (اكيد عرفتوا هي هاي نفسها لحظة الاعترافات اللي ممكن تسبب دفني).

جان لازم اخذ على عاتقي تخريب هالزفة باي وسيلة ممكنة حتى لو احرك بيت العوبة . طبعا هاي كلها افكاري بلحظة من الانفلاق الجنوني بس اني بالحقيقة اذا نبح علي جلب اعوف نعالي واركض حافي القدمين.

كعدت بليلة كمرية فوك السطح اخطط وامخمخ شلون اخرب العرس وفكرت اروح لامي واكللهة بان البنية اللي تريد تخطبها لابنها مو مثل ماهي متصورتها وان هي واخوية انتيمات بس بعدين الصراحة احتقرت نفسي على هالفكرة يعني شلون اخرب سمعة اخوية الضلع.!

المهم نمت مكشف بذيج الليلة وببالي فكرة حتى اخرب العرس هذا وبدون ما احد يعرف اني المسئول عن هالتخريب. اروح اجيب صديقي الضلع اللاخ سرحان واني ويا نبوك فلوس العرس اللي امي مدكنتهن حتى تزوج بيهن طارق. طبعا هالفلوس هي تحويشة العمر مال طارق وفوكاهن تحويشة العمر مال امي من جانت تضم نص مصروف البيت اللي ابوية ينطيهيا ونص الشهر تكلة لابوية "دهر شكد تاكلون خو انت كرشك يشهد" وهاي جانت الجملة الافتتاحية مال امي حتى ترجع تاخذ من ابوية فلوس وهم تضم نصهن وبكل اصرار.