_أبوس إيدك طلقنى .. ارحمنى
_اطلقك! ليه! هو دخول الحمام زى خروجه
*قبل 3 سنين*
_طب بطلى عياط يا داليدا عشان خاطرى
_مش عارفه اعمل إيه يا إسراء ، أخويا ومراته زهقوا من وجودى وبقيت حمل تقيل عليهم ، عاوزين يجوزونى لأى حد يشوفوه مناسب ، مش مهم بقا أنا عاوزاه ولا لأ .. الله يرحمهم بابا و ماما عمرهم ما كانوا هيجبرونى على حاجه
_طب حاولى طفشى العريس اللى جايلك بكره ده يمكن بعد كده جاسر يتقدملك
_جاسر!! جاسر بالنسباله احنا جيران وبس ، زى ما تقولى كده بيعتبرنى أخته ، الراجل الوحيد اللى قلبى متعلق بيه مش واخد باله منى أساساً
_ربنا يعدى بكره على خير ويكتبلك حياه سعيده
_يارب يا إسراء .. ياااارب
* * *
(بيرن موبايل جاسر)
_ألو .. إيه يا سعيد بقالك يومين مختفى فين!
_كنت بتفسح مع المُزه ولسه راجع النهارده ، المهم عايزك ف حوار كده
_خير
_لأ هو خير متقلقش ، بصراحه انا رايح اتقدم لواحده بكره وكنت عاوزك معايا علشان مروحش لوحدى
_بجد!! إيه الأخبار الحلوه دى ، مين العروسه؟ البت اللى كنت مختفى معاها صح
_لأ يا عم مش هى ، هو فى واحد يمشى مع واحده ويروح يتقدملها بردو!
التانيه ملاك كده نازل م السمااا ، هتشوفها بكره انت مستعجل على إيه
_طب ياسيدى ربنا يتمم على خير ، وخف البنات من حياتك شويه
_حد يقول للنعمه لأ!
_سعيد! ع الأقل اتقى ربنا ف الإنسانه اللى رايحلها بكره دى
_ماشى يا شيخ جاسر هحاول .. يلا جهز نفسك بكره بعد العصر
_ماشى سلام
* * *
_مش كل عريس تطفشيه يا داليدا حاولى وافقى ع اللى جاى ده عاوزين نخلص أنا وأخوكى م المسئوليه دى ونستقر كده ف بيتنا لوحدنا
_حاضر يا مى هوافق عليه
_هروح بقا اجهز نفسى أنا كمان
_ماشى
إسراء : هى مالها مرات أخوكى هتقعد تسم بدنك كل شويه بكلمتين كده!
_ربنا يهديها يا إسراء ، وعموماً هى عندها حق ، أنا حمل تقيل عليها وعاوزه تخلص منى
_لو لقيتى العريس كويس وافقى وخلاص .. مفيش قدامك غير كده ومتحطيش جاسر ف دماغك بقا ربنا ييسرله طريقه هو كمان
_ربنا يقدم اللى فيه الخير
_يارب
* * *
_يا أخى ارمى السجاره اللى ف إيدك دى ، الناس لو شافوك كده هيرفضوك قبل أى حاجه
_عندك حق أنا هرميها ، البنات اليومين دول بقوا يتلككوا على أى حاجه يا جدع ، ممكن يرفضوا العريس فعلا عشان السجاير
_حقهم
_طب ادعيلنا بالهدايه ي أخ جاسر
_ربنا يهدينا جميعاً قولى بقا هنركب ولا هتودينا مشى ولا إيه حكايتك!
_نركب إيه! ده بيتهم هنا ورا بيتك علطول
_هما مين دول
_بيت اهل العروسه يا جاسر ، صحصح كده
_هى مين العروسه!!؟
_داليدا
_مييييين!!!!!
* * *
_داليدااا داليداااا .. الناس كلموا أخوكى وطالعين أهو ، جهزى نفسك بقا
_منا جاهزه أهو يا مى ، هعمل إيه أكتر من كده يعنى!
_طب افردى وشك وابتسمى كده زى أى عروسه
_حاضر .. أهو ، أى أوامر تانيه!
_لأ كده تمام
(بيرن جرس البيت)
_وصلوووا أنا هروح افتح
_ماشى
إسراء : متخافيش ، أنا معاكى
_انا مش قلقانه ، أنا زعلانه على قلبى ، ادعيلى كتييير
