مرت اخوي لهجة عراقية

الفصل الثاني

#مرت_اخوي

كتابة رؤى صباح مهدي

2-

اذا بكَنة الفلوس امي راح احتمال تصير بيهة جلطة اما طارق فاكيد راح يضرب روحة رصاصة الرحمة لان راح يفقد الامل بالزواج لل25 سنة القادمة. احتمال اني اتزوج قبلة ههههه مجرد التفكير بهذا الشي خلاني ابتسم لروحي بالمراية الصبح واني دا اطلب رقم سرحان.

" الو سرحان شلونك اريدك ضلع مهمة لاخوك الضلع اي اي انت بس تعال يمعود لتخاف مابيها شرطة يمعود طارق مالة علاقة دتعال وانت تعرف اوكي اوكي سلملي على الحجية مع السلامة"

طبعا سرحان بالحقيقة صديق طارق واني لزكت بيهم وصرت الضلع لذا حتى تنجح الخطة مالتي لازم سرحان ميعرف اني شريد اسوي وهاي المهمة كلش سهلة باعتبار سرحان فطير ويصدق كلشي من ... الضلع.

تكتكت ومخمخت الخطة عدل ومن كد ما جنت مخمخ جان مبين علي دا اخطط لشي بحيث نبع الحنان تروح وتجي تذبلي حجي "ها حمزة اخوك راح يتزوج واتفرغلك . الة ازوجك احلة بنية بالفرع" ههههه خطية نبع الحنان عبالها دا افكر بالزواج متدري اني تفكيري اكبر من هيج ههههه.

المهم صار الظهر واجة صديقي الصدوق سرحان. شفتة من بعيد يمشي ويتلفت لان اني كتلة منريد طارق يعرف بالموضوع يعني نسويهة مفاجأة. رحت استقبل سرحان واخذتة على صفحة.

صرخ سرحان ببلاهة كالعادة:

"ها ولك حمزة هسة تفهمني شنو الموضوع ترة عفت الحجية تسب وتشتم واجيتك حافي"

جاوبتة لسرحان بس حتى اقتل الفضول الفضيع العندة"

"حبيبي سرحان.. زواج طارق قرب واريد اسويلة مفاجأة واني اعرف انت لسانك فالت وهسة كبل تروح تكتهن كلهن بس راح اكلك حتى متظل تزن مثل النحلة"

باوعت على سرحان وكملت كلامي :

"سرحان حبيبي اريد تساعدني اشتري هدية مناسبة لطارق لانت انت تعرف طارق قبل ما اني انولد وصح اني اخو بس انت الضلع الحقيقي. مو لو مومو؟"

ابتسم سرحان بسعادة ورة الصبغ مالتي وانفخ خطية وجان يدك على صدره وكال:

"اعتمد علي حبيبي حموزي الورد اني اعرف طارق مثل جف ايدي وادري بي شيريد هدية بهذا اليوم"

برطمت وسويت نفسي ضايج جان سرحان راسا كلي :

"ها حبيبي حموزي خير؟"

انطيتة ظهري وبلحظة درامية طلعت القطرة مال العيون وقطرت وفركت عيني ودرت وجهي علي واني دا ابجي. "لو اكلك ماكو داعي ادوخ بهل المشكلة احسن"

وطبعا ادري كلش زين هذا الجواب راح يخبلة لسرحان واذا جان فضولة واحد فهسة فضولة يقرة الف والدودة صارت حية. اصر سرحان يعرف شنو القصة فحجيت واني في اشد التعاسة وطبعا ساعدني هواي استحضار ذكريات اول مرة صلخني بيهة ابوية راجدي ورة ماشاف نتيجة نص السنة راسب.