مرت اخوي لهجة عراقية

الفصل الرابع

مرت اخوي

كتابة رؤى صباح مهدي

4-

طبعا صار الصبح وكلنة كاعدين دنتريك وجان يطب علينة سرحان. عيونة مدكنة وشعرة منكوش مبين من الفراش كبل اجانة. "خالة اجيتج بالخبر اليقين" امي هزت راسهة وباوعتلة بنظرة الحزن العميقة وسالتة"ابني روح غسل وجهك بالاول وتعال اتريك اشربلك استكان جاي احنة ما طايرين يا وليدي" سرحان مبين جان مستعجل يريد يكتهن ويروح قللهة لامي "لا خالة خاف انسة تدرين الاحلام تنسة بسرعة" وباوع على طارق وكال "طارق روح جيب ورقة وقلم بسرعة دا اردلك المعلومات كوم يلة" طارق اخوية يشارك سرحان بجنون البقر بس على خفيف فطبعا كمز راح جاب ورقة وقلم وظل فاتح حلكة ينتظر سرحان ينطق.

سرحان كالعادة من يريد يسوي شي هو الوحيد ضمن الحضور يعتقد ان هو شي مهم يظل خطية وبكل اقتناع و فطارية يحاول قدر الامكان يكون متواضع ولذلك كان يباوع على الكل ويبتسم ابتسامتة الخبلة وبنظرات خجولة بدة يطلع الدرر.

" شفت والعياذو بالله جسم لاهو سمين ولاهو ضعيف يعني وسط ولابس اسود باسود وعيونة بيهة نظرة غريبة ماكدرت اميزهة. دخل من الشباك مال غرفة النوم مالتج خالة وومشة بالظلمة. "

طبعا امي ماخلت سرحان يكمل الحلم الرهيب مالتة الة وسالتة لان خطية مارادتة يحول نفسة الى مضحكة وبالذات ابوية اخر مرة ماخلة صفة ما لطشهة بي وخلة الكل يضحك علي ووراهة ماطب بيتنة شهر. امي راسا سالتة لسرحان "خالة يعني متاكد متريد تشرب جاي بالاول؟". هز راسة الفطير وكمل وبكل ثقة "خالة خل اكمل رحمة لوالديج.." بس ابوية اللي جان مصبح ضايج وروحة طافرة استلم سرحان خطية واني قريت الفاتحة على روح سرحان الطيب "ابني انت صدق تحجي؟ شنو لا سمين ولا ضعيف شنو نظرة غريبة بعيونة لك انت متبطل غباء. هو حرامي اكيد راح يجي يبوك وبس عيونة تطلع واكيد راح يكون خايف ومية بالمية دخل من شباك الغرفة انت تظل مضحك الناس عليك وعود هاي انت الجبير"

سرحان صفن على ابوية الظاهر جان ديهضم كلام الحجي ويمكن شافة معقول لان وراهة حجة حجي الصراحة ارعبني بي.

سرحان خنزر وحك راسة وسوة حركة الهجوم وبدة يطلع حجي اني متاكد كان اختراع اللحظة بس شنو جابهة بالكصة الملعون"اسمع عمي اني راح اسوي نفسي ما سمعت بس بصراحة كلامك جرحني. يعني اني ماكملت كلامي اسمعني للاخر . الحرامي شاب عمرة صغير ويعرفكم اي وشعرة اسود طويل واسمه ...." طبعا من وصلت لاسمة اني خفت الصراحة ورغم المعلومات جانت عامة بس هي تنطبق علي نوعا ما وكلت هذا الفطير يروح بلا وعي يفضحني لان هو هم اشترك بعملية السرقة وخاف عقلة يسترجع الذكريات. المهم اني قاطعتة راسا وكتلة "سرحان اخوية انت ليش مدوخ نفسك اذا اصحاب الانة كلمن داير وجهة لصفحة ولا ديسمعوك ولا مهتمين رغم انت دتحاول تساعدهم خوية عوفهم رحمة لوالديك وتعال سولفلي الي بلكي بمساعدتك اكدر اقبض على المجرم اللي دمر حياتنة السعيدة"