مرت اخوي لهجة عراقية

الفصل الخامس

مرت اخوي

كتابة رؤى صباح مهدي

5-

طبعا الحر والبك كانوا عوامل مساعدة حتى اظل كاعد طول الليل واني استغليت الموضوع حتى افكر بالخطة مالت الجني. وفجاءة لكيت الحل لمعت عيوني وكمزت من الفراش. رحت لسرحان بالسطح وخليت الجرجف على راسي ولزمت اللايت الصغير جوة الجرجف وبالظلمة رحت كعدت بصفة ودفرتة برجلي كم دفرة الى ان فتح عيونة رغم الحر والكائنات الزاحفة والطائرة المنتشرة. اول ما فتح عينة علكت اللايت وصحت بصوت عميق "سرحااااان!" سرحان بقة صافن ما حرك عينة ولا هو تحرك. جمد بمكانة وحتى ما رمش ولا جفل. اني عبالي مات للامانة فدفرتة مرة لخ حتى اتأكد. قلت بصوت عميق " سرحاااان سمعت بيك متخاف مني كلت خل اجيك" خطية كام يمتمت وتنفسة صار اسرع من نفاخة دتفش وكام يرجف وحتى اخوفة اكثر طفيت اللايت وعلكتة كم مرة وقلت "سرحاااان اني طول عمري ما عندي اصدقاء لان كل الناس تخاف من الجني وهسة واخيرا لكيت احد ميخاف مني وسيرتي متسببلة رعب وراح يصير صديقي اكدر اتلبسة واعيش بعالم البشر مثل ما اريد" طبعا ما اكللكم شصار حقيقة الموضوع يدمي القلب لان سرحان خطية صرخ بكل ما اوتي من قوة واغمى علي.

اني راسا ورة ما اغمى على سرحان تغطيت وسويت نفسي نايم وورة دقيقة اجو اهلي كلهم للسطح واني سويت نفسي كاعد هستوني من النوم . كلنة حاولنة نكعد سرحان وورة ربع ساعة كعد خطية عينة محولة من الخوف والنوب شاف امي لابسة دشداشتها البيضة الكودري وشيلتهة البيضة عبالة الجني بعدة كام يصرخ ويكول لامي "جني جني .... انصرف يا عدو الله انصرف" وجان يجي راجدي معدل من الحجية وكان هو السبب ان سرحان اغمة علي مرة ثانية. وورة محاولات رجع استعاد وعية بس هالمرة امي ما جانت واكفة راحت تسويلة كوب عصير. راسا اول ما استعاد وعية سالة طارق "شبيك سرحان يمعود بس تصرخ ويغمة عليك شنو شفت جني كدامك؟" سرحان كام يمتمت وكال جملة بس محد افتهمهة وورة شوية جتي امي ومن بعيد شاف سرحان الدشداشة وهم كام يصرخ بجمل غير مفهومة جان امي عافتة ونزلت ليجوة واني شربتة العصير الى ان استعاد هدوءة سالة ابوية "ابني سرحان معقولة يعني خبالك يوصل الى هاي المرحلة يعني اني كل مرة اكول مستحيل يتخبل اكثر من هيج بس دائما تفاجئني. على كل حال راح تحجي شبيك لو نروح ننام" سرحان اللي جان الخوف راكبة لزم برجل ابوية وقال "عمي دخيلك لتعوفوني ليروح يجي ياخذني " سالة طارق "منو هو ياخذك سرحان؟" جاوب بحروف متقطعة "ال ... ج...ن...ي" صفنوا ابوية وطارق علي لمدة ثانية وبعدين انفجروا ضحك خو ابوية كان صوت ضحكتة وصلت لراس الشارع وكانما تعليق سرحان اجة مي بارد على قلبة وطبعا طارق وابوية عبالهم سرحان يقصد امي ميدرون ان هو يقصد شي ثاني. ابوية قال "ابني هي صحيح خالتك تخوف بس يعني متوصل للجني" وطك ضحكة طويلة بينما سرحان جان متفاجأ من ضحكهم علي وخايف بنفس الوقت.