مرت اخوي لهجة عراقية

الفصل الثالث

مرت اخوي

كتابة رؤى صباح مهدي

لايت كوميدي

3-

وكفت وباوعت علي وبعدين جريتة على صفحة وهزيت راسي ولزمت كصتة وقلت:

"لا حول ولا قوة الا بالله سرحان ضلعي انت حلمان لو مصخن شنو شبيك هاي يا فلوس وليش اصلا اضمها بكنتور امي ويعني لو جنت ضام فلوس يمها برايك امي مراح تلكفهن بنفس اليوم؟ انت منين تألف هاي القصص انت صدك بطران؟"

طبعا ما اسولفلكم على سرحان خطية كام يحجي وية الحايط وبعدين راح غسل وجهة وكعد عاقل يباوع تلفزيون وية امي. ورة ما امي سالتة على امة كللهة طاردتة من البيت وطلب يبقة بالبيت يمنة هالليلة ولان امي صديقة امة الروح وحدة قبلت يبقة وياية بالغرفة لان غرفة طارق ديصبغوهة استعدادا لقدوم العروس واصلا هو طارق هم راح يحمض على كلبي. وهسة قبل لا اي شي يصير لازم الفلوس اضمها بغير مكان فتسللت لغرفتي واخذت الفلوس ورحت دكنت الفلوس بمكان امين.

اجة الليل و وياي سرحان واخوية . واخيرا الضلوع تجمعوا. طفت الكهربا وقررنة نكعد بباب البيت نسولف وانكرز حب. اني من فرحتي اقترحت اجيب للضلوع نركيلة على حسابي وحلفت الهم ما اشرب لان اني محرمين علي النركيلة واذا ابوية افتهم اني دا اشرب مو خوش سالفة. مرة من المرات رحت وية جماعة ولد من المنطقة بعرس واحد جيرانة واشترالنة نركيلة واني شربت كلت يلة هو عرس وكلشي ضايع بهذا اليوم ومستحيل بهالهوسة ابوية راح يلكفني. ليش ما ابوية عيون الصكر وية اول نفس اجاني والشحاطة بايدة وضربني على علباتي وكدام كل الربع كلي "ولك حمزة اذا شفت مرة لاخ بيدك نركيلة لا ادفنك هنا" العائلة كلها تشتغل دفانة ماشاء الله.

المهم اول ما جبت سيرة النركيلة اللي اخوية يموت عليها اشو هذا انتفض وكام يرعش وعيونة على شباك المحروسة وكام بصوت ناصي يكلي "حمزة بعد سيرة النركيلة لتجيبها على لسانك كافي احنة الله تاب علينة من هاي السوالف" جذبتني كلمة احنة فراسا سالتة "منو احنة قصدك؟" خطية وجهة كام ينطي الوان وجان يجاوب" اني وسرحان غير" وظل يعوص ويسوي اشارات بعينة لسرحان عبالة مدا اشوفة بالظلمة. سرحان عاط "اني بعد مااشرب نركيلة ؟ من شوكت؟ ما اتذكر بطلتهة, روح حمزة حبيبي روح جيب النة ام التفاحتين " باوعت على اخوية وكتلة واني بالكوة كاتم الضحكة "الظاهر بطلت تشرب نركيلة وية الضلوع بناءا على اوامر القلب " خزرني والة شوية وينطيني بوكس بس اني راسا عدلتها "شبيك مو التدخين مضر بصحة القلب"

هز راسة وطب جوة وخربت علينة الليلة الله لا يوفقها اللي ببالي.

مر يومين يلة سمعنة العيطة . امي المسكينة صوتها انبح وهي تصيح "لحكولي حرامي اخ قلبي ولج يمة انباكت الفلوس" ركضت العائلة واني من ضمنهم وسرحان وراية وشفت امي خطية كالبة الكنتور كلة راسا على عقب تدور على الفلوس بس الفلوس ماكو وتصيح وتستريح خطية شاطت ابوية بس افتهم الصار لزم سبحتة بايد وقلبة بالايد الثاني. اخوية اغمة علي خطية من شدة الصدمة فلوس عرسة راحت يعني عرسة راح. اني كلت هي بقت علي خل اسوي روحي ميت حتى ميشكون بية وجان كمت ارجف ولزمت امي ووكعت بصف اخوية.