مرت اخوي لهجة عراقية

الفصل السادس

مرت اخوي

كتابة رؤى صباح مهدي

6-

ورة ساعة جتي خالة ام سرحان وسرحان انكر ان هو جان يحجي جديات وكال ان كل اللي حجة بي وية امي جان شقة بس ما كدر يظل ببيتنة برغم امي كلش دتشغلة ومعتمدة علي هواي بس خافت لا يطلعلهة بسالفة جديدة فشكرته وطلبت من عندة يروح وية والدته لان محتاجته. وراح سرحان وظليت وحدي والعرس مابقالة شي اذا امي قبلت تزيد الفلوس الهام راح تصير ببيتنة بعد 10 ايام.

كان مبين الحزن على طارق من جهة خطيبته كامت مترد على اتصالاتة ومن جهة ثانية امي معاندة متريد تزيد الفلوس وهو رايح جاي يتوسل بية حتى انطي من فلوسي دين . اني جنت ادري كلش زين ان امي اذا كالت لا يعني لا وهيج اكون خلصت بس هي لحد الان ماكالت لا يعني دتفكر وابوية ديحاول يقنعهة بالموضوع بس هي من وجهة نظرهة ان الاتفاق اتفاق وهمة مديلتزمون بي وهذا الشي ضوجهة كلش . ورة يومين تفكير امي نطقت .

جنة كلنة مجموعين على العشا من زفت امي النة الخبر السعيد "راح نزيد الفلوس". اني وكفت اللكمة بحلكي واختنكت. يعني كل الاخبار المهمة والمباحثات المصيرية امي تجيبهة على الاكل. طبعا طارق رجع الدم يمشي بوجهة وفرح كلش خطية كانما كان ميت ورجعتلة الحياة اما اني فكان لازم ادبرلي خطة جديدة بس هالمرة لازم تكون محكمة وذكية لان اني وحدي واذا انكشفت دا اخرب عرس اخوية راح الحك سرحان ببيتهم .

ورة العشا خابرت امي بيت الشفية وكالت الهم الخبر السعيد ووصلت صوت الهلاهل للقمر وراسا دك تليفون طارق وراح اختفة بالظلمة. اني ورة هاي الصدمة دخت رحت لفيت راسي ونمت حتى تفكير ماجنت اكدر افكر وكعدت الصبح مغبش على صوت تليفوني. طلعلي رقم غريب فما شلتة. الرقم ظل يدك يمكن فد خمسين مرة وبين النايم والكاعد جاوبت واني افرك بعيوني واتثاوب "الو ؟ سرحاااان؟ شنو القصة ؟ زين زين اشوفك على الكهوة فد ساعة بعد يلة الله وياك ضلع" .

جان سرحان الظاهر مشتري سيم كارت جديد ورة ما خالة ام سرحان اخذت تليفونة بحجة محتاجتة وراجع وبقوة حتى يكمل المهمة . ورة ساعة التقينة اني وسرحان بالكهوة اللي براس الشارع وجان هو كاعد دينتظرني على احر من الجمر. اول ما شافني اشرلي اروح يمة وطلبلي جاي وانطلق يسولفلي بخطة جهنمية حسب تعبيرة حتى ينقذ الضلع طارق من الجني.

سرحان كان ميدري بالاخبار الجديدة فقررت اقنعة زايد بموضوع الجني والسحر وخبرتة "سرحان انت يا خوية متدري بالاخبار الجديدة. امي وافقت تزيد الفلوس ورجعت ريمة لعادتها القديمة ورجع التليفون لازك باذان طارق " صفك سرحان ايد بايد وصاح "اسمع حمزة احنة لازم نشوف حل لهذا الموضوع يعني شفت هذا الجني شكد قوي بس فتنت على الهام خرب حياتي كلها لك يا اخي امي جبرتني اروح طبيب مجانين وهددتني تدخلني مستشفى امراض عقلية تخيل حمزة ضلعي لهاي الدرجة جني لئيم. لا وبعد خالة اللي محد يكدر يغير رايهة ويجبرهة تسوي شي هسة هي وافقت على اللي رادوا وبكل رحابة صدر واخوك روميو ورة كل اللي سوته بي وورة ما عافته وهددته كلشي ينتهي اذا ما نفذوا مطالبهم هسة رجع كانما شي لم يكن لك يا اخي بس لا هذا الجني عندة قدرة يمسح الذاكرة " . جاوبته لسرحان " اني عندي خطة . شنو رايك نصور شريط فيديو للجني باجر لان عائلة الهام معزومين يمنة على العشا فشنو رايك نروح اني وياك لبيتهم ومن نلكة الجني نصورة بالكاميرة ونشوفة لامي ولطارق يجوز هالشي يغير رايهم" سرحان ابتسم ابتسامة عريضة وقال "احسن خطة سمعتهة بحياتي بس شلون اذا الجني قتلنة حتى منكشف سرة وسر الهام ؟" سؤال سرحان كان منطقي لو كان اكو جني فعلا بس هو اصلا فكرة الجني اني اخترعتهة ومحد صدقهة غير سرحان . جاوبته لسرحان "صحيح ضلعي اكيد الجني راح يحاول بس احنة راح ناخذ ويانة حرز فهو مراح يكدر يتقرب علينة " وختمنة جلستنة على هاي الخطة اللي هي اخر محاولاتي واذا فشلت فمصيري راح يكون مجهول.